31
ካዋ ልሙኤላ ሌምሶታ
1 ሀይሳፈ ካልድ ፃፈትዳ ሌምሶይ፥ ካዋ ልሙኤላ አይያ ካዋ ልሙኤላ ታማርስዳይሳ።
2 ታ ናአዉ፥ ታ ኡሎፐ ዎꬍዳይሶ፥
ታኒ ቃንገታዳ የልዳይሶ፥
3 ማጫሳን ነ ዎልቃ ዉርሶፋ፤
ካዎታ ꬋይስያ ማጫሳታን ነ ምኖተꬃ ꬋይሶፋ።
4 “ልሙኤላ፥ ዎይነ ኡሽ ካዎታስ በሰና፤
ማꬆይያ ኡሽ ሹማታስ በሰና።
5 ኤንቲ ኡያ ዎደ ህገ ባሎሶና፤
ናቀትዳ አሳ ማታ ቀል ጎሶና።
6 ማꬆያ ኡሹ ሀይቃና ሀንያ ኡራስነ
ሳእ ኢትዳ ኡራስ እምተ።
7 ኤንቲ ባንታ ማንቆተꬃነ
ባንታ ዋይያ ዶጋናዉ ኡዮ።
8 ባንታ ግሾ ኦደታናዉ ዳንዳኦና አሳ ግሾ ነ ኦዴታ፤
ማድያ አስ ባይናይሳታ ግሾ ነ ኤቃ።
9 ኤንታ ምየን ኤቃዳ ኤንታዉ ሱረ ፕርዳ፤
ማንቆታነ መቶታንቾታ ማታ ናጋ” ያጋዳ ታማርሳሱ።
ዎዛናማ ማቾ
10 “ዎዛናማ ማቾ ኦን ደማናዉ ዳንዳኢ?
እ ጋተይ ዞኦ አልኦ ሹቻፈ አꬌስ።
11 እ አዝናይ እዮ አማነቴስ፤
እያዉ ኮሽያባፐ አይብካ ፓጨና።
12 እያ ባ ደኦ ላይꬃ ኡባን፥
እያዉ ሎኦባፐ አትሽን፥ ኢታባ ኦꬁኩ።
13 ሱፈነ ሊኖ ኮያዳ፥
ኡፋይታሸ ባ ኩሸን ኦꬃዉሱ።
14 እያ ዛልአንቾታ ማርካበ መላ፤
ባ ካꬃ ሃሆ ቢታፈ ሺሻዉሱ።
15 እያ ባ ሶ አሳስ ካꬅ ጊግሳናዉነ
ባ ማጫ አይለታስ ኦሶ እማናዉ፥
ሳእ ዎንቶና ደእሽን ደንዳዉሱ።
16 ሎኦ ጋደ ኮያዳ ሻማዉሱ፤
ባ ኩሸን ኦꬃዳ ደምዳ
ሚሸን ዎይነ ቶካዉሱ።
17 እያ ባ ፄሳ ምንꬃዳ ዳንጫዉሱ፤
ባ ቀስያ ኦሶስ ምንꬃዉሱ።
18 እያ ዎ ደማናዉ ምናዳ ዛልአዉሱ፤
እያ ኦꬃሸ ቃምስያ ግሾ እ ፆምፐይ ቶኤና።
19 እያ ባ ህንꬒርትያ ኦይካዉሱ፤
ባ ብራን ሎይꬃዳ ሱቃዉሱ።
20 እያ ማንቆታስነ መቶታንቾታስ እማዉሱ።
21 እ ሶ አሳ ኡባይ ሆእያ ማኦ ማእያ ግሾ፥
ሻች ቡክኮካ እያ ህርጉኩ።
22 አልጋ ቦላ ሂፅያ ማኦ ስካዉሱ፤
ሊኖፐ ኦሰትዳ ኦቻ ቴራ ዳንያ ማኦ ማአዉሱ።
23 ቢታ ጭማት ሺቅያ ዱቡሻን
እ አዝናይ ቦንቸትዳ አስ።
24 ሊኖፐ ማኦነ ዳንጮ ኦꬃዳ፥
ዛልአንቾታስ ባይዛዉሱ።
25 እያ ምኖነ ቦንቾ አስ፤
ያና ላይꬃ ኡባን ኡፋይታዳ ደአዉሱ።
26 ጭንጫተꬃን ባ ዶና ዶያዉሱ፤
አማንꬅያ ዞረይ እ እንፃርሳን ደኤስ።
27 እያ ባ ሶ አሳ ደኡዋ እንጀያናዉ ኡባ ዎደ ኦꬃዉሱ፤
አዛላተꬅ እ ቦላ በንትድ ኤረና።
28 እ ናይት ደንድድ፥ እዮ ናሾሶና፤
እ አዝናይ እዮ ያግድ ጋላቴስ፤
29 ሎኦባ ኦꬅያ ዳሮ ማጫሳት ደኦሶና፤
ሽን ነ ኤንታ ኡባፈ አꬋሳ” ያጌስ።
30 ማል ጭሜስ፤
የገልሳተꬅ ꬋያና።
ሽን ጎዳ ያይያ ማጫስያ፥
እያ አንጀትዳሮ።
31 እያ ኦꬅዳባ ኡባስ እዮ ዎይትተ፤
እ ኦሶ ኡባይ ዳባባን እዮ ጋላትሶ።