1 ታኒ ዛራዳ፥ ሳሎፐ ጋርሳን አይ መላ ናቆይ ደእያኮ በአስ። ናቀተይሳት ምንꬆ ꬋይድ ዬኮሶና። ናቀይሳታ ኩሸን ማት ደእያ ግሾ ናቀተይሳታ ማደይ ባዋ። 2 ታኒ፥ “ሀእ ፓፃ ደኤይሳታፐ ካሰ ሀይቅዳይሳት ሎኦ” ያጋስ። 3 ግዶሽን፥ ሀ ናምአታፐ አꬍድ የለትቦናይሳታነ ሳሎፐ ጋርሳን ኦሰትያ ናቁዋ በኦናይሳታ ቃዳይ ሎኦ።

4 አሳ ዳቡርነ አሞትዳባ ደሞይ፥ አሳስ ባ ላግያ ቦላ ደእያ ቃናተፐ ፑልተይሳ በአስ። ሄስካ ሀዳ፤ ጫርኮ ኦይካናዉ ካሎ መላ። 5 ባ ኩሸ እድምድ ኡትያ አዛላይ ኮሻን ሀይቄስ። 6 ዳቡራንነ ጫርኮ ካሎን ደምያ ዳኮባፐ ዎፓን ደምያ እስ ኩሸይ ሎኦ።

7 ሳሎፐ ጋርሳን ሀዳ ግድዳባ ሀራባ በአስ። 8 ሄስካ ናእ ዎይኮ እሽ ባይና እስ ብዛ አደይ ደኤስ። ሽን እያ ዳቡራስ ዛው ባዋ፤ ባዉ ደእያባን አለና። እ ባና፥ “ታ ሀይሳ ኦደስ ዳቡራይና? ታኒ ታና አይስ ኡፋይስ ድጋድና?” ያግድ ኦይችስ። ሄስካ ቃስ ሀዳነ መቶ ደኦ።

9 ባንታ ኦሱዋን ሎኦ አይፈ ደምያ ግሾ እስኖ ግደይሳፈ ናምአ ግደይስ ሎኦ። 10 ናምኣፈ እሶይ ኩንድኮ እሶይ ደንꬄስ፤ ሽን ባርካ ደእያ ኡራይ ኩንድኮ እያ ደንይ ባይና ግሾ እያ አየ! 11 ናምአይ እስፈ ዝንእኮ ሆኤስ፤ ሽን ባርካ ዝንእያ ኡራ ዋንድ ሆአናዉ ዳንዳኢ? 12 እስ አስ ባርካ ተቃናዉ ዳንዳኦና መቱዋ ናምኡ አሳት ተቃናዉ ዳንዳኦሶና። ሄꬑ አይፈን ዶቀትዳ ዎዶሮይ ኤለ ዱፀና።

13 ዞረ ኤኮና ኤያነ ጬጋ ካዉዋፐ ማንቆነ ጭንጫ ግድዳ ናአተꬃ ካዎይ ሎኦ። 14 ሄ ናአተꬃይ ቃሾ ኬꬃፈ ከይድ ዎይኮ ማንቆተꬃፈ ደንድድ ካዎ ግዳናዉ ዳንዳኤስ። 15 ሳሎፐ ጋርሳን ደእያነ ስመረትያ አሳ ኡባይ ካዋ ላትያ ናአተꬃ ካለይሳ በአስ። 16 እስ ካዎይ ሃርያ አሳ ታይቦይ ዳሮ ግዳናዉ ዳንዳኤስ። ሽን ካልያ የለተꬃይ እያ ካዎተꬃን ኡፋይትቤና። ሄስካ ሀዳ፤ ጫርኮ ኦይካናዉ ካሎ መላ።