ሀሳዮና መቃና፤

ሄ ኡራስ ፓፆይ ባዋ።

ሽን ኢታት ቢታ ሃርያ ዎደ አሳይ ኡንኤቴስ።

ሽን ላይማ ማጫሳ ሄራን ዩይያ አስ ባ ሚሽያ ዉርሴስ።

ሽን ዎꬋፈ ኤክያ ካዎይ ባ ካዎተꬃ ꬋይሴስ።

ባ ቶሆስ ፅሄ የጌስ።

ሽን ፅሎ አስ ኡፋይቴስ፥ የፄስ።

ሽን ኢታ አሳት ሄሳ ኤሮኮና።

ሽን ጭንጫ አሳት ሀንቆ እርፅሶሶና።

ኤያይ ሀንቀቴስ፤ ቅꬌስ፤ እያዉ ሳሮይ ባዋ።

ፅሎ አሳ ዎꬋናዉ ኮዮሶና።

ሽን ጭንጫ አስ ባና ሃሬስ።

እያ ሞርናት ኡባይ ኢታ ግዶሶና።

ኤንታ ናምኣስ አይፈ እምዳይ ጎዳ።

እ ባ አራታን ጋምአና።

ሽን የዳን ድጭዳ ናእ ባ አይዉ ካዉሼስ።

ሽን ፅሎት ኤንታ ኩንደꬃ በአና።

እ ነዉ ሳሮ እማና፤

እ ነና ኡፋይሳና።

ሽን ህገ ናግያ አስ አንጀትዳይሳ።

እያዉ ገልያኮካ እ ኪተተና።

እያፐ ኤያ አሳስ ኡፋይስ ደኤስ።

እያ ዉርሰꬃይ አዛኖ ግዳና።

ኤለ ይሎትያ አስ ዳሮ ናጋራ ኦꬄስ።

ሽን አሽከ አያን ደእያ አስ ቦንቸቴስ።

እ ዳባባን ቱማ ኦድኮ ሴረቴስ፤

እ ቱማ ኦዶና እፅኮ ጎዳን ባደታና።

ሽን ጎዳን አማነትያ አስ ሳሮ ደኤስ።

ሽን ሱረ ፕርድ ጎዳፐ በንቴስ።

ኢታት ሱረ አሳ እፆሶና።