ኤራታ ማፃፋ
ጋꬃ ቆፋ
ኤራታ ማፃፋን አሳ ደኦይ ቃንꬅ ግደይሳ ፃላላ ግዶናሽን፥ ዳቡራን፥ ዳጋማን፥ ፕርዳ ጌላተꬃንነ ፆነተꬃን ኩምዳይሳ በሳናሳ። ሄሳ ግሾ ፃፈይ፥ “አሳ ደኦይ ሀዳ” ያግድ ባ ቆፋ ቆንጭሴስ። ሀ ጭንጫ ኡራይ፥ አሳ ደኡዋ ዉርሰꬅ ጋካናዉ ዎችያ ፆሳ ኦሱዋ አኬካናዉ ፆነትስ። ግዶሽን፥ አስ ባ ደእዳ ላይꬃ ኡባን ባዉ ዳንዳኤትዳባ ኡባ ምንድ ኦꬃናዉ በሰይሳነ ፆሳይ እምዳባን ኡፋይታናዉ ኮሸይሳ ዞሬስ።
ኤራ ኡራ ቆፋታፐ ዳሮት ኡሎነ ዞኮ ግድዳ ቆፋታንነ ኡፋይሳ ቃንፆን ኩምዳ ቆፋታ በሴስ። ግዶሽን፥ ሀ ማፃፋይ ጌሻ ማፃፋ ቦላ ኤቅዳ አማኖይ ሀር አቶሽን፥ ጋሄቶናነ ስን ኩምዳ ቆፋታ ባ ጋꬃን ኦይካና ጋካናዉ ዳልጋ ግደይሳ በሴስ።
ሀ ኤራታ ማፃፋይ አሳ ደኦ ማስቶተዳ በሲያ ግሾ፥ ዳሮ አሳት ሀ ማፃፋፐ ምንꬆ ደምዶሶና። ሄሳዳካ፥ ሀ ቆፋታ ኦይክዳ ጌሻ ማፃፋይ፥ ደኦስ ግታ ብርሸꬅ እምያ ፆሳን ኡፋይስ ኦꬃና መላ ዞሬስ።
ማፃፋ አይፈ ቆፋታ
ዱሳ ብርሸꬅ (1:1—2:26)
ኡባባስ ዎደይ ደኤስ (3:1-8)
ጭንጫተꬃን ደአ (3:9—6:12)
ዎንቶባ ኦንካ ኤረና (7:1—11:6)
ፆሰ ቦንቻ እያዉ ኪተታ (11:7—12:14)
1
ኡባባይ ሀዳ
1 ሀይስ፥ ዳዊታ ናኣ፥ የሩሳላመን ካዎትዳ ጭንጫ ኡራ ቃላ።
2 ሄ ጭንጫይ፥ “ኡባባይ ሀዳ፤
ኡባባይ ሀዳፐ ሀዳ፤
ኡባባይ ኩመꬅ ሀዳ” ያግስ።
3 ባ ደእያ በሳን ኡባን፥
አስ ዳቡርድ ኦꬅያባ ኡባን
እያዉ ዎይ አይቤ?
4 እስ የለተꬅ አꬍያ ዎደ፥ ሀራ የለተꬅ በሳ ኦይኬስ።
ሽን ሀ ቢታይ መርናዉካ ላመቶና ደኤስ።
5 አው ዶሌስ ዉሌስ፤
ናምአንꬆ ዶላናዉ ያ ዶልያ በሳ ኤለሴስ።
6 ጫርኮይ እስ ቶሆ ዱገ እስ ቶሆ ፑደ ጫርኬስ፤
ቃስ ዩይ ዩይ አꬍድ፥ ስመረትድ ዬስ።
7 ጎግያ ሃꬅ ኡባይ አባን ገሌስ፤
ሽን አባይ ኩም ኤረና።
ሄ ሃꬃይ ስሚድ ጎጋናዉ፥
ጉየ ባ ፑልትያ በሳ ቤስ።
8 ኡባባይ ሳለꬅያባ፤
እ አይ መላ ሳለꬅያኮ ኦድ ዉርሳናዉ ዳንዳኤተና።
አይፈይ ፄልድ ካል ኤረና፤
ሀይꬅ ስእድ፥ ታዉ ግድስ ጌና።
9 ካሰ ሀንዳባይ ዎንቶካ ስሚድ እ ሀናና፤
ቃስ ሀእ ሀንሸ ደኤይስ ካሰ ሀንዳባ።
ሄሳ ግሾ፥ ሳሎ ጉፋንꬆን ኦራꬃባይ አይብካ ባዋ።
10 ኦንካ፥ “ሄኮ፥ ሀይስ ኦራꬃባ” ጊኮ፥
ሄስ ኦራꬅ ግደና፤ ሄስ ኑኒ የለታናፐ ካሰ ሀንዳባ።
11 ካሰ አꬍዳ ዎደታን ሀንዳባታ ዛሪድ ሀሳያባይ ባዋ፤
ጉየፐ ሀናናባታ ኤንታፈ ጉየ ኦንካ ሀሳየና።
ጭንጫተꬅ ሀዳ
12 ታኒ ጭንጫይ፥ የሩሳላመን እስራኤለስ ካዎ ግዳዳ ደአስ። 13 ታኒ ሳአን ደእያባ ኡባ ሻካዳ ኤራናዉነ ጭንጫተꬃን ፕልጋዳ ፄላናዉ ቆፋ ቃቻስ። ያታዳ አሳ ኡባስ ፆሳይ እምዳ ደኦይ ዳሮ ዳቡርስያባነ ኡፋይሶናባ ግደይሳ አኬካስ። 14 ሳሎፐ ጋርሳን ሀንዳባ ኡባ ታኒ በአስ፤ ሽን ኡባይካ ሀዳ፤ ጫርኮ ኦይካናዉ የደይሳ መላ።
15 ጌል ሱራናዉ ዳንዳኤና፤
ባይናባ ታይባናዉ ዳንዳኤተና።
16 ታኒ ታ ዎዛናን ሀይሳዳ ያጋዳ ቆፓስ፤ “ታፐ ካሰ የሩሳላመ ሃርዳ ኡባታፐ ታኒ ግታነ ጭንጫ ግዳስ። ጭንጫተꬅነ ኤራ ጉስ እ አይበኮ ፓጫዳ ኤራስ” ያጋስ። 17 ታኒ ጭንጫተꬃፈ፥ ጎሻተꬃፈነ ኤያተꬃፈ ግዶን ደእያ ዱማተꬅ አይበኮ ኤራናዉ ዳሮ ዳቡራስ። ሽን ዉርሰꬃን ሄስካ ጫርኮ ኦይካናዉ የደይሳ መላ ሀዳ ግደይሳ ኤራስ።
18 ጭንጫተꬅ ዳርያ ዎደ አዛንꬅያባይ ዳሬስ፤
ኤር ዳርያ ዎደ ቃስ መቶይ ዳሬስ።