1 እስ አስ ማቾ ኤክ ስሚድ፥ እስ ኢታባ እ ቦላ ደምድ እዮ እፅድ፥ ፕርማ ዳክድ፥ የድኮ፥ 2 እያ ሶፐ ከያዳ፥ ሀራ አዝና ገልኮ፥ 3 ሄ ናምአንꬆ አዝናይ እዮ ዶሶና እፅድ፥ ፕርማ ዳክድ፥ እዮ ባ ሶፐ ከስድ የድኮ፥ ዎይኮ እዮ ኤክዳ ናምአንꬆ አዝናይ ሀይቅኮ፥ 4 እያ ቱንዳ ግሾ፥ ኮይሮ ኤክዳ አዝናይ፥ ዛሪድ እዮ ኤኮፎ። ሄስ ጎዳ ስንꬃን እፀትዳባ፤ ነ ጎዳይ፥ ነ ፆሳይ ነ እምያ ቢታን ሄሳ መላ ናጋራ ኦꬆፋ።

5 ኦራꬃ ማቾ ኤክዳ አስ ኦላስ ቦፖ፤ ሀራ ዴፆ ኦሶ ኦꬆፎ። እስ ላይꬅ አꬋና ጋካናዉ አዉካ ቦና ባ ማችዉ ኡፋይሶ።

6 እስ አሳ ዎፃ ዎይኮ ማይደ አጮስ ኦይኮፋ፤ ሄስ ኬꬃ አሳይ ምያባ ꬋይድ ሀይቆ ጉሱ።

7 እስ እስራኤለ ግድዳ ባ እሻ ካይሶት ኤፍድ፥ አይለ ከሰይ ዎይኮ ሀራስ ባይዝያ ኡራይ ሀይቆ። ሄሳዳ ኦꬃዳ ኢታ ኡራ ነ ግዶፈ ድጋ።

8 ጎጋ ሀርገፈ ነና ምንꬃዳ ናጋ፤ ሌወ ኮቸ ግድዳ ካህነት ነና ታማርስያ ኡባ ፖላ፤ ታ ኤንታዉ እምዳ ኪታ ናጋ። 9 ኔኒ ግብፀፈ ከያዳ ኦገን ደእሽን፥ ጎዳይ ነ ፆሳይ ማይራም ቦላ ኦꬅዳይሳ አኬካ።

10 እስ አሳስ እስባ ታልአዳ፥ ኦይꬅያባ ኦይቻናዉ እያ ሶ ገሎፓ። 11 ኔኒ ካረን ኤቅዳሽን፥ ነ ታልእዳ ኡራይ ኦꬅያባ ሶፐ ከስድ ነዉ እሞ። 12 እ ማንቆ ግድኮ፥ ኔኒ አጮስ ኦይክዳ እያ ማኡዋ ነ ሶን አይሶፓ። 13 እ ማእድ አቃና መላ ሳእ ኦማርስያ ዎደ እያዉ ጉየ ዛራ፤ እ ነና ጋላታና። ሄስ ጎዳ ነ ፆሳ ስንꬃን ነዉ ፅሎተꬃ ኦሶ ግድድ ታይበታና።

14 ማንቆነ ማደ ኮይድ ዶካለትዳ፥ እስራኤለ ግድዳ ነ እሻ ግድን ዎይኮ ነ ካታማታፐ እሱዋን ደእያ ሀራ ቢታ አስ ናቆፋ። 15 እ ሀች ኦꬅዳይሳ ሀች ኤካናዉ ምንꬅድ ኮይያ ግሾ፥ አው ዉሎና እያዉ ቃንፃ። ሄስ ሀኖና እፅኮ፥ ማንቆይ ጎዳኮ ዋስን ሄስ ነዉ ናጋራ ግዳና።

16 ናይት ኦꬅዳ ናጋራ ግሾ፥ አዋታ ዎꬋናዉ በሰና፤ ቃስ አዋት ኦꬅዳ ናጋራ ግሾ ናይታ ዎꬋናዉ በሰና። ኦንካ ባ ኦꬅዳ ናጋራን ናጋራን ሀይቃናዉ በሴስ።

17 ሀራ ቢታ አሳ ፕርዳነ ይኦ ናይታ ፕርዳ ዎቢሶፓ፤ አምኤ ማኡዋ አጮ ግሾ ኦይኮፋ። 18 ኔኒ ግብፀ ቢታን አይለ ግድዳይሳነ ጎዳይ ነ ፆሳይ ነና ያፐ ዎዝድ ከስዳይሳ አኬካ። ታኒ ነና ኪተይ ሄሳ ግሾሳ።

19 ኔኒ ካꬅ ጫክያ ዎደ ነ ዶግዳ ምርቅያ ኤካናዉ ጉየ ስሞፋ። ጎዳይ፥ ነ ፆሳይ ነ ኩሸ ኦሶ ኡባን ነና አንጃና መላ ሄሳ በተ አሳስ፥ ይኦ ናይታስነ አምኤታስ አጋጋ። 20 ኔኒ ሻማሆ አይፈ ማፅያ ዎደ ዉርሳዳ ማፃናዉ ናምአንꬆ ጉየ ስሞፋ። አትዳይሳ በተ አሳስ፥ ይኦ ናይታስነ አምኤታስ አጋጋ። 21 ኔኒ ዎይነ አይፈ ማፅያ ዎደ ዉርሳዳ ማፃናዉ ናምአንꬆ ጉየ ስሞፋ። አትዳይሳ በተ አሳስ፥ ይኦ ናይታስነ አምኤታስ አጋጋ። 22 ኔኒ ግብፀ ቢታን አይለ ግዳዳ ደእዳይሳ ዶጎፓ። ታኒ ነና ኪተይ ሄሳ ግሾሳ።