30
አጉራ ሌምሶታ
1 ያቀ ናኣ አጉራ ሌምሶት ሀይሳፈ ካልድ ፃፈትዳይሳታ። አጉር እትኤላስነ ኡካላስ ሀይሳ ሃሳይስ። 2 ታኒ አሳ ኡባፈ አꬍዳ ኤያ፤
አሳስ ደእያ አኬክ ታዉ ዴና።
3 ታኒ ጭንጫተꬅ ታማራብከ፤
ጌሻ ፆሳባካ ኤርከ።
4 ሳሎ ፑደ ከይድ ዱገ ዎꬍዳይ ኦኔ?
ጫርኮ ባ ኩሸን ኦይክዳይ፥
ሃ ባ አፍላን ዪጭዳይ፥
ሳኣ ጋፃ ምንꬅድ ኤስዳይ ኦኔ?
እያ ሱንꬃይ ኦኔ?
እያ ናኣ ሱንꬃይ ኦኔ?
እያ ኤርያ ግድኮ አነ ታዉ ኦዳ?
5 ፆሳ ቃላን ቦረይ ባዋ፤ ኡባይ ቱማ
እያን አማነትያ ኡባስ እ ጎንዳለ።
6 እያ ቃላ ቦላ አይባካ ጉጆፋ፤
ጉጅኮ እ ነና ሴራና፤
ነ ዎርዳንቾ ግደይሳ እ ቆንጭሳና።
7 ጎዳዉ፥ ታ ነና ናምኡባ ኦይቻይስ፤
ታ ሀይቃና ጋካናዉ ኤንታ ታና ድጎፋ።
8 ታ አሰ ጭሞና መላነ ዎርዶ ሃሳዮና መላ ታና ናጋ፤
ታዉ ኮሽያ ካꬅ እማፈ አትሽን፥ ታና ዱረ ዎይኮ ማንቆ ኦꬆፋ።
9 ዱረ ግዳዳ፥ “ጎዳይ ኦኔ?” ጋዳ ነና ካዳና፤
ማንቆ ግዳዳ፥ ካይሳዳ ታ ፆሳ ሱንꬃ ጫይሳና።
10 ነና ባዶና መላነ
እያ ባደꬃይ ነዉ ጎመ ግዶና መላ፥
አይልያ እያ ጎዳራ ዝግሮፓ።
11 ባ አዋ ባድያነ ባ አይዉ አንጆና የለተꬅ ደኤስ።
12 ዳሮ ቱና ግድ ኡትድ
ባንታና ጌሽ ኦꬅያ አሳት ደኦሶና።
13 ኦቶሮን ኩምዳ አሳትነ
አሰ ካꬍድ ፄልያ አሳት ደኦሶና።
14 ኤንታ አቻይ ማሸ ግድን፥
ኤንታ ጋጮይ ቶራ ግድን፥
ማንቆታነ መቶታንቾታ ናቅድ፥
ኤንታባ ቦንቅያ አሳት ደኦሶና።
15 ኡላꬃስ ናምኡ ማጫ ናይት ደኦሶና፤
ኤንቲ፥ “ሀማ! ሀማ!” ያግድ ዋሶሶና።
ካልድ ኤሮና ሄꬑባት ደኦሶና፤
ኦይዳንꬆይ ቃስ “ግዳና” ግድ ኤረና።
16 ሄሳት፥
ዱፎ፥
ማይንዳ ማጫስ፥
ሃ ካልድ ኤሮና መላ ቢታነ፥
“ግዳና!” ግድ ኤሮና ታማ።
17 ባ አዋ ለቅያ ናኣ አይፍያ፥
ባ አይያ ጭምን ካꬍያ ናኣ አይፍያ፥
ዛንጋራን ደእያ ቁሮት ዎጫና፤
እያ አሹዋ አንኮት ማና።
18 ታና ሄꬑባት ማላልሶሶና፤
ኦይዳንꬆይ ኡባ ታዉ ገለና።
19 ሄሳት፥
ሳሎራ ፓልያ አርጋንꬅ፥
ዛላ ቦላራ ኮልፅያ ሾሽ
አባ ቦላራ ብያ ማርካበነ
ጌላኦራ ስቆ ኦይከትዳ አደ።
20 ላይማ ማጫስ ሀንያ ሀኖይካ ሄሳ መላ፤
እያ ማሱ፤ ሽን ባ ዶና ቁቻዳ፥
“ታኒ አይኮካ ባላቢከ” ያጋዉሱ።
21 ሄꬑባን ቢት ቃፄስ፤
ኦይዳንꬁዋ ኡባ ቶካናዉ ዳንዳኤተና።
22 ሄሳትካ፥
አይለይ ካዎትዳ ዎደ፥
ኤያ አስ ካꬅ ካልዳ ዎደ፥
23 አስ እፅዳ ማጫስ አዝና ገልዳ ዎደነ
ማጫ አይልያ ባ ጎዳትዉ ላትዳ ዎደ መትያ ሀኖታ።
24 ሳአ ቦላ ኦይዱ ጉꬃ መተꬃት ደኦሶና፤
ሽን ኤንቲ አꬍዳ ጭንጫ።
25 ሄሳትካ፥
ጩንጫለይ ዎልቅ ባይና መተꬅ፤
ሽን ባንታዉ ምያባ ቦነ ሺሽድ፥ ምንጆሶና።
26 ጉፓለት ዎልቅ ባይናይሳታ፤
ሽን ባንታ ኬꬃ ዛላ ቆጶን ኬፆሶና።
27 ቦለታስ ካዎይ ባዋ፤
ሽን ኤንቲ ኡባይ ማራን ዛቶሶና።
28 ዛረት ኩሸን ኦይከቶሶና፤
ሽን ካዎ ጋꬎን ደኦሶና።
29 ባንታ ማታ በስሸ ሄመትያ ሄꬑ መተꬃት ደኦሶና፤
ኦይዳንꬆይ ሎኦ ሄመꬅ ሄመቴስ።
30 ሄስካ፥
ዶአ ኡባፈ ምኖነ ያሽ ኤሮና ጋሞ።
31 ማጫ ኩቶታ ግዶን ሄመትያ አደ ኩቶ፥
ዉደ ካለꬅያ ዴሻ ኮለ፤
ባ ኦላንቾታ ግዶን ቆንጨን ኤቅያ ካዋ።
32 ኔኒ ኤያዳ ኦቶርትዳባ ግድኮካ፥
ኢታ ኦꬃናዉ ሀልችዳባ ግድኮ፥
አነ ታክ ጋዳ ቆፓ።
33 ማꬅ ቡከይ ኦይሱ ከሰይሳዳ፥
ሲ ድችን ሱꬅ የይሳዳ፥
ሀንቆ ደንꬆይ ኦሹ ኤሄስ።