1 ጎዳይ፥ ነ ፆሳይ ነና ላትስያ ቢታ ገላዳ፥ ዎፑ ጋዳ ዱስ ኦይክያ ዎደ፥ 2 ጎዳይ፥ ነ ፆሳይ ነዉ እምያ ቢታን ሞክዳ ካꬃ ኡባፈ ባይራ፥ ጎዳይ ነ ፆሳይ ባ ሱንꬃይ ፄገታና መላ ዶርዳ በሳ ኤካዳ ባ። 3 ሄ ዎደ አዋትያ ካህንያኮ ባዳ፥ “ጎዳይ ታዉ እማና ግድ ካሰ ኑ ማይዛታስ ጫቅዳ በሳ ኑና ገልስዳ ጎዳስ፥ ኑ ፆሳስ፥ ሀች ማርካታይስ” ያግተ። 4 ካህነይ ካꬃ ነ ኩሸፐ ኤክድ፥ ጎዳ ነ ፆሳ ያርሾ በሳ ስንꬃን ዎꬆ። 5 ሄሳፈ ጉየ፥ ጎዳ ነ ፆሳ ስንꬃን ሀይሳዳ ያጋ፤ “ታ ማይዛይ በሳፈ በሰ ዩይሸ ደእዳ ሶረ ቢታ አስ፤ እ ታይቦን ጉꬃ አሳታራ ግብፀ ዎꬍድ ያን ደእስ። እ ያን ደእሸ ግታ፥ ዎልቃማነ ታይቦን ዳሮ ደረ ግድስ። 6 ሽን ግብፀት ኑኒ አይለ ግድድ ኦꬃና መላ ኡንኤꬅዶሶና፤ ካዉሽዶሶና። 7 ያትን፥ ኑኒ ጎዳኮ፥ ኑ አዋታ ፆሳኮ ዋስዳ። ጎዳይ ኑ ዋሱዋ ስእስ፤ ኑ ዋይያ፥ ኑ ዳቡራነ ኑ ኡንኤተꬃ በእስ። 8 ጎዳይ ባ ዎልቃማ ኩሽያን፥ ባ ምጨትዳ ቀስያን፥ ግታ ዳጋማን፥ ማላታንነ ማላልስያባታን ኑና ግብፀፈ ከስስ። 9 ሀ በሳ ኑና ኤህድ፥ ማꬅነ ኤስ ጎግያ ሀ ቢታ ኑስ እሚስ። 10 ሄኮ፥ ጎዳይ ኑስ እምዳ ቢታ አይፍያፐ ባይራ ኤሀስ” ያጋዳ፥ ካꬃ ጎዳ ነ ፆሳ ስንꬃን ዎꬃዳ፥ እያ ስንꬃን ጉፋና። 11 ነዉነ ነ ሶ አሳስ ጎዳይ፥ ነ ፆሳይ እምዳ ሎኦባ ኡባን ኡፋይታሸ፥ ጎዳ ጋላታ። ሌወትነ ነ ግዶን ደእያ በተ አሳ ኡባይካ ኔራ ኡፋይቶ።

12 አስራታ ከስያ ሄꬓንꬆ ላይꬃን፥ ነ ካꬃፈ አስራታ ከሳ ኦንግዳፐ ጉየ ነ ካታማን ደእያ ሌወታስ፥ በተ አሳስ፥ ይኦታስነ አምኤታስ እማዳ ኤንቲ ካልድ ማና መላ ኦꬃ። 13 ጎዳ፥ ነ ፆሳኮ፥ “ታኒ ታ ሶፐ ዱማትዳ ካꬃ እሞታ ከሳዳ፥ ነ ታና ኪትዳይሳዳ ሌወታስ፥ በተ አሳስ፥ ይኦታስነ አምኤታስ እማስ። ታኒ ነ ኪታፐ እሱዋካ መንꬃብከ፤ እሱዋካ ዶጋ አጋብከ። 14 ታ ካዮትያ ዎደካ፥ ሄ አስራታፐ አይባካ ማብከ፤ ታ ቱንዳ ዎደካ እያ ቦቻብከ፤ ሀይቅዳ አሳስ እያፐ እማብከ። ታኒ ጎዳ፥ ታ ፆሳ ቦንቻስ፤ እ ታና ኪትዳባ ኡባ ፖላስ። 15 ነኒ ደእያ ጌሻ በሳፈ፥ ሳሎፐ ዱገ ፄላ፤ ነ ደርያ እስራኤለ አንጃ፤ ካሰ ኑ ማይዛታስ ነ እማና ጋዳ ጫቅዳ ማꬅነ ኤስ ጎግያ ቢታ ኑስ አንጃ” ያጋ።

16 ነ ሀ አዋጆታነ ዎጋታ ናጋና መላ ጎዳይ ነ ፆሳይ ሀች ነና ኪትስ። ሄሳ ግሾ፥ ነ ኩመꬃ ዎዛናፐነ ኩመꬃ ሸምፑዋፈ ኤንታ ናጋ። 17 ጎዳይ፥ ነው ፆሰ ግደይሳነ ነኒ እያ ኦግያን ባናዉ፥ እያ ዎጋ፥ እያ ኪታነ ህግያ ናጋናይሳ ሀች ኤርሳዳሳ። 18 ጎዳይ ባ ገልዳ ቃላዳ ነኒ እያ ደረ ግደይሳ፥ እያዉ ቡዞ ሚሸ ግደይሳነ እያ ኪታ ኡባ ናገይሳታ ግደይሳ ሀች ነና ኤርስስ። 19 ሄሳ ነኒ ኦꬅኮ፥ እ መꬍዳ ደረ ኡባፈ አꬅድ ነና ጋላታን፥ ሱንꬃንነ ቦንቾን ግታ ደረ ኦꬃና። እ ገልዳ ቃላዳ ነኒ እያዉ ጌሻ ደረ ግዳና።