1 ነ ናአተꬃ ላይꬃን ነና መꬍዳይሳ ቆፓ። ኡንአ ጋላሳት ዮና ደእሽን፥ “ሀይስ ታና ኡፋይሰና” ጌተትያ ዎደት ጋኮና ደእሽን፥ 2 አውነ ፖኦይ፥ አጌንነ ፆልንቶት ꬉሞና ደእሽን፥ እር ቡክድ አꬍን፥ ሻር ስሞና ደእሽን፥ ነና መꬍዳይሳ ቆፓ። 3 ሄ ዎደይ ኬ ናገይሳት ኮኮርያ ዎደ፥ ምኖ አስ ኩንያ ዎደ፥ ጋጨይሳት ታይቦን ጉፅዳ ግሾ ጋቸ አግያ ዎደነ ማስኮተራ ፄለይሳት ዳቡርያ ዎደ ግዳና። 4 ሄ ዎደይ፥ ዎጋ ኦግያኮ ስምዳ ፐንገት ጎርደትያ ዎደ፥ ጋጭያ ዎፃ ግርሳይ ዝቅ ግያ ዎደ፥ ካፎ ዋሶይ አሰ ꬍስኮፈ ባርክስያ ዎደ፥ ማጫ ናይታ የꬃ ግርሳይ ለፕያ ዎደ ግዳና። 5 ሄ ዎደይ፥ ደረ ከያናዉ ፆነትያ ዎደ፥ ዳልጋ ኦገታራ ሄመታናዉ ያሽያ ዎደ፥ ላዉዘ ምꬅ ጪይያ ዎደ፥ ቦለይ ቃፃናዉ ፆነትያ ዎደ፥ አሞያባይ አግያ ዎደ ግዳና። ሄ ዎደይ፥ አስ ባ መርና ኬꬃ ብያ ዎደ፥ ዬከይሳት ዳልጋ ኦግያራ ዬክሸ ዩይያ ዎደ ግዳና።

6 ብራ ሳንꬃላታይ ዱፆና ደእሽን፥ ዎርቃ ከረይ መቆና ደእሽን፥ ሃꬃ ኦቶይ ፑልቱዋ ማታን መቆና ደእሽን፥ ሃ ኦላፈ ጎች ከስያ ዎዶሮይ ዱፆና ደእሽን፥ 7 ቢታይ ቢታኮ ስሞና ደእሽን፥ ሸምፖይ ባና እምዳ ፆሳኮ ስሞና ደእሽን፥ ነና መꬍዳይሳ ቆፓ። 8 አስታማረይ፥ “ሀዳ! ሀዳ! ኡባባይ ሀዳ” ያግስ።

9 አስታማረይ ጭንጫ ፃላላ ግዶናሽን ኤራካ ግድያ ግሾ ደርያ ታማርስስ። እ ዳሮ ሌምሶታ ፕልግድ እሱዋ እሱዋ እያ ማራን ማራን ዱማይድ ዎꬅስ። 10 አስታማረይ ልከ ግድዳ ቃላ ደማናዉ ኮይስ፤ ሄሳ ግሾ፥ እ ፃፍዳባይ ሱረነ ቱማ።

11 ጭንጫታ ቃላይ ሄንꬃንቾይ ዉደ ላግያ ፄራ ኦጮ ፃምአ መላ። እስፈ ሺቅዳ ሌምሶት ጋꬅ ኦይꬅያ ምስማረ መላ።

12 ታ ናአዉ፥ ሀ ኡባፈ ቦላራ ኔኒ ናገታናዉ ኮሽያባይ ደኤስ። ማፃፋ ፃፍድ ዉርሳናዉ ዳንዳኤተና። ቃስ ዳሮባ ፕልግድ አጎና እፆይ አሳተꬅ ዳቡርሴስ።

13 ሄኮ ኡባባይ ኦደትስ፤ ኡባባስ ኩሻይ ሀይሳ፤ ፆሰ ያይያ፤ እያ ኪታ ናጋ፤ ሄስ አሳስ ዋና ኦሶ። 14 ፆሳይ ኦሶ ኡባ ቃስ ጌምዳ ኡባ ሎኦ ግድን ኢታ ፕርዳናዉ ደኤስ።