3 ካዋ ስንꬃፈ ኤለሳዳ ከዮፓ፤ ካዎይ ባ ኮይዳባ ኦꬃናዉ ዳንዳእያ ግሾ ኢታ ኦሶ ኦꬃናዉ ደንዶፋ። 4 ኡባባ ኦꬃናዉ ካዋስ ማት ደእያ ግሾ፥ “አይስ ሀይሳ ኦꬃዲ?” ያግድ እያ ኦይቻናዉ ዳንዳኤይ ኦኔ? 5 እያ ኪታ ፖልያ አስ ቆሄተና፤ ጭንጫ አስ ልከ ዎድያነ ኦꬅያ ኦግያ ኤሬስ። 6 አሰ ዴፆ መቶይ ጋክኮካ ኡባባስ ዎደይነ ኦገይ ደኤስ። 7 ስንꬃፈ ሀናናባ ኤርያ አስ ባዋ፤ “ሀይስ ሀናና” ግድ ኦዳናዉ ዳንዳኤይ ኦኔ? 8 ሸምፖይ ሻከትድ ብያ ጋላስ ኦይክድ ተቃናዉ ዳንዳእያ አስ ባዋ፤ ዎይኮ ሀይቆይ ባ ጋላሳን ዮናዳ ድጋናዉ ዳንዳእያ አስ ባዋ። ኦላ ዎደ ኦንካ ኦለትከ ጋናዉ ዳንዳኦናይሳዳ ኢታተꬅ ኢታ ኦꬅያ ኡራ የደና። 9 ሳሎፐ ጋርሳን ሀንያባ ኡባ ታኒ አኬካዳ ቆፕያ ዎደ አስ ባዉ ደእያ ማታ ሀራ አስ ቆሀናዉ ጎኤተይሳ በአስ።

10 ኢታ አሳት ቦንቾን ሞገትሽን በአስ። ኤንቲ ኢታተꬃ ኦꬅዳ ካታማ አሳይ ሺቅድ ኤንታ ሳቢሽን ስአስ፤ ሄስ ኡባይ ሀዳ።

11 አስ ቆፕድ ኢታባ ኦꬅያ ጋሶይ፥ ኢታባ ኦꬅዳ አሳታ ኤለስድ ሴረይ ባይና ግሾሳ። 12 ናጋራንቾይ ፄቱ ቶሆ ኢታባ ኦꬅሽን እያ ባረይ አዱቅኮካ፥ ፆሰ ያየይሳታስነ ቦንቸይሳታስ ሳእ ሎአናይሳ ታ ኤራይስ። 13 ኢታት ፆሰ ያዮና ግሾ ሳሮተꬅ ኤንታዉ ባዋ፤ ኤንቲ ፆሰ ያዮና ግሾ ኤንታ ባረይ ኩያዳ ቃማና።

14 ሀ ሳአን ኦሰትያ ሀራ ሀዳባይ ደኤስ። ሄስካ፥ ጌሻ አሳት፥ ናጋራንቾት ኤካናዉ በሲያ ሴራ ኤክያ ዎደ ናጋራንቾት ጌሻት ኤካናዉ በሲያ ሎኦባ ኤከይሳ፤ ሄስ ኡባይ ሀዳ። 15 አስ ምያባፐ፥ ኡያባፐነ ባና ኡፋይስያባፐ አꬍድ ሎኦባይ ሳሎፐ ጋርሳን ሀር ባይና ግሾ፥ አስ ባ ደኦን ኡፋይትኮ ሎኦ ጋስ። ፆሲ እያዉ እምዳ ላይꬃን እ ዳቡርድ ደምዳባን ኡፋይታናዉ ዳንዳኤስ።

16 ታኒ ጭንጫተꬅ አይበኮ ኤራናዉነ አስ ሀ ሳአ ቦላ ዳቡርያ ዳቡራ አኬካናዉ ሀልቻስ፤ ዉርሰꬃን አስ ꬍስኮ ꬋይድ ኦꬅያ ኦሶይ ደኤይሳ በአስ። 17 ታኒ ፆሲ ኦꬅዳባ ኡባ በአስ። ሳሎፐ ጋርሳን ኦሰትዳ ኦሶ አስ ፕልግድ ኤራናዉ ዳንዳኦናይሳ ኤራስ። አስ አይ መላ ዳቡርድ ፕልግ ፄልኮካ፥ እያ ብርሸꬃ ኤራናዉ ዳንዳኤና። ቃስ ጭንጫ አስ ሀይሳ ኤራይስ ጋናዉ ዳንዳኤና።