ጌሻ ማፃፋ ዛረꬆ ማፃፋ 33

ሙሰይ እስራኤለ ኮቻ አንጅስ

1 ፆሳ አስ ግድዳ ሙሰይ ሀይቃናፐ ስን፥ እስራኤለ አሳ አንጅዳ አንጆ ቃላይ ሀይሳ።

2 ሙሰይ፥ “ጎዳይ ሲና ዙማፐ ይስ፤

ሳይረ ዙማፐ ኑ ቦላ ፖእስ።

ፓራና ዙማፐ ጶልስ።

ሙኩላን ታይበትያ ኪታንቾት እያራ ደኦሶና፤

እያ ኡሻቻን ታማ ላጮይ ደኤስ።

3 ጎዳዉ ኔኒ ነ አሳ ዶሳዳሳ፤

ጌሻት ኡባይ ነ ኩሸን ደኦሶና።

ነ ቶሁዋ ጋርሳን ኡባይ ጉልባትድ ጎይኖሶና፤

ኔፐ ኪታ ኤኮሶና።

4 ሙሰይ እምዳ ህግያ

እስራኤለ አሳ ላታ ኤኮሶና።

5 እስራኤለ ዘረꬃት ደርያ ሀላቃታራ ሺቅዳ ዎደ፥

ጎዳይ ባ አሳ፥ እስራኤለ ቦላ ካዎትስ።

6 “ሮቤላ ኮቻይ ታይቦን ጉꬃ ግድኮካ፥

እ ሀይቆፎ፤ ፓፃ ደኦ።”

7 ሙሰይ ይሁዳ ኮቻባ፥

“ጎዳዉ፥ ይሁዳ ዋሱዋ ስአ፤

ሀንኮ እያ ያራታራ እያ ቡአ።

ኤንታ ኩሽያ ምንꬃ፤

ኤንቲ ባንታ ሞርከታራ ኦለትያ ዎደ

ኤንታ ማዳ።

8 ሙሰይ ሌወ ኮቻባ፥

ነ ቱሚመይነ ኡሪመይ፥

ኔኒ ማሳሀን ፓጭዳነ ማርባን ፓላምዳ፥

ነ ጌሻ አሳሳ።

9 ባንታና የልዳይሳታፐ፥

ባንታ እሻታፐነ ባንታ ናይታፐ አꬅድ፥

ኤንቲ ነዉ አማነትዶሶና፤

ነ ጫቆ ቃላ ናግዶሶና።

10 ኤንቲ ነ ዎጋ ያይቆባ፥

ነ ህግያ እስራኤለ ታማርሶሶና።

ኤንቲ ነ ስንꬃን እፃነ ጩይሶሶና፤

ያርሾ በሳን ፁሳ ያርሾ ያርሾሶና።

11 አቤት ጎዳዉ፥ ሌወታ አንጃ፤

ኤንታ ኩሸ ኦሱዋን ነ ኡፋይታ።

ኤንታ ቦላ ደንድያ ሞርከታ መንረꬃ

ዛር ደንዶና መላ ኤንታ ሞርከታ ጫዳ።”

12 ብንያመ ኮቻባ፥

“ጎዳን ዶሰትዳይ እያን አማነትድ ደኤስ፤

ቃማ ጋላስ እ ኤንታ ናጌስ፤

ባ ሀሽያን ቶክድ ሸምፕሴስ።”

13 ዮሰፋ ኮቻባ፥

“ጎዳይ፥ ሳሎፐ እራን፥

ሳአፐ ፑልቶ ሃꬃን

ኤንታ ቢታ አንጆ።

14 አዋን ካፅድ ዶረትዳ አይፈንነ

ዎደን ዎደን ካፅያ አይፈን አንጀቶ።

15 በንፐ ደእያ ደረትነ

ዙማት ሎኦ አይፈን አንጀቶ።

16 ኤንታ ቢታይ ሎኦባይ ኩምዳ ቢታ ግዶ፤

ቱሽያ ግዶን ኤፅያ ታማን ቆንጭዳ ጎዳይ እያ አንጆ።

ሀ አንጆት ኡባይ ዮሰፋ ኮቻ ጋኮ፤

እ ባ እሻታ ግዶን ሀላቃ ግዶ።

17 ዮሰፍ ኮይሮ የለትዳ ኮርማዳ ምኖ፤

እያ ካጨት መንꬃ ካጨዳ ምኖ።

እያ ካጨት ታሙ ሙኩሉን ታይበትያ ኤፍሬማ ኮቻታ፤

ሙኩላን ታይበትያ ምናሰ ኮቻታ።

ሄ ካጨታን እ ካዎተꬃታ ቃይጫና፤

ቢታ ጋፃ ጋካናዉ እ ኤንታ ሱጋና።”

18 ዛብሎና ኮቻባ፥

“ዛብሎና፥ ኔኒ ነ ከሳን ኡፋይታ፤

ይሳኮራ፥ ኔኒ ነ ዱንካንያን ኡፋይታ።

19 ኤንቲ አሳ ባንታ ዙማኮ ፄጋና፤

ያን ኤንቲ ጌሻተꬃ ያርሾ ያርሻና።

ባንታ አቁዋነ ባንታ ዱረተꬃ፥

አባፈነ አባ ጋፃን ደእያ ሻፍያፐ ደማና” ያግስ።

20 ጋደ ኮቻባ፥

“ኤንታ ቢታ ዳልግስዳ ጎዳይ ጋላተቶ፤

ጋድ ሞርከ ሶምኦ ዎይኮ ቀሰ መንꬃናዉ፥

ጋሞዳ ናጌስ።

21 ኤንቲ ሎኦ ቢታ ባንታዉ ዶርዶሶና፤

ሀላቃታስ ግዳ ቢታ ኤንቲ ኤክዶሶና።

እስራኤለ ሀላቃት ሺቅዳ ዎደ፥

ጎዳ ጌሻ ሸንያ ሻክድ ኤርዶሶና

እስራኤለስ ሱረ ፕርዳ ፕርድዶሶና” ያግስ።

22 ዳነ ኮቻባ፥

“ዳነይ ዎዳላ ጋሞ መላ፤

እ ባሳነፐ ጉፕድ ከያና” ያግስ።

23 ንፍታለመ ኮቻባ፥

“ንፍታለመይ ጎዳ አꬎ ኬሀተꬃን፥

እያ አንጁዋን ዱረትስ፤

ኤንታ ቢታይ አባፈ ዱገሀ ባጋ ጋኬስ” ያግስ።

24 አሴራ ኮቻባ፥

“አሴር ሀራ ኮቻታፐ አꬍድ አንጀትዳይሳ፤

ባ እሻታን ዶሰትዳይሳ ግዶ፤

እያ ቢታይ ሻማሆ ዛይተን ዱረቶ።

25 እያ ካታማት ብራታ ፐንገን ጎርደትድ ናገቶ፤

ባ ላይꬃ ኡባን እ ዎልቃማ ግዶ።

26 እስራኤለ፥ ሳሎፐ ነና ማዳናዉ፥

ባ ግታተꬃን ሻራ ቦላ ሄመትያ፥

ነ ፆሳ መላ ፆሲ ኦኔ?

27 መርና ፆሳይ ነ ደእያ በሲ፤

እያ መርና ኩሸት ኔፐ ጋርሳራ ደኦሶና።

እ ነ ሞርከታ ነ ስንꬃፈ ከስድ፥

‘ኤንታ ꬋይሳ’ ያግስ።

28 ሄሳ ግሾ፥ እስራኤለ ኮቻይ፥

ሳሎ እራይ ቡክያ በሳን፥

ካꬅነ ዎይነይ ኩምዳ ቢታን፥

ህርግ ባይና ሳሮ ዳና።

29 እስራኤለ፥ ነ አንጀታዳይሳ፤

ጎዳይ አሽዳ ነ መል ኦኔ?

እ ነዉ ጎንዳለነ ማድያ ማሻ፤

ነ ሞርከት ነ ስንꬃን ጉፋናና፤

ነ ኤንታ ባሱዋ ላላና” ያግስ።