1 ፆሳ ኬꬅ ገልያ ዎደ አኬካዳ ታንጋ። ኤንቲ ባንታ ኢታ ኦሱዋ ኤሮና ግሾ፥ ስአናዉ ሺቆይ ኤያታ ያርሹዋፈ አꬌስ። 2 ኦደታናዉ ኤሶቶፓ፤ ፆሳ ስንꬃን ኦደታናዉ ነ ዎዛናን ድርጎፋ። ፆሳይ ሳሎና፥ ኔኒ ሳአና፤ ሄሳ ግሾ፥ ነ ቃላይ ጉꬃ ግዶ። 3 ቆፍ ዳርያ ዎደ አሙሆይ ዳሬስ፤ ኦዳ ዳሮይ ኤያተꬅ ቆንጭሴስ። 4 ፆሳስ ገፕዳባ ፖላናዉ ጋምኦፋ፤ ኤያታን ፆሳይ ኡፋይተና። ሄሳ ግሾ፥ ኔኒ ገፕዳባ ኡባ ፖላ። 5 እስባ ገፕድ ፖሎና አጋናፐ ኮይሮ ገፖና አጎይ ሎኦ። 6 ናጋራን ነና ገልሶና መላ ነ እንፃርሳ የዳ ኦꬆፋ። ፆሳ ኬꬃን ኦይሳኮ፥ “ኮይሮ ሀይሳ ታኒ አኬኮና ገፓስ” ጎፓ። ሄስ ፆሳ ዳሮ ሀንቀꬅያ ግሾ፥ ነ ኩሸ ኦሶ ኡባ እ ባ ሀንቁዋን ꬋይሳናዉ ዳንዳኤስ። 7 ዳሮ አሙሆይነ ዳሮ ኦድ ሀዳ። ሄሳ ግሾ፥ ፆሳ ያያ።

8 እስ ቢታን ማንቆት ናቀትሽን፥ ፕርድ ጌላትሽን ኔኒ በእኮ ማላለቶፋ። እስ እስ ሀላቃስ እያፐ ቦላራ ሹመትድ እያ ፄልያ ሀራ ሀላቅ ደኤስ። ቃስ ኤንታፈ ቦላራ ሹመትድ ኤንታ ፄልያ ሀራ ሀላቃት ደኦሶና። 9 ቢታፈ በንትያ ዎይ ኡባሳ፤ ሀር አቶሽን፥ ካዎይካ ጎሻፈ ጎኤቴስ።

10 ብራ ዶስያ ኡራስ ብር ግድ ኤረና፤ ዱረተꬅ ሲቅያ ኡራይ ሚሸ ካል ኤረና፤ ሄ ኡባይ ሀዳ። 11 ዱረተꬅ ዳርያ ዎደ ምያ አስ ዳሬስ። ባ ሻሉዋ ጮ አይፈን ፄልድ፥ “ታኒ ዱረ” ጋናፐ ሀራባ አይ ማዲ?

12 ኦሶ ኦꬅያ አስ ጉꬁ ምን ዳሮ ምን፥ ሳሮ ꬍስኮ ꬍስኬስ፤ ሽን ዱረይ ባ ዱረተꬃስ ኡባ ዎደ ኡንኤትያ ግሾ ꬍስኮ ꬋይድ ደኤስ።

13 ሳሎፐ ጋርሳን ዳሮ አዛንꬅያባ ሀራባ ታኒ በአስ። ሄስካ ኢታ ዎደ ባና አሾ ግድ ምንጅዳ ሻሎ፥ 14 ዎይኮ እስ ኢታባይ ጋክን ꬋይዳ ዱረተꬅ። እ ናአ የልዳባ ግድኮካ ናኣ ላትስያባ ꬋይድ መላ አቴስ። 15 አስ ኡባይ ካሎ የለትዳይሳዳ መላ ኩሸ ስሚድ ባና። አይ መላ እ ዳቡርድ ኦꬅኮካ ኤክድ ብያባይ ባዋ።

16 አስ ካሎ የለትድ ካሎ ጉየ ስመይስ ዳሮ አዛንꬅያ ኢታባ። እያ ዳቡራ ኡባይ ጫርኮ ኦይክያባዳ ሀዳ ግድኮ እያ አይ ማዲ? 17 እ ባ ላይꬃ ኡባ ꬉማ ደኦን፥ አዛኖን፥ ዬላን፥ ሀርገንነ ይሎን ዉርሴስ።

18 ህዛ፥ ታኒ አኬክዳ እስ ሎኦባይ፥ ሳሎፐ ጋርሳን ፆሲ አሳስ እምዳ ቃንꬃ ላይꬃን፥ አስ ባ ዳቡራፐ ምድ ኡይድ ኡፋይተይስ ሎኦነ በሲያባ፤ እያ ቃዳይ ሄሳ። 19 ፆሲ አሳስ ዱረተꬅነ ሻሎ እመይ፥ ባ ዳቡራ ጋትያ ደምድ፥ ምድ ኡይድ ኡፋይታና መላሳ፤ ሄስካ ፆሳፈ እያዉ እመትዳ እሞታ። 20 ፆሲ እያ ዎዛናን ኡባ ዎደ ኡፋይስ ኩንꬅያ ግሾ እ ባ ደኦ ላይꬃባ ዳሮ ቆፐና።