1 ሙሰይ ሞአበ ደምባፈ ደንድድ፥ ናቦ ዙማ ሁጵያ፥ ቃስ እያርኮፈ ዶሎሀ ባጋራ ደእያ ፕስጋ ዙማ ሁጵያ ጋክስ። ያን ጎዳይ ዳነ ጋካናዉ ደእያ ጋላዳ ቢታ፥ 2 ንፍታለመ ቢታ ኡባ፥ ኤፍሬመነ ምናሰ ቢታ፥ ዉሎሀ ባጋራ ብድ መደትራነ አባ ጋካናዉ ደእያ ይሁዳ ቢታነ 3 ዱገሀ ባጋራ ዞኣረፐ ደንድድ፥ ዛምብ ደእያ እያርኮ ካታማ፥ ዛንጋራን ደእያ ደምባ ኡባ በስስ። 4 ጎዳይ ሙሰኮ፥ “ታኒ ህንተ ሼሻስ እማና ጋዳ አብራሃመስ፥ ይሳቃስነ ያይቆባስ፥ ጫቅዳ ቢታይ ሀይሳ። ሀእ ኔኒ ነ አይፈን በአና መላ ኦꬃስ፥ ሽን ኔኒ ያ ፕናካ” ያግስ።

5 ጎዳ አይለይ፥ ሙሰይ፥ ጎዳይ ግዳይሳዳ፥ ያን ሞአበ ቢታን ሀይቅስ። 6 ጎዳይ ቤት-ፓኦራ ካታማፐ ስንꬃ ባጋን ሞአበ ዛንጋራን እያ ሞግስ። ሽን ሀች ጋካናዉ እ ሞገትዳ ዱፉዋ ኤርያ አስ ባዋ። 7 ሙሰይ ሀይቅያ ዎደ እያዉ ላይꬅ ፄታነ ላታማ፤ ሽን እያ አይፈይ እፅቤና፤ እያ ዎልቃይ ዳቡርቤና። 8 እስራኤለ አሳይ ሞአበ ደንባን ሀስታሙ ጋላስ ሙሰስ ዬክዶሶና። ሄሳፈ ጉየ፥ ባለይ ደንድን፥ ዬሆ ዎደይ ዉርስ።

9 ሙሰይ፥ ባ በሳን ኦꬃና መላ፥ እያ ቦላ ባ ኩሽያ ዎꬅዳ ግሾ፥ ናወ ናአይ እያሱይ ጭንጫተꬃ አያናን ኩምስ። እስራኤለ አሳይ እያሱስ ኪተትዶሶና፤ ጎዳይ ሙሰ ባጋራ እምዳ ኪታ ናግዶሶና።

10 ጎዳ ሶምኦን ኦድስዳ፥ ሙሰ መላ ናበይ፥ እስራኤለ ቢታን ደንድቤና። 11 ጎዳይ ሙሰ ግብፀ ካዋኮ፥ እያራ ኦꬅያ ሞርናታኮነ ኩመꬃ አሳኮ የድድ፥ እያ ባጋራ ማላታታነ ማላልስያባታ ኡባ ኦꬅዳ፥ ሙሰ መላ ሀራ ናበይ ኦንካ ባዋ። 12 እስራኤለ ኡባ ስንꬃን ግታ ዎልቃን ማላልስያባ ኦꬅዳ፥ ሙሰ መላ አስ ኦንካ ባዋ።