28
1 ኢታት ኦንካ የደꬆና ባቃቶሶና፤
ሽን ፅሎት ጋሞ መላ ያዮና ደኦሶና።
2 እስ ካዎተꬃይ ማካልኮ፥ ሃረይሳት ዳሮሶና፤
ሽን ካለይስ ጭንጫነ አኬካንቾ ግድኮ፥
ሳሮተꬅነ ዎፕ ደኤስ።
3 ማንቆታ ኡንኤꬅያ ካዎይ
ካꬅ ꬋይስያ ዎልቃማ እራ መላ።
4 ህገ ቦንቾና አስ ኢታ አሳ ሳቤስ፤
ሽን ህገ ቦንችያ አስ ኢታ አሳ እፄስ።
5 ኢታ አሳታስ ሱረ ፕርድ ገለና፤
ሽን ጎዳ ጎይንያ አስ ኡባ አኬከስ።
6 ዱረ ግድድ ጭምያ አስ ግዳናፐ፥
ማንቆ ግድድ ሱረ ግደይስ ሎኦ።
7 ህገ ናግያ ናአይ አኬካ ናአ፤
ሽን ፓꬆና አሳራ ሄመተይ ባ አዋ ዬላዬስ።
8 ምሸ የሎን ታልኤይነ አሰ ቦንቅድ ዱረትያ አስ
ሄ አቁዋ ማንቆታስ ኬህያ አሳስ ሺሼስ።
9 ህገ ስአናፐ ግድ ባ ሀይꬃ ቱጭያ፥
ኡራ ዎሳይ ጎዳ ስንꬃን እፀትዳባ።
10 ሱረታ ኢታ ኦገን ካለꬅያ ኡራይ
ባ ቦክዳ ኦላን ኩንዳና፤
ሽን ጌሻት ሎኦባ ላታና።
11 ዱረ አስ ባና ጭንጫ ግድ ቆፔስ፤
ሽን አኬክ ደእያ ማንቆይ እያ ፓጬስ።
12 ፅሎት ፆንያ ዎደ አሳ ኡባይ ኡፋይቴስ፤
ሽን ኢታት ማታ ኦይክያ ዎደ አሳይ ቆሰቴስ።
13 ባ ናጋራ ገንꬅያ አስ አጨና፤
ሽን ፓፀይነ ናጋራ አገይ ማሮታ ኤካና።
14 ጎዳ ኡባ ዎደ ያይያ አስ አንጀትዳይሳ፤
ሽን ባ ዎዛና ምንꬅያ አስ መቶን ገላና።
15 ማንቆ አሳ ሃርያ ኢታ ሀላቃይ፥
ጉድያ ጋሞነ ኮሻትዳ ባባንꬃ መላ።
16 አኬክ ባይና ካዎይ ባ ደርያ ቆሄስ፤
ሽን አሰ ቆሆና ሀላቅ ዳሮ ላይꬅ ሃራና።
17 አሰ ዎꬍያ አስ ሀይቃና ጋካናዉ ባቃትሸ ደኤስ፤
እያ ኦንካ ማደና።
18 ቦረይ ባይና ሄመትያ አስ ቆሄተና፤
ሽን ጌላ አስ አኬኮና ኩንዳና።
19 ምንድ ኦꬅያ አስ ካꬅ ካሌስ፤
ሽን ፓꬆና አሞ ካልያ አስ ማንቆተꬅ ላታና።
20 አማነትያ ኡራይ ዳሮ አንጀታና፤
ሽን ዱረታናዉ ዎፅያ አስ መቶ በአና።
21 ሶምኦ በእድ ፕርዶይ ሎኦ ግደና፤
ሽን አስ ባሶ ኡይꬃ ግሾ ግድ ቆሄስ።
22 ያረ አስ ዱረታናዉ ባቀቴስ፤
ማንቆተꬅ አኬኮና ኦይካናይሳ ኤረና።
23 አሰ ጮ ሳቢያ አሳፐ
ሀንቀትያ አስ ጉየፐ ጋላተቴስ።
24 ባ አዋነ ባ አይዉ ካይሶትድ፥ “ናጋራ ኦꬃብከ”
ግያ አስነ ደምዳባ ꬋይስያ አስ እስኖ።
25 ኡዘ አስ ኦሽ ደንꬄስ፤
ሽን ጎዳን አማነትያ አስ ካሌስ።
26 ባናን አማነትያ አስ ኤያ፤
ሽን ጭንጫተꬃን ሄመተያ አስ ሳሮ ደኤስ።
27 ማንቆስ እምያ አስ መቶተና፤
ሽን ኤንታ በአናፐ ግድ ቅልምኤይ ባደታና።
28 ኢታ አሳት ሹመትያ ዎደ አሳይ ቆሰቴስ፤
ሽን ኤንቲ ꬋይያ ዎደ ፅሎት ዳሮሶና።