1 ሳንጋትዳ ዎይኮ ቃራተትዳ አደይ ጎዳ ሺቁዋ ገሎፖ።

2 ላይማተꬃን የለትዳ አስ ጎዳ ሺቁዋ ገሎፖ። ሀር አቶሽን ታማንꬆ የለተꬅ ጋካናዉ፥ እያ ኮቻፈ ኦንካ ጎዳ ሺቁዋ ገሎፖ። 3 አሞነ አስ ግድን ዎይኮ ሞአበ አስ ግድን፥ ጎዳ አሳ ሺቁዋ ገሎፖ። ሀር አቶሽን ታማንꬆ የለተꬅ ጋካናዉ ኤንታ አሰ ግድዳ ኦንካ ጎዳ አሳ ሺቁዋ ገሎፖ። 4 ኔኒ ግብፀፈ ከያዳ ብሽን፥ ኤንቲ ካꬃራነ ሃꬃራ ነና ሞክቦኮና። ኤንቲ ማሰጰፆመን ፓቶራ ካታማን ደእያ ብኦራ ናኣ ባላም ነና ባዳና መላ ሻምዶሶና። 5 ጎዳይ፥ ነ ፆሳይ ነና ዶስዳ ግሾ ባላማ ስእቤና፤ እያ ባደꬃ ነዉ አንጆን ላምስ። 6 ነ ደኦ ላይꬃ ኡባን ኤንቲ ሳሮ ዳና መላነ ዱረታና መላ አሞቶፋ። 7 ኤዶመት ነዉ ዳቦ ግድያ ግሾ ኤንታ ካꬎፓ፤ ነ ኤንታ ቢታን በተ አስ ግዳዳ ደእዳ ግሾ ግብፀታ ካꬎፓ። 8 ኤንታ ሄꬓንꬆ የለተꬃይ ጎዳ ሺቁዋ ገላናዉ ዳንዳኦሶና።

9 ነ ሞርከታ ኦላናዉ ከያዳ ዱንካንዳ በሳን ነና ቱናተꬃፈ ናጋ። 10 ቃማ አሙሆን አቱንꬃይ ጉክን፥ እርፃባይ እያ ቦላ ደእያ ኦንካ ጉታፐ ጋፃ ከይድ ያን ጋምኦ። 11 ሳእ ኦማርስያ ዎደ ባ አሳተꬃ ሜጨትድ፥ አው ዉልያ ዎደ ጉታ ስሞ።

12 ነ ዎራ ሼሽ ኡትያ በሲ ጉታፐ ካረን ጊግሳ። 13 ሼሻስ ኡትያ ኦላ ቦክያ ሚሸ ኦላ ሚሸራ ጋꬃዳ ኦይካ፤ ሼሻስ ኡታ ስማዳ ኦላን ቢታ ዛራ። 14 ጎዳይ፥ ነ ፆሳይ ነና ናጋናዉነ ነ ሞርከታ ነ ኩሸን አꬅድ እማናዉ፥ ነ ጉታን ስመረቴስ። እ ያን ሻትያባ በእድ፥ ነና አግድ ስሞና መላ ነ ጉታይ ጌሽ ግዳናዉ ኮሼስ።

15 ባ ጎዳፐ ባቃትድ፥ ኔኮ ይዳ አይልያ ዛራዳ እያ ጎዳስ እሞፋ። 16 እ ነ ካታማታፐ እሱዋን፥ ባ ኮይዳ በሳን ባ ኮይዳ ዎደ ጋካናዉ ደኦ፤ እያ ኡንኤꬆፋ።

17 እስራኤለ አሳፐ ኦንካ አደ ግድን ዎይኮ ማጫ ግድን፥ ኤቃ ጎይንያ አሳይ ኦይሳዳ ላይማቶፖ። 18 አደ ግድን ዎይኮ ማጫስ ግድን፥ ላይማተꬃን ደምዳ ሚሸ ቃንገꬅ ጋꬃናዉ ጎዳ ነ ፆሳ ኬꬅ ኤሆፖ። ኤንታ ናምኣ ጎዳይ ነ ፆሳይ እፄስ።

19 ህንተ ኮቸ ግድዳ እስራኤለ አሳስ ሚሸ ዎይኮ ካꬅ ዎይኮ ሀራባ ታልአዳ የሎ ኤኮፋ። 20 ሀራ ቢታ አሳፐ የሎ ኤካናዉ ዳንዳኣሳ፤ ሽን ኔኒ ላታናዉ ገልያ ቢታን ነ ኦꬅያባ ጎዳይ፥ ነ ፆሳይ አንጃና መላ ነ ኮቸ ግድዳ እስራኤለ አሳስ የሎራ ታልኦፋ።

21 ጎዳስ፥ ነ ፆሳስ፥ እማናዉ ቃንገትዳባ ጋꬃናዉ ጋምኦፋ። ጎዳይ ነ ፆሳይ ነ ቃንግዳይሳ ኩመꬅ ኔፐ ኮይያ ግሾ፥ ፖሎና እፅኮ ነዉ ናጋራ ግዳና። 22 ሽን ነ ቃንጎና አግኮ ሄስ ናጋራ ግደና። 23 ጎዳስ ነ ፆሳስ፥ እማና ግዳ ነ ዶናን ኦደትዳባ ኔኒ ዶሳን እማና ግዳ ግሾ፥ ነ እንፃርሳን ኦደትዳባ ፖላ።

24 ኔኒ እስ አሳ ዎይነ ጋደ ግዶራ አꬍያ ዎደ ዎይንያፐ ኮይዳ መላ ማ፥ ሽን እያፐ አይባካ ነ ኦይክዳ ሚሸን የጎፋ። 25 እስ አሳ ጋደራ ኔኒ አꬍያ ዎደ ሄ ጋድያን ደእያ ትያፐ ዱꬃዳ ማ፤ ሽን ካꬃፈ ጫካዳ ነ ሶ ኤፎፓ።