1 ነ ካꬃ ሃꬃ ቦላ የጋ፤ ዳሮ ጋላሳፐ ጉየ ኔኒ ዛራዳ ደማና። 2 ነዉ ደእያ ሻሉዋ ላፑን ዎይኮ ሆስፑን በሳን ሻካዳ ዎꬃ። ስንꬃፈ ሀ ሳኣ ቦላ አይ ኢታባይ ያነኮ ኔኒ ኤራካ።

3 ሻር እራ ቶክኮ ቢታ ቦላ እር ቡኬስ።

ምꬅ ፑደ ኩንድን ዱገ ኩንድን ባ ኩንድዳ በሳን ደኤስ።

4 ጫርኮ ናግያ ኦንካ ካꬅ ዘረና፤ ሻር ደንዳና ጋካናዉ ናግያ ኦንካ ባ ካꬃ ጫከና።

5 ጫርኮይ ብያ ኦግያነ ናእ ባ አየ ኡሎን ዋንድ መትያኮ ነ ኤሮናይሳዳ ኡባባ መꬍዳ ፆሳይ ባ ኦሱዋ ዋት ኦꬅያኮ ኤራናዉ ዳንዳአካ።

6 ጉራ ግድን ኦማርስ ነ ዘረꬅ ዘረይሳ አጎፋ፤ ዎንታይስ ዎይኮ ኦማርሳይስ ሎአነኮ ኔኒ ኤራካ።

7 ፖኦይ ኡፋይስያባ፤ አዋ አይፈ በኦይ ሎኦባ። 8 አስ አዱሳ ላይꬅ ሀ ሳአን ደእኮ ሄ ላይꬃን ኡፋይቶ። ሽን ሀ አላምያባይ ሀዳ ግደይሳነ ያና ꬉማ ዎደይ መርናዉ ዳናይሳ ቆፖ።

9 ነኖ ናአተꬃዉ፥ ናአተꬅ ዳሮ ሎኦባ ግድያ ግሾ ነ ናአተꬃ ላይꬃን ኡፋይታ፤ ነ ዎዛናይካ ኡፋይቶ። ነ አይፈይ በእዳባነ ነ ዎዛናይ አሞትዳባ ኡባ ፖላ። ሽን ሄ ኔኒ ኦꬅዳባ ኡባ ግሾ ነና ፆሳይ ፕርዳናዉ ደኤይሳ ዶጎፓ።

10 ናአተꬅነ ጎባተꬅ ሀዳ ግድያ ግሾ ነ ዎዛናፐ አዛኖ፥ ነ አሳተꬃፈ ኢታተꬅ ድጋ።