1 ሙሰይ ባ ኦዳ ዉርስዳፐ ጉየ እስራኤለ አሳኮ ሀይሳዳ ያግስ፤ 2 “ሀእ ታዉ ፄታነ ላታሙ ላይꬅ ግድዳ ግሾ፥ ህዛፐ ጉየ ካለꬃናዉ ዳንዳእከ። ጎዳይ ታኮ፥ ‘ነ ዮርዳኖሰ ፕናካ’ ያግስ። 3 ጎዳይ፥ ነ ፆሳይ ነ ስን አꬍድ ነና ካለꬃና። ያን ደእያ ካዎተꬃታ እ ꬋይሳና ግሾ፥ ኤንታ ቢታ ነ ላታና። ጎዳይ ግዳይሳዳ እያሱይ ህንተና ካለꬃና። 4 ጎዳይ አሞረ ካዎታ ስሆናነ ኦገ ፆንድ፥ ኤንታ ቢታ ꬋይስዳይሳዳ ህንተ ሞርከታ ሄሳዳ ኦꬃና። 5 ጎዳይ ኤንታ ህንተዉ አꬅድ እምን፥ ህንተ ኤንታ ቦላ ታ ህንተና ኪትዳይሳዳ ኦꬃና። 6 ምንተ፤ ገንጭተ፤ ያዮፍተ። ኤንታ በእድ ዳጋሞፕተ። ጎዳይ ህንተ ፆሳይ ህንተራ ግዳና፤ እ ህንተና የገና፥ አገና” ያግስ።

7 ሙሰይ እያሱ ፄግድ፥ እስራኤለ አሳ ኡባ ስንꬃን ሀይሳዳ ያግስ፤ “ምና፤ ገንጫ። ነ ሀ አሳራ እስፈ ጎዳይ ኤንታ ማይዛታስ እማና ግድ ጫቅዳ ቢታ ገላሳ፤ ሄ ቢታ ኤንታ ላትሳሳ። 8 ጎዳይ፥ እ ባ ሁጰን ኔራ ግድድ ነና ካለꬃና። እ ነና የገና፤ አገና። ሄሳ ግሾ፥ ያዮፋ፤ ኡፋይስ ቃንፆፋ” ያግስ።

9 ሙሰይ ሀ ህግያ ፃፍድ፥ ጎዳ ቃላ ጫቆ ታቦትያ ቶክያ ካህነ ግድዳ ሌወ ናይታስነ እስራኤለ ጭማታስ እሚስ። 10 ሙሰይ ኤንታኮ፥ “አጮ ኡባይ አቶ ጌተትያ ላፑንꬃ ላይꬃ ዉርሰꬃን፥ ሻቃራ ባለይ ቦንቸትያ ጋላስ፥ ሀ ህግያ ꬎቁ ኦꬅድ ናባብተ። 11 ጎዳ፥ ህንተ ፆሳ ስንꬃን፥ እ ዶርዳ በሳን፥ እያ ጎይናናዉ እስራኤለ አሳ ኡባይ ሺቅያ ዎደ ኤንታዉ ናባብተ። 12 ኤንቲ ኡባይ ስእድ፥ ጎዳ፥ ህንተ ፆሳስ ያሽ ታማራና መላ ሀ ህገ ቃላ ኡባ ናጋና መላ አደታ፥ ማጫሳታ፥ ናይታነ ህንተ ቢታን ደእያ ሀራ ቢታ አሳ እስፈ ሺሽተ። 13 ሀ ህገ ቃላ ኤሮና ኤንታ ናይትካ ዮርዳኖሰ ፕንድ፥ ህንተ ላታናዉ ብያ ቢታን፥ ህንተ ደእያ ላይꬃ ኡባን ሀ ህግያ ስኦ፤ ጎዳስ፥ ህንተ ፆሳስ፥ ያሽ ታማሮ” ያግድ ኪትስ።

14 ጎዳይ ሙሰኮ፥ “ነ ሀይቅያ ዎደይ ማትስ። እ ካለꬃና ዎጋ ታ እያዉ እማና መላ እያሱ ፄጋዳ፥ እያራ እስፈ ዱንካንያ ፐንገ ሺቅተ” ያግን፥ ሙሰይነ እያሱይ ዱንካንያ ፐንግያኮ ሺቅዶሶና።

15 ጎዳይ ዱንካንያ ፐንገን ኤቅዳ ሻራ ቱሳን ኤንታዉ ቆንጭስ።

16 ጎዳይ ሙሰኮ፥ “ኔኒ ማታ ዎደ ሀይቃዳ ነ አዋታን ጋሄታሳ። ኔፐ ጉየ፥ ሀ አሳይ ታዉ አማነቶናይሳታ ግዳና፤ ታ ኤንታራ ገልዳ ጫቁዋ መንꬃና። ኤንቲ ታና አግድ፥ ባንታ ላትያ ቢታን ደእያ ኤቃታ ካላና። 17 ሄስ ሀንያ ዎደ ታ ሀንቆይ ኤንታ ቦላ ኤፃና፤ ታ ኤንታ አጋጋና፤ ታ ሶምኡዋ ኤንታፈ ሀራ ሶ ዛራና። ኤንቲ ꬋያና፤ ኢታ መቶይነ ꬋዮይ ኤንታ ቦላ ያና። ሄ ዎደ ኤንቲ፥ ‘ቱማ ሀ መቶይ ኑና ጋክዳይ ኑ ፆሳይ ኑ ግዶን ባይና ግሾ ግደኔ?’ ያጋና። 18 ሀራ ፆሳታ ጎይንድ፥ ኤንቲ ኦꬅዳ ኢታ ኦሱዋ ግሾ፥ ታ ሄ ጋላስ ታ ሶምኡዋ ኤንታፈ ሀራ ሶ ዛራና።

19 “ሀእ ሀ ማዝሙርያ ፃፋዳ፥ እስራኤለ አሳ ኡባ ታማርሳ። ሀ ማዝሙረይ ታዉ እስራኤለ አሳ ቦላ ማርካ ግዳና መላ ኤንታ የፅሳ። 20 ኤንታ ማይዛታስ ገልዳ ቃላዳ፥ ማꬅነ ኤስ ጎግያ ቢታ ታ ኤንታ ገልሳ ስምን፥ ኤንቲ ም ካልድ ጎብዳፐ ጉየ፥ ሀራ ፆሳታ ጎይንድ፥ ታና ካꬋና፤ ታ ጫቁዋ መንꬃና። 21 ዳሮ መቶይነ ꬋዮይ ኤንታ ቦላ ጋክዳ ዎደ ሀ ማዝሙረይ ኤንታ ናይታፐ ባለቶና ግሾ፥ ኤንታ ቦላ ማርካ ግዳና። ታኒ ጫቅዳ ቢታ ኤንታ ቡሮ ገልሶና ደእሽን፥ ሃራ ኤንቲ ቆፕያ ቆፋ ታኒ ኤራይስ” ያግስ። 22 ሙሰይ ሄ ጋላስ ማዝሙርያ ፃፍድ፥ እስራኤለ አሳ ታማርስስ።

23 ሄሳፈ ጉየ፥ ጎዳይ ናወ ናኣ እያሱኮ፥ “ምና፥ ገንጫ፤ ታ ኤንታዉ እማናዉ ቃላ ገልዳ ቢታ እስራኤለ አሳ ኤፋዳ ገልሳ። ታ ኔራ ግዳና” ያግስ።

24 ሙሰይ ሀ ህገታ ኮይሮፐ ዉርሰꬅ ጋካናዉ ፃፍድ ዉርስዳፐ ጉየ፥ 25 ጎዳ፥ ቃላ ጫቆ ታቦትያ ቶክያ ሌወታ ሀይሳዳ ያግድ ኪትስ፤ 26 “ጎዳ ህገይ ፃፈትዳ ሀ ማፃፋ ኤፍድ፥ ጎዳ፥ ህንተ ፆሳ ቃላ ጫቆ ታቦትያ ማታን ዎꬅተ። ያን እ ህንተ ቦላ ማርካ ግዳና። 27 ህንተ አይ መላ ጌለኮነ ዎዛና ኢተኮ ታ ኤራይስ። ቱማ፥ ታ ህንተራ ደእዳ ላይꬃ ኡባን ህንተ ጎዳስ ማካላታ፥ ሽን ታ ሀይቅን፥ ኡባ ዋንድ ማካላንደቲ? 28 ሄሳ ግሾ፥ ሀይሳ ኡባ ታ ኤንታዉ ኦዳናዉነ ሳሎነ ሳአ ታ ኤንታ ቦላ ማርካያናዉ ህንተ ኮቻ ሀላቃታነ ደርያ ካለꬅያ አሳ ኡባ ታዉ ሺሽተ። 29 ታ ሀይቅዳፐ ጉየ፥ ህንተ ቱማ ኢታ አሰ ግዳናይሳነ ታኒ ህንተና ታማርስዳ ኪታፐ ሀራ ሶ ስማናይሳ ታኒ ኤራይስ። ህንተ እያ ስንꬃን ኢታባ ኦꬅድ፥ ጎዳ ይሎይያ ግሾ፥ ዎደፐ እ ህንተ ቦላ ኢታ ጋዶ ኤሀና” ያግስ።

30 ሄሳፈ ጉየ፥ ሙሰይ ሀ ማዝሙረ ቃላታ ዉራና ጋካናዉ ሺቅዳ እስራኤለ ማባራ ኡባ ናባብድ ስስስ።