3
ኡባባስ ዎደይ ደኤስ
1 ኡባባስ ዎደይ ደኤስ፤ ሳሎፐ ጋርሳን ኦሰትያባ ኡባስ
ዎደይነ ቃም ደኤስ።
2 የለታናዉ ዎደይ ደኤስ፤
ሀይቃናዉ ዎደይ ደኤስ።
ቶካናዉ ዎደይ ደኤስ፤
ሾዳናዉ ዎደይ ደኤስ።
3 ዎꬋናዉ ዎደይ ደኤስ፤
ፓꬃናዉ ዎደይ ደኤስ።
ላላናዉ ዎደይ ደኤስ፤
ኬፃናዉ ዎደይ ደኤስ።
4 ዬካናዉ ዎደይ ደኤስ፤
ሚጫናዉ ዎደይ ደኤስ።
ካዮታናዉ ዎደይ ደኤስ፤
የፃናዉ ዎደይ ደኤስ።
5 ሹቹ ላላናዉ ዎደይ ደኤስ፤
ሹቹ ሺሻናዉ ዎደይ ደኤስ።
ቆመታናዉ ዎደይ ደኤስ፤
ዱፃናዉ ዎደይ ደኤስ።
6 ኮያናዉ ዎደይ ደኤስ፤
ኮሽ አጋናዉ ዎደይ ደኤስ።
ሺሽ ኦይካናዉ ዎደይ ደኤስ፤
ላላናዉ ዎደይ ደኤስ።
7 ፔꬋናዉ ዎደይ ደኤስ፤
ስካናዉ ዎደይ ደኤስ።
ስእ ጋናዉ ዎደይ ደኤስ፤
ኦደታናዉ ዎደይ ደኤስ።
8 ዶሳናዉ ዎደይ ደኤስ፤
እፃናዉ ዎደይ ደኤስ።
ኦላስ ዎደይ ደኤስ፤
ሳሮ ዳናዉ ዎደይ ደኤስ።
9 ያትን፥ ኦሳንቾይ ባ ዳቡርዳ ዳቡራፐ አይ ዎ ደሚ? 10 ታኒ ቃስ፥ አሳ ናእ ዳቡርድ ኦꬃና መላ፥ ፆሳይ እምዳ ቶሆይ ዳሮ ዴፆ ግደይሳ በአስ። 11 ፆሳይ ኡባባ እያ ዎድያን ዎድያን ሎይꬅድ ኦꬅስ። ፆሳይ አሳ ዎዛናን መርናተꬅ ዎꬅስ፤ ግድኮካ፥ ፆሳይ ኦꬅዳባ ኡባ ኮይሮፐ ዉርሰꬅ ጋካናዉ፥ አስ ኩመꬅ ኤራናዉ ዳንዳኤና። 12 አስ ባ ደእዳ ላይꬃን ሎእያባ ኦይሳፈነ፥ ኡፋይተይሳፈ አꬍያባይ አይብካ ባይናይሳ ታኒ አኬካስ። 13 ቃስ፥ አሳስ ኦꬅ ዳቡርድ ደምያ ዳቡራስ ጋተይ፥ ምድነ ኡይድ ኡፋይተይስ ፆሳፈ እያዉ እመትዳ እሞታ።
14 ፆሳይ ኦꬅዳባ ኡባይ መርናዉ ደኤይሳ ታኒ ኤራስ፤ እ ኦꬅዳባ ቦላ ጉጃናዉ ዎይኮ እያፐ ደንꬃናዉ ኦደስካ ዳንዳኤተና። ፆሲ ሄሳ ኦይ፥ አስ እያ ያይድ ቦንቻና መላሳ። 15 ሀእ ሀንሸ ደእያባይ ዎይኮ ስንꬃፈ ሀናናዉ ደእያባ ኡባይ ካሰ ሀንዳባ፤ ፆሳይ ካሰ ሀንዳባይ ዛር ሀናናዳ ኮዬስ።
ፕርዳ ጌላተꬅ
16 ቃስ ታኒ፥ ሳሎፐ ጋርሳን ፅሎ ፕርዳ በሳን ኢታተꬅ፥ ፅሎተꬃ በሳን ገነይ ደኤይሳ በአስ። 17 ታ ዎዛናን፥ “ፆሳይ ፅሉዋነ ዎርዱዋ ናምኣካ ፕርዳስ ሺሻና፤ ፆሳይ ሀንዳባ ኡባስነ ኦሶ ኡባስ ዎደ ቃንፅ ዎꬅስ” ያጋዳ ቆፓስ።
18 ታኒ ታኮ፥ “አስ ዶአፐ ዱማቶናይሳ ኤንቲ አኬካና መላ ፆሳይ ኤንታ ፓጬስ” ያጋስ። 19 አሰ ግድን፥ ዶአ ግድን፥ ኤንታ ቃዳይ እስኖ፤ እሶይ ሀይቀይሳዳ፥ ሀንኮይካ ሀይቄስ። ናምአይ እስ ጫርኮ ሸምፖሶና፤ ሄሳ ግሾ፥ አስ ዶአፐ ዱማተና፤ ሄስካ ሀዳ። 20 ኤንቲ ናምአይ እስ በሲ ቦሶና፤ ናምአይ ቢታፈ መትዳ ግሾ፥ ቢታ ስሞሶና። 21 ያትን፥ አሳ ሸምፖይ ሳሎ ፑደ ከየይሳነ ዶአ ሸምፖይ ቢታ ዱገ ዎይሳ ሻክድ ኤረይ ኦኔ? 22 አስ ባ ኦꬅዳ ኦሶን ኡፋይተይሳፈ ሎእያ ሀራባይ እያዉ ባይናይሳ በአስ። እያዉ ደእያ ሎኦ ቃዳይ ሄሳ ፃላላ። አስ ሀይቅ ስምን እያፐ ጉየ ሀንያባ በሳናዉ፥ እያ ጉየ ኤሀናዉ ዳንዳኤይ ኦኔ?