1 እስራኤለ አሳ ቦር ዎይኮ ዶርስ ꬋይድ ብሽን ደምኮ አጋ አꬎፋ፤ ላጋ ኤሀዳ እያ ጎዳስ እማ። 2 ሄ መህያ ጎዳይ ነ ሄራ አስ ግዶና እፅኮ ዎይኮ እያ ጎዳይ ኦነኮ ነ ኤሮና እፅኮ፥ እያ ጎዳይ ኮይሸ ያና ጋካናዉ ነ ሶ ኤፋ፤ እ ኮይሸ ዪኮ እያዉ እማ። 3 ሄሳዳ ሀረ ዎይኮ ማኦ ዎይኮ አይባካ ꬋይዳባ ደምኮ፥ ሄሳዳ ኦꬃ።

4 እስራኤለ አሳ ሀረይ ዎይኮ ቦር ኦገን ኩንድን በእኮ፥ ማዳዳ ደንꬃፈ አትሽን፥ አጋዳ አꬎፋ።

5 ማጫስ አደ ማኦ ማኦፎ፤ አደይካ ማጫሳ ማኦ ማኦፎ። ሄሳ መላባ ኦꬅያ ኦናካ ጎዳይ፥ ህንተ ፆሳይ እፄስ።

6 ነ ኦገ ብሽን፥ ምꬃ ቦላ ግድን፥ ሳአን ባ ናኣ ዎይኮ ባ ጱጱልያ ሀጵዳ ካፎ ደምኮ፥ እዮ፥ እ ናይታራ ኦይካዳ ነ ሶ ኤፎፓ። 7 ናይታ ኤፋናዉ ዳንዳኣሳ፤ ሽን አይዉ ባና መላ የዳ አጋ። ሄሳዳ ኦꬅኮ፥ ኔኒ ዱረታዳ አዱሳ ላይꬅ ዳና።

8 ኦራꬃ ኬꬅ ኬፅያ ዎደ ካራፐ አስ ኩንድ ሀይቅን ነ ኦይሸቶና መላ ኬꬃ ቦላ ካተ ጊግሳ።

9 ነ ዎይነ ጋደን ናምኡ ቆሞ ካꬅ ዘሮፓ፤ ሄሳዳ ኦꬅኮ፥ ነ ዘርዳ ካꬃይነ ዎይነይ ናምአይካ ኢታና።

10 ቦርነ ሀረ እስፈ ዋፃዳ ጎዮፓ።

11 ሱፈፐነ ሊኖፐ ኦሰትዳ ማኦ ማኦፋ።

12 ነ ማእያ ማኦይ ኦይዱ ባጋራ ማጫር ደእያባ ግዶ።

13 እስ አስ ማቾ ኤክ ስሚድ እዮ ዶሶና እፅድ፥ 14 “ሀ ማችው ታ ኤክያ ዎደ ኩመꬅ ግዱኩ” ያግድ እዮ ኢስድ ኦደትኮ፥ 15 ናኤ አዋይነ ናኤ አይያ እ ጌላኦተꬃ ማላ ኤፍድ፥ ካታማ ፐንገን ደእያ ጭማታ በሶ። 16 ናኤ አዋይ ጭማታስ ሀይሳዳ ያግድ ኦዶ፤ “ታኒ ታ ናእዉ ሀ ኡራስ ማቾ ኦꬃዳ እማስ፥ ሽን እዮ እፅስ። 17 እ፥ ‘ነ ናእያ ኩመꬅ ግዱኩ’ ያግድ እዮ ኢስድ ኦድስ። ግዶሽን፥ ‘ታ ናኤ ጌላኦተꬃ ማላ ሀይሳ በእተ’ ” ያግድ፥ እ ጌላኦተꬃ ኤርስያ ጫርቅያ በሶ። 18 ያትኮ፥ ሄ ካታማ ጭማት እያ ጋራፎ። 19 እ እስራኤለ ጌላኤ ሱንꬃ ኢስዳ ግሾ፥ ጭማት እያ ፄቱ ብራ ሳንትመ *ፄቱ ብራ ሳንትመ፦ እስ ክሎነ ባጋ ግራመ ዴፅያ ብራ ሳንትመ አጭስድ፥ ናኤ አዋስ እሞ። ናእያ እያዉ ማቾ ግዳዳ ደኦ፤ ባ ደኦ ላይꬃ ኡባን እዮ የዳናዉ በሰና።

20 እያ ሞቶይ ቱማ ግድድ፥ ናእያ ኩመꬅ ግዶና እፅኮ፥ 21 እያ ባ አዋ ሶን ደአሸ ላይማትዳ ግሾ፥ ናእዉ እ አዋ ካረ ኤህድ፥ ሄ ካታማ አደት እዮ ሹቻን ጫድድ ዎꬎ። እስራኤለ ግዶን እያ ቦርሶባ ኦꬃሱ፤ ሄሳዳ ኦꬃዳ ነ ግዶፈ ኢታ ድጋ።

22 እስ አስ ሀራ አሳ ማችራ ላይማትሸ ኦይከትኮ፥ እነ እያራ ላይማትዳ ማጫስያ ሀይቆ። ሄሳዳ ኦꬃዳ ነ ግዶፈ ኢታ ድጋ።

23 እስ አስ ሀራ አሳስ ኦይሸታ ጊግዳ ጌላእዉ ካታማ ግዶን ደምድ ኢራ ላይማትኮ፥ 24 ኤንታ ናምኣ ካታማፐ ጋፃ ከስድ፥ ሹቻን ጫድድ ዎꬍተ። ናእያ ሀይቀይ፥ ካታማ ግዶን ደአሸ፥ አስ አሻና መላ ዋሳቦና ግሾሳ። ናአይ ሀይቀይ፥ ሀራ አሳስ ጊግዳ ጌላእዉ ኢስዳ ግሾሳ። ሄሳዳ ኦꬃዳ ነ ግዶፈ ኢታ ድጋ።

25 እስ አስ አሳስ ጊግዳ ጌላእዉ አስ ባይና በሳን ዎልቃን ኦይክድ፥ እዮ ኢስኮ፥ እያ ፃላል ሀይቆ። 26 እያ ሀይቆስ ጋꬅያ ናጋራ ኦꬃቦና ግሾ፥ ናኤ ቦላ አይባካ ኦꬆፕተ። ሄስ እስ አስ ጮ ደንድድ ሀራ አስ ዎይሳ መላ። 27 እ እዮ አስ ባይና በሳን ደምድ ኦይክን፥ ሄ ጌላእያ ዋሳሱ፥ ሽን እዮ አሽያ አስ በንትቤና።

28 እስ አስ ኦይሸታቦና ጌላእዉ ኦይክድ፥ እ ጌላኦተꬃ ኤክድ ኦይከተኮ፥ 29 ናኤ አዋ እሻታሙ ብራ ሳንትመ †እሻታሙ ብራ ሳንትመ ኡሱፑን ፄቱ ግራመ ዴፅያ ብራ ሳንትመ። አጮ። ያትድ ናእዉ ባዉ ማቾ ኦꬆ። ባ ደኦ ላይꬃ ኡባን እዮ የዶፎ።

30 እስ አስ ባ አዋ ማችዉ ኤክድ፥ ባ አዋ ካዉሾፎ።