1 ሀ ኡባ ታ ዎዛናን ቆፕዳፐ ጉየ ጭንጫትነ ፅሎት፥ ኤንታ ኦሶት ፆሳ ኩሸን ደኦሶና ጋዳ ኩያስ። ሽን ሲቆ ግድን ዎይኮ እፆ አይብ እያ ናግያኮ ኦንካ ኤረና። 2 ዱማተꬅ ባይና ኡባ ጋክያ ቃዳይ እስኖ፤ ፅሎ ግድን ጌላ፥ ሎኦ ግድን ኢታ፥ ቱና ግድን ቱና ግዶና እፅን፥ ያርሾ ያርሸይሳ ግድን ያርሾናይሳ ኡባ ቃዳይ እስኖ። ሎኦ አሳስ ናጋራንቹዋፈ ሎእያ ቃድ ባዋ፤ ጫቆ ያየይስ ያዮናይሳፈ ዱማተና።

3 አሳ ኡባ ቃዳይ እስኖ ግደይስ፥ ሀ ሳአን ደእያ ሀራ ኢታተꬃ መላ ዳሮ ኢታ። አስ ደኦን ደእዳ ላይꬃ ኡባን እያ ዎዛናይ ኢታተꬃንነ ጎሻተꬃን ኩምድ ደኤስ፤ ዉርሰꬃን ሀይቅድ አጌስ። 4 ሀይቅዳ ጋሞፈ ፓፃ ደእያ ካን ሎኦ፤ ደኦን ደኤይሳታራ ደእያ ኡራስ ኡፋይስ ደኤስ።

5 ደኦን ደእያ አሳት እስ ቶሆ ሀይቃናዉ ደኤይሳ ኤሮሶና፤ ሽን ሀይቅዳይሳት እስባካ ኤሮኮና። ኤንቲ ዶገትዳይሳታ ግድያ ግሾ አይኮካ ማዶኮና። 6 ኤንታ ሲቆይ፥ እፆይነ ቃናተ ኡባይ ኤንታራ እስፈ ꬋዬስ። ህዛፐ ጉየ ሳሎፐ ጋርሳን ሀንያባ ኡባን መርናዉ ኤንታዉ ቃድ ባዋ።

7 ባ፥ ነ ካꬃ ኡፋይሳን ማ፤ ነ ዎይነ ኡሻ ነ ዎዛናይ ኡፋይትን ኡያ። ፆሳይ ሄሳ ነዉ ካሰፐ ጊግስድ ዎꬅስ። 8 ኡባ ዎደ ነ ማኦይ ቦꬅ ግዶ፤ ነ ሁጰን ዛይተ ትያ። 9 ሳሎፐ ጋርሳን ፆሳይ ነዉ እምዳ ሀ ሀዳ ደኡዋን፥ ሀዳ ግድዳ ነ ቃማታን ነ ሲቅያ ነ ማቸራ ኡፋይታዳ ደአ። ኔኒ ሳሎፐ ጋርሳን ዳቡራዳ ኦꬅዳባ ኡባፈ ነና ጋክያ ሳማይ ሄሳ። 10 ነ ኩሸይ ኦꬃናዉ ደምዳባ ኡባ ነ ኩመꬃ ዎልቃን ኦꬃ፤ ኔኒ ባና ዱፉዋን ኦሶይ ዎይኮ ሀልቾይ ዎይኮ ኤር ዎይኮ ጭንጫተꬅ ባዋ።

11 ታኒ ሳሎፐ ጋርሳን ሀራባ በአስ። ሄስካ፥ ኤሶን ዎፀይሳት ኡባ ዎደ ፆኖኮና፤ ምኖ ኦላንቾት ኡባ ዎደ ኦላን ካንꬆኮና፤ ጭንጫት ኡባ ዎደ ካꬅ ደሞኮና፤ ሂላንቾት ኡባ ዎደ ዱረቶኮና፤ ታማርዳ አሳት ኡባ ዎደ ሳበቶኮና። ሽን ኡባ ቃድነ ዎደይ ጋꬅዳይሳዳ ሀኔስ።

12 ግዶሽን ሄ ዎደይ አዉደ ያነኮ ኤራናዉ ዳንዳእያ አስ ባዋ። ካፎይ ፅሄን ገለይሳዳ ዎይኮ ሞሎይ ግተን ኦይከተይሳዳ አስ ኡባይ ቆፖና ጋክያ ኢታ ዎደን ኦይከቴስ።

13 ሳሎፐ ጋርሳን ታኒ በእዳባ ሀራባይ ደኤስ። ሄስካ ጭንጫተꬅ ግታ ሌምሶ ግደይሳ። 14 ጉꬃ አስ ደእያ እስ ጉꬃ ካታምያ ደአዉሱ። ሄ ካታምዉ እስ ዎልቃማ ካዎይ ኦላናዉ ደንድስ፤ እዮ ተቅድ ኦይክስ። 15 ሄ ካታመን ማንቆ ግድዳ እስ ጭንጫ አደይ ደኤስ፤ እ ባ ጭንጫተꬃን ሄ ካታምዉ አሽስ። ሽን ሄ ማንቆ አድያ ዛሪድ ሀሳይዳይ ባዋ። 16 ታኒ፥ “ጭንጫተꬅ ዎልቃፈ አꬌስ” ያጋስ። ግዶሽን፥ ጭንጫ ግድኮካ ማንቆ አስ ካቴስ፤ እ ኦድያባ ስኤይ ባዋ። 17 ሄስ ሀንኮካ፥ ደርያ ሃረይስ ኤያታ ሺቆን ዋስያ ዋሱዋ ስአናፐ ሎዳራ ኦደትያ ጭንጫ አሳ ቃላ ስኤይስ ሎኦ። 18 ጭንጫተꬅ ኦላ ሚሸፐ አꬌስ፤ ሽን እስ ናጋራንቾይ ዳሮ ሎኦባ ꬋይሴስ።