1 ሀይቅዳ ኡዱንፀት ሳውያ ሽቱዋ ፅንቅሶሶና፤ ሄሳዳካ፥ ጉꬃ ኤያተꬅ ጭንጫተꬅነ ግታ ቦንቹዋ ኢሴስ።

2 ጭንጫ አሳ ዎዛናይ እያ ኡሻች ካለꬄስ፤ ሽን ኤያ አሳ ዎዛን ሀድርስ ካለꬄስ። 3 ኤያ አስ ኦገ ሄመትያ ዎደ እያዉ አኬክ ባዋ፤ እ ኤያ ግደይሳ አስ ኡባይ ኤሬስ።

4 ነ ሀላቃይ ነ ቦላ ሀንቀትኮ ነ በሳ የዶፋ፤ ስእ ግድ ዳንዳኦይ ግታ ናጋራ አቶ ጊሴስ።

5 ሳሎፐ ጋርሳን ታኒ በእዳ ሀራ ኢታባይ ደኤስ። ሄስካ ደርያ ሃረይሳት ኦꬅያ ናቁዋ። 6 ኤያት ዳሮ ꬎቃ ሹማተꬃ ኦይክድ ደእያ ዎደ ዱረት ዝቃ በሳን ኡትዶሶና። 7 ታኒ አይለት ሃረይሳታዳ ፓራ ቶግድ ብሽን ቃስ ሃረይሳት አይለታዳ ቶሆን ሄመትሽን በአስ።

8 ኦላ ቦክያ አስ ሄ ኦላን ኩንዴስ፤ ግምበ ድርስ ላልያ ኡራ ሾሽ ዱኬስ። 9 ሹቹ ደንꬅያ አስ ሄ ሹቻን፥ ምꬅ ቀርያ አስ ሄ ምꬃን ደሸቴስ።

10 ዱንእዳ ካልታ ሌፎና ቀርኮ ዳሮ ዎልቃ ዉርሴስ፤ ሽን ጭንጫተꬃን ኦꬅያ ኦሱዋስ አይፈይ ደኤስ።

11 ሾሽ ዱክ አግን ሾሹ ዶቅያ ꬋለ ዎይስ ሄ ኡራ አይኮካ ማደና።

12 ጭንጫ አሳ ኦድ እያዉ ቦንቾ እምሴስ፤ ሽን ኤያይ ባ ዶናፐ ከይዳ ቃላን ባዉ መቶን ገሌስ።

13 ኤያይ ባ ሃሳያ ኤያ ቃላን ዶምድ፥ ኢታተꬃንነ ጎሻተꬃን ፖሌስ።

14 ኤያ አስ ዳሮባ ኦደቴስ። ግዶሽን፥ ስንꬃፈ ሀናናዉ ደእያባ ኦንካ ኤረና። አስ ሀይቅ አግን፥ ሀንያባ እያዉ ኦዳናዉ ዳንዳኤይ ባዋ።

15 ኤያ አስ ባ ኦሶን ዳቡሬስ፤ እ ባ ሶ ብያ ኦግያ ኤረና።

16 ናአ ግድዳ ካዎይነ ዎንታ ጉራ ግብራ ምያ ሀላቃት ደእያ ቢተ ነና አየ! 17 ቦንቸትዳ ካዎይነ ማꬆታናዉ ግዶናሽን ዎልቃነ ምኖተꬅ ደማናዉ ማራን ምያነ ኡያ ሀላቃት ደእያ ቢትያ አንጀትዳሮ።

18 አደይ አዛላ ግድኮ እያ ካራይ ዎዴስ፤ እያ ኩሸይ ኦꬆናባ ግድኮ፥ እያ ኬꬃይ ፆኬስ።

19 ካꬅ ሙሳንነ ዎይነ ኡሻን ኡፋይስ በንቴስ፤ ሽን ሚሸይ ኡባባ ሻሜስ።

20 ስእያ አስ ባዋ ጋዳ ነ ዎዛናን ካዎ ጫዮፓ፤ ዎይኮ ነ ዝንእያ ክፍልያን ዱረ ኡራ ባዶፋ። ነ ግዳይሳ ሳሎ ካፎይ ብድ ኤንታዉ ኦዳናዉ ዳንዳኤስ።