1 ታኒ ታኮ፥ “ሃያ፥ ታ ነና ኡፋይስ አይበኮ ኤርሳናዉ ሎኦባ በሳና” ያጋስ፤ ሽን ሄስካ ሀዳ። 2 ሚች ኤያተꬅ ግደይሳ፥ ቃስ ሚኮይነ ኡፋይስ አይኮካ ጎኦናይሳ አኬካስ። 3 ሀእካ ታ ዎዛናይ ጭንጫተꬃን ታና ካለꬅሽን፥ ታና ዎይነ ኡሻን ኡፋይሳናዉ፥ ኤያካ ግዳናዉ ፓጫስ። አስ ባ ቃንꬃ ዎደን ሳሎፐ ጋርሳን ደእያባ ቦላ አይ ኦꬅኮ ጎአነኮ ኤራናዉ ኮያስ።

4 እስ ግታባ ኦꬃስ፤ ታ ዳና ኬꬃታ ኬፃስ፤ ዎይነ ቶካስ። 5 ዱማ ዱማ አታክልትያነ አይፈ አይፍያ ምꬃታ ቶካስ፤ አስ ሸምፕያ በሳ ጊግሳስ። ሄ በሳን ዱማ ዱማ አይፈ አይፍያ ምꬃታ ቶካስ። 6 ሄ ምꬃታ ኡሻናዉ፥ ሃ ዳጋያ በሲ ዜራዳ ጊግሳስ። 7 አደነ ማጫ አይለታ ሻማስ፤ ቃስ ታ ሶን የለትዳ ሀራ አይለትካ ታዉ ደኦሶና። ታፐ ካሰ የሩሳላመን ደእዳ አሳፐ አꬍያ መሄ፥ ዴሸነ ዶርሰ ሃራስ። 8 ታ ሃርያ ዱማ ዱማ ቢታታፐነ ካዎታፐ ቦንቸትዳ ቡቁራ ኤህሳዳ፥ ዳሮ ዎርቃነ ብራ ታዉ ዳጋያስ። ቃስ፥ ታና ሳቢድ የፅያ አደነ ማጫ ሺሻስ፤ ሄሳ ቦላ፥ አሳስ ኡፋይስ እምያ ዳሮ ማጫሳታ ሺሻስ።

9 ታኒ ካሰ የሩሳላመን ደእዳ ኦደፈካ አꬋዳ ግታ አስ ግዳስ። ታ ጭንጫተꬃይካ ታራ ዉርሰꬅ ጋካናዉ ደእስ። 10 ታ አይፈይ ፄልዳባነ ታ ዎዛናይ አሞትዳባ ኡባ ደማስ፤ ታ አሳተꬃይ ኮይያ ኡፋይስ ኡባ ድጋብከ። ታኒ ኦꬅዳ ኦሶ ኡባን ኡፋይታስ፤ ታ ዳቡራ ዎይ ሄሳ። 11 ግዶሽን፥ ሄሳ ኡባ ኦꬃ ስማዳ ታኒ አኬክያ ዎደ፥ ዳሮ ታኒ እያዉ ዳቡርዳ ኡባይ ሀዳ ግደይሳ በአስ። ሳሎፐ ጋርሳን ጎእያባይ አይኮይ ባዋ፤ ኡባይ ጫርኮ ኦይካናዉ የደꬅያ መላ።

12 ሄሳፈ ጉየ፥ ታኒ ጭንጫተꬅ፥ ኤያተꬅነ ጎሻተꬅ አይበኮ ፓጫዳ ኤራናዉ ቆፋ ዶማስ። አዉደ ግድንካ ካዎይ ኦꬃናዉ ዳንዳኤይ እያፐ ካሰ ካዎትዳ ካዎይ ኦꬅዳይሳፈ ሀራባይ አይብ ደኢ? 13 ፖኦይ ꬉማፐ፥ ጭንጫተꬅ ኤያተꬃፈ ሎኦ ግደይሳ ታኒ በአስ። 14 ጭንጫ አሳ አይፈት እያ ሁጵያ ግዶን ደኦሶና፤ ሽን ኤያት ꬉማን ሄመቶሶና። ግዶሽን፥ ኤንታ ናምኣ ዉርሰꬃይ እስኖ ግደይሳ አኬካስ።

15 ታኒ ታኮ፥ “ኤያ ጋከያ ቃዳይ ታናካ ጋኬስ፤ ያትን፥ ታኒ ጭንጫ ግደይስ ታና አይ ማዲ?” ያጋዳ ቆፓስ። ቃስ ታኒ ታ ዎዛናን፥ “ሀይስካ ሀዳ” ያጋስ። 16 ኤያ ግድን ጭንጫ፥ ሀይቆፐ ጉየ፥ እያ ሀሳየይ ባዋ፤ ስንꬃፈ ያ ላይꬃን ኑኒ ኡባይ ዶገትድ አታና። ኤያይ ሀይቀይሳዳ፥ ጭንጫይካ ሀይቄስ።

17 መቶፐ አትሽን፥ ጎእያባይ ባይና ግሾ፥ ሀ ደኦይ ታና ሻትስ። ሄስካ ሀዳ፤ ጫርኮ ኦይካናዉ የደꬅያ መላ። 18 ሳሎፐ ጋርሳን ታኒ ዳሮ ዳቡራዳ ደምዳ ታ ሻሉዋ ኡባ ታፐ ጉየራ ያ ኡራስ አጋዳ ብያ ግሾ፥ ታኒ ዳቡርዳ ኡባይ ታና ሻትስ። 19 ታፐ ጉየራ ያ አደይ ጭንጨኮ ኤየኮ ኦን ኤሪ? ሽን እ ኦና ግድንካ፥ ታኒ ዳሮ ዳቡርዳባነ ታ ጭንጫተꬃን ደምዳባ ኡባ ባዉ ኤክድ፥ ጎዳ ግዳና፤ ሄስካ ሀዳ።

20 ሄሳ ግሾ፥ ሳሎፐ ጋርሳን ታ ዳቡርዳባ ቦላ ታ ዎዛናይ ኡፋይስ ቃንፅስ። 21 አስ ባ ደእዳ ላይꬃን ባዉ ደእዳ ጭንጫተꬃን፥ ኤራንነ ሂላን ዳቡርድ ደምዳባ ኡባ አይኮካ ዳቡሮናይሳስ የግድ ቤስ። ሄስካ ሀዳነ ግታ ቆሆ። 22 ያትን፥ ሳሎፐ ጋርሳን አስ ዳሮ ዳቡርድ ኦꬅዳባ ኡባፈ አይ ጎአ ደሚ? 23 እ ባ ደኦ ላይꬃን ዳቡርያ ዳቡር ኡባይ አዛኖፐነ ሙደꬃፈ አትሽን፥ ሀር አይብካ እያዉ ጉጀና፤ ሀር አቶሽን ቃማካ እያ ሁጰይ ቆፋፐ ሸምፐና፤ ሄ ኡባይካ ሀዳ።

24 ህዛ አሳስ ጎአ ግድያባይ አይበ ጊኮ፥ አስ ምድ ኡይድ ባ ዳቡራን ኡፋይታናይሳ። ሄ ኡፋይሳይ ቃስ ፆሳ ኩሽያፐ እመትዳባ ግደይሳ ታኒ አኬካስ። ኤራ 3:13፤ 5:18፤ 9:7፤ ሉቃ 12:19፤ 1 ቆሮ 15:32. 25 እያ ሸነ ግዶና፥ ምን ኡይን አሳስ ኡፋይስ አዉን ደኢ? 26 ፆሳ ኡፋይስያ ኡራስ ፆሳይ ጭንጫተꬅ፥ ኤራተꬅነ ኡፋይስ እሜስ፤ ናጋራንቹዋስ እ ዳቡርድ ሺሻና መላ፥ ዳቡራ እሜስ። ሽን እ ሺሽዳይሳ ፆሳይ ኤክድ፥ ባዉ ያይያ ሀራስ እሜስ። ሄሳ ግሾ፥ ሀ ኡባይ ሀዳነ ጫርኮ ኦይካናዉ የደꬆ መላ። እዮ 32:8፤ ሌም 2:6.