1 ሀች ታ ነ ስንꬃን ዎꬅዳ አንጆይነ ባደꬃይ ነ ቦላ ጋክያ ዎደ ጎዳይ፥ ነ ፆሳይ ነና ላልያ ሀራ ካዎተꬃታ ግዶን ደእሸ ሀይሳ ነ አኬክኮ፥ 2 ነነ ነ ናይት ጎዳ፥ ነ ፆሳኮ፥ ስማዳ፥ ነ ኩመꬃ ዎዛናፐነ ነ ኩመꬃ ሸምፑዋፈ ታ ሀች ነና ኪትያ ህግያስ ኪተትኮ፥ 3 ያን ጎዳይ፥ ነ ፆሳይ ነ ድኤትዳ ቢታፈ ነና ዛራና። እ ህንተዉ ቃትድ ህንተና ላልዳ ካዎተꬃታ ኡባ ግዶፈ ዛሪድ ሺሻና። 4 ቢታ ጋፃፐ ጋፃ ጋካናዉ ነ ላለትኮካ፥ ያፐ ጎዳይ፥ ነ ፆሳይ ነና ዛሪድ ሺሻና። 5 ነ አዋት ካሰ ላትዳ ቢታ፥ ነካ ላታና መላ ጎዳይ፥ ነ ፆሳይ ነና ሄ ቢታ ኤሀና። ያን ነና ነ አዋታፐ አꬅድ ዱረያና፤ ነ ታይቡዋ ዳርሳና።

6 ነ ደኦን ዳና መላነ ጎዳ፥ ነ ፆሳ ነ ኩመꬃ ዎዛናፐነ ነ ኩመꬃ ሸምፑዋፈ ዶሳና መላ እ ነዉነ ነ ናይታስ ኪተትያ ዎዛና እማና። 7 ጎዳይ፥ ነ ፆሳይ ሀ ባደꬃታ ኡባ ነ ሞርከታነ ነና ጎደይሳታ ቦላ ኤሀና። 8 ሀች ታ ነና ኪትያ ህግያ ነ ናጋና፤ ዛራዳ ጎዳስ፥ ነ ፆሳስ ኪተታና። 9 ሄ ዎደ ጎዳይ ነ ፆሳይ ነና ነ ኩሸ ኦሶ ኡባን፥ ነ ኡሎ አይፍያን፥ መህያንንነ ነ ጎሻ አይፍያን ነና ዳርስድ አንጃና። ጎዳይ ካሰ ነ አዋታ አንጅድ ኡፋይትዳይሳዳ ነና አንጅድ ኡፋይታና። 10 ሄስ ሀናናይ ሀ ህገ ማፃፋን ፃፈትዳ ጎዳ፥ ነ ፆሳ ህግያነ ዎጋ ናጋዳ፥ ጎዳ፥ ነ ፆሳኮ ነ ኩመꬃ ዎዛናፐነ ነ ኩመꬃ ሸምፑዋፈ ስምኮ።

11 ሀች ታ ነና ኪትያ ኪታት ሄሳ መላ ዴፆ ግዶኮና፤ ኔፐ ሃኮኮና። 12 ኔኒ፥ “ኑኒ ስእድ ኪተታና መላ ሳሎ ከይድ ኑስ ዎꬍሳናይ ኦኔ?” ጎና መላ ሳሎና ግደና። 13 “ኑኒ ስእድ ኪተታና መላ ኑስ አባ ፕንድ ኤሀናይ ኦኔ?” ጎና መላ አባፈ ሄፍንꬃና ግደና። 14 ቃላይ ነዉ ዳሮ ማታን ደኤስ፤ ነ ኦꬃና መላ ቃላይ ነ ዎዛናንነ ነ ዶናን ደኤስ።

15 ሄኮ፥ ታ ሀች ነ ስንꬃን ደኦነ ሎኦተꬅ፥ ሀይቆነ ꬋዮ ዎꬃስ። 16 ነ ጎዳ፥ ነ ፆሳ ዶስኮ፥ እያ ኦግያን ቢኮ፥ እያ ኪታ፥ እያ አዋጁዋነ እያ ህግያ ታግኮ፥ ነ ደኦን ዳናነ ዳራና። ነ ላታናዉ ገልያ ቢታን ጎዳይ፥ ነ ፆሳይ ነና አንጃና።

17 ሽን ነ ዎዛናይ ጎዳፐ ሃክን፥ እያዉ ኪተቶና እፃዳ፥ ሀራ ፆሳታስ ጉፋናዳ ኤንታ ጎይንኮ፥ 18 ህንተ ኡባይ ꬋያናይሳ ታ ሀች ህንተዉ ኦዳይስ። ዮርዳኖሰ ፕንድ ህንተ ላታናዉ ብያ ቢታን ህንተ ላይꬃይ አዱቀና።

19 ታ ህንተ ስንꬃን ደኦነ ሀይቆ፥ አንጆነ ባደꬅ ዎꬅዳይሳስ ሀች ሳሎነ ሳአ ህንተ ቦላ ማርካያና። ህዛ ህንተነ ህንተ ሼሻይ ደኦን ዳና መላ ደኦ ዶርተ። 20 ጎዳ ነ ፆሳ ዶሳ፤ እያ ቃላ ስአ፥ እያዉ ኪተታ፤ እያራ ኦይከታ። ሄሳዳ ሀንኮ፥ ጎዳይ ካሰ ነ ማይዛታስ፥ አብራሃመስ፥ ይሳቃስነ ያይቆባስ እማናዉ ጫቅዳ ቢታን ነነ ነ ሼሻይ አዱሳ ላይꬅ ዳና።