1 ናምኡ አሳት ኦየትድ ፕርዳ ኬꬅ ቢኮ፥ ዳይናት ፅሉዋ ነ ልከ ግድ፥ ናቅዳይሳ ነ ባላ ግድ ፕርዶ። 2 ባልዳይሳ ጋራፎ በሲያባ ግድኮ፥ እያ ትራራ ዝንእስድ ዞኮን ሾጫና መላ ዳይናይ ኪቶ። እ ጋራፈተይ ዳይና ስንꬃንነ እ ኦꬅዳ ባላ መላ ግዶ። 3 እ ኦይታሙ ጋካናዉ ጋራፈታናዉ ዳንዳኤስ፥ ሽን ሄሳፈ ዳሮፖ። ሄሳፈ ዳርኮ ነ እሻይ ነ ስንꬃን ካዉያና።

4 ዉዱማን ካꬅ የꬍያ ቦራ ዶና ቃቾፋ።

5 እስፈ ደእያ እሻታፐ እሶይ ናአ የሎና ሀይቅኮ፥ እያ ማችያ ሀራ አስ ገሎፖ። እ አዝና እሻይ እዮ ኤክድ፥ እዉ ኮሽያባ ኩንꬆ። 6 ሀይቅዳ እሻ ሱንꬃይ እስራኤለ አሳ ግዶፈ ቁሸትድ ꬋዮና መላ እያ፥ ኮይሮ የልያ አደ ናአይ ሀይቅዳ እሻ ሱንꬃን ፄገቶ።

7 ግዶሽን፥ እ ባ እሻ ማችዉ ኤካናዉ ኮዮና እፅኮ፥ ማጫስያ ካታማ ፐንገን ደእያ ጭማታኮ ባዳ፥ “ታ አዝና እሻይ ባ እሻ ሱንꬃይ እስራኤለን ዳና መላ ኮይቤና፤ ታና ኤክድ፥ ታዉ ኮሽያባ ኩንꬆና እፅስ” ያጋዳ ኦዶ። 8 ካታማ ጭማት እያ ፄግድ ኦይችን፥ እ ሀእካ፥ “ታኒ እዮ ኤክከ” ጊኮ፥ 9 ማጫስያ ጭማታ ስንꬃን እያኮ ሺቃዳ፥ እያ ጫማፈ እሱዋ ከሳዳ፥ እያ ሶምኦን ጩታዳ፥ “ባ እሻስ ዘረꬅ ዳና መላ ኮዮና አሳ ቦላ ሀይሳ መላ ካዉሽ ጋካናዉ በሴስ” ያጎ። 10 ያትን፥ ሄ ኡራ ሶ አሳይ እስራኤለ ኮቻ ግዶን፥ “ጫማ ከስዳ አሳ ሶ” ጌተትድ ፄገትሸ ዳና።

11 ናምኡ አሳት ዋትሽን፥ እሱዋ ማችያ ያዳ፥ ባ አዝና ሾጨይሳ ኩሸፐ አሻናዉ፥ ባ ኩሽያ የዳዳ ሀንኩዋ አደተꬃ ኦይክኮ፥ 12 እ ኩሸይ ቃይ ባይና ቃንፀቶ።

13 ግታነ ጉꬅ ግድዳ ናምኡ ምዛነ ኦይኮፋ። 14 ዳሮነ ጉꬅ ማክያ ናምኡ ማካ ሚሸይ ነዉ ዶፖ። 15 ጎዳይ፥ ነ ፆሳይ ነዉ እምያ ቢታን አዱሳ ላይꬅ ነ ዳና መላ ልከ ምዛነይነ ማካ ሚሸይ ነዉ ደኦ። 16 ጎዳይ ነ ፆሳይ ሄሳ መላባ ኦꬅድ፥ ባለꬅያ ኦናካ እፄስ።

17 ነ ግብፀፈ ከያዳ ኦገ ቦላ ደእሽን፥ አማለቃት ነ ቦላ ኦꬅዳባ አኬካ። 18 ኤንቲ ፆሰ ያዮና ደረ፤ ነ ኦግያን ኤንቲ ኔራ ኤቀትዶሶና። ነ ብሽን፥ ዳቡርድ ጉየ አትዳ አሳ ኡባ ዎꬍዶሶና። 19 ሄሳ ግሾ፥ ጎዳይ ነ ፆሳይ ነና ሄ ቢታ ላትስድ፥ ነ ዩሹዋን ደእያ ሞርከታፐ ነና ሸምፕስያ ዎደ ሀ ቢታን ኤንታ ሀሳይያ አስ ꬋያና ጋካናዉ አማለቃታ ኡባ ꬋይሳ፤ ሄሳ ኦꬃናይሳ ዶጎፓ።