1 ሳሎፐ ጋርሳን አሳ ቦላ ጋክያ ዳሮ ኢታባ ታኒ በአስ። 2 ፆሲ አሳስ ሻሎ፥ ዱረተꬅነ ቦንቾ እሜስ፤ እያዉ ኮሽያባፐ እስባካ ፓጭሰና። ሽን እያዉ እመትዳ ሻሉዋንነ ዱረተꬃን ኡፋይታና መላ ኩመꬃ ማታ እመና። ሄሳ ፃላላ ግዶናሽን እ ዳቡርድ ደምዳባን ሀር ኡፋይታና መላ ኦꬄስ፤ ሄስካ ሀዳነ አዛንꬅያ ኢታባ።

3 እስ አስ ፄቱ ናአ የልድ፥ አዱሳ ላይꬅ ደእድ ጭማናዉ ዳንዳኤስ። ሽን እ ባዉ እመትዳባን ኡፋይቶናነ ዉርሰꬃን ቦንቾን ሞገቶና አትኮ እያፐ ቦሽ ሎኦ ጋይስ። 4 ሄ ቦሻይ ጮ የለትድ ኦንካ ሀሳዮና ꬉማ ብያ ግሾ እያ ሱንꬃይ ꬉማን ካመትድ አቴስ። 5 እ፥ አዋ ፖኦ በኦና ዎይኮ አይብባካ ኤሮና አትኮካ ሄ ኡራፐ አꬍድ እያዉ ሸምፖይ ደኤስ። 6 ሄሳ ግሾ፥ ኡፋይስ ባይና ናምኡ ሙኩሉ ላይꬅ ደእያ አሳፐ ሄ ቦሻ ቃዳይ ሎኦ። ዉርሰꬃን ናምአይ እስ በሲ ቦሶና።

7 አስ ዳቡርድ ኦꬅያ ኡባይ ባዉ ምያባ ደማናሳ፤ ሽን እያ አሞይ አል ኤረና። 8 ያትን፥ ጭንጫ አስ ኤያ አሳፐ አይብን ዱማቲ? ማንቆይ ዳሮ ጭንጭድ፥ ሀራታ ስንꬃን ዋንድ ዳነኮ ኤሮይ እያ አይ ማዲ? 9 አሞን ፁገታናፐ አይፈን በኦይ ሎኦ፤ *አይፈን በኦይ ሎኦ፦ አስ አሞን ፁገትሸ ዳናፐ ባዉ ደእያባን አልድ ደኦ ጉሱ። ሄስካ ጫርኮ ኦይካናዉ ካሎ መላ ሀዳ።

10 ሀንያባ ኡባይ ኮይሮትድ ኤረትድ ደኤስ። እስ እስ አስ ዋናናዉ ደእያኮ አዱሳ ዎደፐ ካሰ ኤረትድ ኡትስ። አይ አስካ ባፐ ምነይሳራ ባፀታናዉ ዳንዳኤና። 11 ኦድ ዳርያ ዎደ ሀዳባይ ዳሬስ፤ ያትን ሄስ አሰ አይ ማዲ?

12 ሀዳ ግድድ ኩያዳ ጮ አꬍያ ባ ጉꬃ ላይꬃ አስ ዋትድ አꬃናዉ ኮሽያኮ ኤረይ ኦኔ? አስ ሀይቅድ አግን ሳሎፐ ጋርሳን ሀናናዉ ደእያባ አሳስ ኦዳናዉ ዳንዳኤይ ኦኔ?