32
1 ሳሎቶ፥ ታኒ ኦደይሳ ስእተ፤
ቢታይ ታ ዶና ቃላ ሀይዞ።
2 ታ ትምርተይ እራ መላ ቡኮ፤
ታ ቃላይ አካዳ ዎꬎ።
ማታ ቦላ ዎꬍያ ፃሳዳ
ዶላ ቦላ ዎꬍያ ፑሰዳ ዎꬎ።
3 ታኒ ጎዳ ሱንꬃ አዋጃና፤
ግታተꬃ ኑ ፆሳስ እምተ።
4 እ ኑ ዛላ፤ እያ ኦሶይ ፖሎ፤
እያ ኦገይ ሱረ።
ፆሳይ አማንይሳ፤ ዎርዶይ ባይናይሳ፤
እ ቱማንቾነ ሱረ።
5 እያ ስንꬃን ባንታ ቱናተꬃ በስዶሶና፤
ኤንቲ እያ ናአ ግዶኮና፤
ኤንቲ ኢታነ ጌላ የለተꬅ።
6 ህንተኖ፥ ኤያነ አኬክ ባይና አሳዉ፥
ህንተ ጎዳስ እምያ ዛሮይ ሀይሴ?
እ ህንተና መꬍዳ ህንተ አዋ ግደኔ?
ህንተና መꬍድ ምንꬅ ኤስዳይ እያ ግደኔ?
7 በን ዎድያ ቆፓ፤
አꬍዳ የለተꬃ አኬካ።
ነ አዋ ኦይቻ፤ እ ነዉ ኦዳና፤
ጭማታ ኦይቻ፤ ኤንቲ ነዉ ቆንጭሳና።
8 ኡባፈ ዎልቃማይ ካዎተꬃታስ
ኤንታ ላታ ሻክዳ ዎደ፥
አሳ ዘረꬅካ ዱማይዳ ዎደ፥
እስራኤለ አሳ ታይቡዋ መላ፥
አሳስ ኤንታ ዛዋ ኤስስ።
9 ጎዳ ጋክዳ ግሾይ እስራኤለ፤
ያይቆብ እያ ጋክዳ ላታ።
10 እ ኤንታ መላ ቢታን፥
አይኮይ ባይና መላ ቢታን፥
ጫርኮይ ባቅሽን ደምስ።
እያዉ ጎንዳለ ግድስ፥ እያ ናግስ፤
ባ አይፈ ናኤዳ ምንꬅድ ናግስ።
11 አርጋንꬅ ባ ናአ ፓሎ ታማርሰይሳዳ፥
ባ ምጭዳ ቀፍያን ጋክድ አሸይሳዳ፥
ጎዳይ ባ ቀፍያን ሀጵድ ኤንታ አሽስ።
12 ጎዳይ ባ ፃላላ ኤንታ ካለꬅስ፤
ሀራ አላጋ ፆሲ እያራ ባዋ።
13 እ ቢታስ ꬎቃ በሳ ኤንታ ከስስ፤
ጎሻ አይፍያ ኤንታ ሙዝስ።
ዛላ ቆጶፐ ኤንታ ኤስ ካልስስ፤
ሹቻ ቢታፈ በንትያ ዛይተ ኡሽስ።
14 ኤንታ መህያፐ ቄሳ ማꬅ፥
ዶርሳፈነ ዴሻፐ ፃማታ ማꬅ፥
ሞꬎ ዶርሰነ ዴሻ አሾ ምዶሶና።
ባሳነ ዶርሳነ ዴሻ አሹዋ፥
ሎኦ ግስተ ኡይꬃራ ምዶሶና፤
ሱꬅ ዳንያ ዎይነ ኡሻ ኡይዶሶና።
15 ሽን እስራኤለይ ኦርድስ፤ ማካልስ፤
ምድ ካልድ ሞሎትስ።
ባና መꬍዳ ፆሳ አግስ፤
ባ አቶተꬃ ዛላ ካዉሽስ።
16 ኤንቲ አላጋ ፆሳታ ጎይንድ፥
እያ ቃናትስዶሶና።
እፀትዳ ባንታ ኤቃታን
እያ ሀንቀꬅዶሶና።
17 ፆሰ ግዶናይሳታስ፥
ካሰ ኤንቲ ኤሮና ፆሳታስ፥
ዝነ ደንድዳይሳታስ፥
ኤንታ አዋት ጎይንቦና
ፆሳታስ ያርሽዶሶና።
18 ኤንታዉ ደኦ እምያ ዛላ ዶግዶሶና፤
የልድ ድችዳ ፆሳ አግዶሶና።
19 አደ ናይትነ ማጫ ናይት እያ ይሎይዶሶና፤
ጎዳይ ሄሳ በእድ ኤንታ ካꬍስ።
20 እ፥ “ኤንቲ ጌላነ አማነቶና ደረ ግድያ ግሾ፥
ታኒ ታ ሶምኡዋ ኤንታፈ ገንꬃና፤
ኤንታ ዉርሰꬃ ስእ ጋዳ በአና” ያግስ።
21 ፆሰ ግዶናይሳታን ታና ቃናትስዶሶና፤
ባንታ ኤቃታን ታና ይሎይዶሶና።
ታኒ ኤንታ ካትዳ አሳን ቃናትሳና፤
ኤያ አሳን ኤንታ ይሎያና።
22 ታ ሀንቆይ ታማዳ ኤፃና፤
ስኦለ ጋካናዉ ፁጋና።
ቢታን ደእያባ ኡባ ማና፥
ደርያ ባሱዋ ጋካናዉ ፁጋና።
23 “ታኒ ኤንታ ቦላ መቶ ዶራና፤
ታ ዶንግያን ኤንታ ዱካና።
24 ታ ኤንታ ቦላ ኢታ ኮሻ የዳና፤
ኤንቲ ሀርገንነ ጋዶን ዉራና።
ኤንታ ቦላ ኢታ ባዞ ዶአታነ
ዱክድ ዎꬍያ ኢታ ሾሻታ የዳና።
25 ኤንታ፥ ማሽ ኦገ ቦላ ዉርሳና፤
ኬꬃ ጋርሳን ዳጋም ካዎታና።
ናአተꬃ አደትነ ማጫት ዉራና፤
ጉꬃ ናይትነ ጭማት አቶኮና።
26 ታ ኤንታ ꬋይሳናዉነ
ኤንታ ሀሳይያ አስ
ዶና መላ ኦꬃናዉ ቆፓስ።
27 ሽን ኤንታ ሞርከት፥ ‘ፆንዳይ ኑና፤
ሀ ኡባ ኦꬅዳይ ጎዳ ግደና፤
ያግድ ኦቶሮን ጬቀቶና መላ ጋዳ አጋጋስ’ ” ያግስ።
28 እስራኤለ አሳይ ዎዛን ባይና አስ፤
ኤንቲ አኬኮኮና።
29 ኤንቲ ጭንጭድ አኬክዳኮ ሀይሳ ኤራና፥
ባንታ ዉርሰꬃካ ሻካናሽን።
30 ጎዳይ ኤንታ ፆሳይ ኤንታ ባይዞናኮ፥
ኤንታ መꬍዳ ዎልቃማይ አꬅድ እሞናኮ፥
ዋትድ እስ አስ ሙኩሉ አሳ፥
ኑምኡ አስ ታሙ ሙኩሉ አሳ ፆኒ?
31 ኑ ዛላይ ኑ ሞርከታ ዛላ መላ
ግዶናይሳ ኤንቲ ኤሮሶና።
32 ኤንታ ዎይነይ ሶዶመ ዎይንያፐ ዬስ፥
ኤንቲ ጋሞራ ጎሻን ዶልዶሶና፤
አይፍያን ማርዘይነ ጫሞይ ኩምስ።
33 ኤንታ ዎይነይ ሾሻ ማርዘ፤
ዎꬍያ ሶጎ።
34 ጎዳይ፥ “ታ ሄሳ ዶጋድና?
ታ ማዝጋበን ፃፋብክና?
35 ኤንታዉ ꬋዮ ጋላስ ማትስ፤
ኤንታ ቦላ ጋካናባይ ኤለሴስ።
ሄ ዎደ ኤንታ ቶሆይ ꬉበታና፤
ታ ሀሎ ከያናነ ኩሸ ዛራና።”
36 ኤንታ ዎልቃይ ዉርዳይሳነ
ኤንታ ማድያ አስ ባይናይሳ በእዳ ዎደ፥
ጎዳይ ባ አሳስ ፕርዳና፤ ባ አይለታስ ቃታና።
37 ፆሳይ ኤንታኮ፥ “ኤንቲ አማነትያ ኤንታ ፆሳት አዉኔ?
ኤንቲ ባቃትድ ቆሰትያ ኤንታ ዛላይ አዉኔ?” ያጋና።
38 ኤንታ ሞꬎ ያርሹዋ ምዳይሳት፥
ኤንታ ዎይነ ኡሻ ያርሹዋ ኡይዳይሳት፥
ሀእ ደንድድ ኤንታ ማዶ፤ ኤንታ አሾ።
39 “ቱማ፥ ጎድ ታና፤ ፆሲ ታ ፃላላ፤
ታፐ አትሽን፥ ሀራ ፆሲ ባዋ።
ዎይነ ፓይ ታና፤
ታ ማዱንፅሳይስ፤ ታ ፓꬃይስ፤
ታ ኩሸፐ ኦንካ አሸና።
40 ታ ኩሽያ ደንꬃዳ ሀይሳዳ ያጋና፤
ታኒ መርናዉ ደኦ፤
41 ጶልያ ታ ማሻ ሌፋዳ፥
ፕርዳናዉ ታ ኩሸን ኦይክያ ዎደ፥
ታ ሞርከታ ቦላ ታ ሀሎ ከያና፤
ታና እፀይሳታስ ኩሸ ዛራና።
42 ታ ዶንገይ ኤንታ ሱꬃን ማꬆታና፤
ታ ማሻይ ኤንታ አሹዋ ማና።
ታና እፅያ ኡባ ማርከ፤
ማዱንፅዳይሳትነ ድኤትዳይሳት ሀይቃና።”
43 ካዎተꬃቶ፥ ጎዳ አሳራ ኡፋይትተ፤
እ ባ አይለታ ሱꬃ አጫና።
ባ ሞርከታ ቦላ ሀሎ ከያና፤
ቢታን ደእያ ባ አሳ ናጋራ አቶ ጋና።
44 ሙሰይነ ናወ ናአይ እያሱይ እስራኤለ አሳ ሺሽድ፥ ሀ ማዝሙርያ ኡባ አሳይ ስእሽን የፅዶሶና።
45 ሙሰይ ሀ ቃላ ኡባ እስራኤለ አሳስ ኦድ ዉርስዳፐ ጉየ፥ 46 ኤንታኮ፥ “ሀ ህገ ቃላ ኡባ ህንተ ናይት ናጋና መላነ ኪተታና መላ ሀች ታ ህንተዉ ማርካ ኦꬃዳ እምያ ቃላ ኡባ ህንተ ዎዛናን ዎꬅተ። 47 ሀ ቃላይ ህንተዉ ደኦፐ አትሽን፥ ጮ ቃላ ግደና። ህንተ ሀ ቃላ ናግኮ፥ ዮርዳኖሰ ፕንድ ላታና ቢታን አዱሳ ላይꬅ ዳና” ያግስ።
48 ሄ ጋላስ ጎዳይ ሙሰ ሀይሳዳ ያግስ፤ 49 “ሞአበን፥ እያርኮ ካታማፐ ስንꬃ ባጋራ ደእያ አባሪማ ዙማታፐ እሱዋ ግድዳ ናቦ ዙማ ቦላ ከያ፤ ያን እስራኤለ አሳ ታ ላትሳና፥ ካናነ ቢታ ሃሆን ፄላ። 50 ነ እሻ አሮን ሆራ ዙማ ቦላ ሀይቅድ፥ ባ ማይዛታ ጋክዳይሳዳ ነካ ሀ ዙማ ቦላ ሀይቃዳ ነ ማይዛታ ጋካና። 51 ህንተ ናምአይ እስራኤለ አሳ ስንꬃን ታዉ አማነትበከታ። ሲና መላ ቢታን፥ ቃደሳ ማታን ደእያ ማርባ ሃꬃ ማታን ታ ጌሻተꬃ እስራኤለ አሳ በስበከታ። 52 ሄሳ ግሾ፥ ኔኒ ሄ ቢታ ሃሆን ፄላናፐ አትሽን፥ ታ እስራኤለ አሳ ላትሳና ቢታ ገላካ” ያግስ።