1 ህዛ፥ ፆሳይ ዶስያ ናይታዳ እያ ዳንተ። 2 ክርስቶስ ኑና ዶስድ ባና ኑ ግሾ ፆሳስ ሳውያ እሞነ ያርሾ ኦꬅድ እምዳይሳዳ ህንተካ ሲቆን ደእተ። ከሳ 29:18፤ ማዝ 40:6.

3 ሽን ላይማተꬅ፥ ቱናተꬅነ ኡዘተꬅ አማንያ አሳስ በሶና ግሾ ህንተ ግዶን ኡባራካ ስኤቶፎ። 4 ፆሳ ጋላትተፐ አትሽን፥ ዬላያባይነ ኤያ ኦድ ዎይኮ ቅይ ህንተዉ በሶና ግሾ ህንተ ግዶን ኡባካ ደኦፖ። 5 ሀይሳ ኤርተ፤ ኦንካ ላይማተይ ዎይኮ ቱናባ ኦይ ዎይኮ ኡዘተይ ክርስቶሳ ካዎተꬃነ ፆሳ ካዎተꬃ ላታናዉ ዳንዳኤና። ኡዘተꬅ ኤቃ ጎይኖ መላ።

6 ሀይሳታ ጋሶን ፆሳ ሀንቆይ ኪተቶና አሳ ቦላ ያና ግሾ ኦንካ ህንተና ፓꬆና ኦዳን ጭሞፎ። 7 ሄሳ መላ አሳራ እስፈተꬅ ኦꬆፍተ። 8 ካሰ ህንተ ꬉማን ደእደታ፥ ሽን ሀእ ጎዳ ባጋራ ፖኦን ደኤታ። ህዛ፥ ፖኦ አሳዳ ፖኦን ስመረትተ። 9 ፖኦይ ሎኦተꬅ፥ ፅሎተꬅነ ቱማተꬅ አይፌስ።

10 ጎዳ ኡፋይስያባ ኦꬃናዉ ኮይተ። 11 ጎእ ባይና ꬉማ ኦሶ ቆንጭስተፐ አትሽን፥ እያራ እስፎፕተ። 12 ኤንቲ ጌማን ኦꬅያ ኦሱዋ ሀር አቶሽን ኦዳናዉካ ዬላዬስ። 13 ሽን ኡባባይ ፖኦን ከይያ ዎደ ቆንጨን በንቴስ። 14 ፖኦይ ኡባባ ቆንጨን በሴስ። ሄሳ ግሾ፥

15 ህዛ፥ ህንተ ዋንድ ደእያኮ አኬክ በእተ። ጭንጫታ ግድተፐ አትሽን፥ ኤያታ ግዶፕተ። 16 ላይꬃይ ኢታ ግድያ ግሾ እንጀትያ ዎደ ኡባ ጎኤትተ። ቆላ 4:5. 17 ሄሳ ግሾ፥ ጎዳ ሸነይ አይበኮ አኬክተፐ አትሽን፥ ኤዮፕተ።

18 ጌሻ አያናን ጋላስ ጋላስ ኩምተፐ አትሽን፥ ꬋዮኮ ህንተና ካለꬅያ ግሾ ዎይነ ኡሻን ማꬆቶፍተ። 19 ማዝሙረን፥ ሳባንነ አያና የꬃን፥ እሶይ እሱዋራ ኦደትተ። ቃስ ህንተ ዎዛናን የፅሸነ ሳቢሸ ጎዳ ጋላትተ። ቆላ 3:16-17. 20 ኑ ጎዳ የሱስ ክርስቶሳ ሱንꬃን ኡባ ዎደ ፆሳ አዋ ኡባባስ ጋላትተ።

21 ክርስቶሳ ቦንቹዋስ ግድ እሶይ እሱዋስ ሃረትተ።

22 ማቸቶ፥ ጎዳስ ሃረተይሳዳ ህንተ አዝናታስ ሃረትተ። ቆላ 3:18፤ 1 ጰፅ 3:1. 23 ክርስቶስ ዎሳ ኬꬃስ ሁጰ ግደይሳዳ አዝንካ ባ ማቼስ ሁጰ። ቃስ ክርስቶስ ባ አሳተꬅ ግድዳ ዎሳ ኬꬃ አሸይሳ። 24 ሽን ዎሳ ኬꬃይ ክርስቶሳስ ሃረተይሳዳ ማቸት ባንታ አዝናታስ ኡባባን ሃረታናዉ በሴስ።

25 አዝናቶ፥ ክርስቶስ ዎሳ ኬꬃ ዶስድ ባና እዉ እምዳይሳዳ ህንተካ ህንተ ማቸታ ዶስተ። ቆላ 3:19፤ 1 ጰፅ 3:7. 26 እ ዎሳ ኬꬃ ባ ቃላ ባጋራ ሃꬃን ሜጭድ ጌሽስ። 27 ክርስቶስ ዎሳ ኬꬃ ቅት ዎይኮ ሶምኦ ቱስ ዎይኮ ሄሳ መላባይ ባይና እ ኩመꬃ ቦንቹዋራ ጌሽነ ቦረቶናሮ ኦꬅድ ባኮ ሺሻናዉ ኮይድ ሄሳ ኦꬅስ። 28 ሄሳዳካ፥ አዝናት ባንታና ዶሰይሳዳ ባንታ ማቸታ ዶሳናዉ በሴስ። ባ ማችዉ ዶሰይስ ባና ዶሴስ። 29 ባና እፅያ አስ ኦንካ ባዋ፥ ሽን ክርስቶስ ዎሳ ኬꬃስ ኦይሳዳ ባ አሳተꬃ ሙዜስነ ናጌስ። 30 ኑኒ ክርስቶሳ አሳተꬃ ብልተታ።

31 ፆሳ ቃላይ፥ “ሄሳ ግሾ፥ አስ ባ አዋነ ባ አይዉ አግድ፥ ባ ማቸራ እስፈ ዳና፤ ኤንቲ ናምአይካ እስ አሾ ግዳና” ያጌስ። መ 2:24. 32 ሀይስ ግታ ፁራ፥ ሽን ታኒ ሄሳ ክርስቶሳባነ ዎሳ ኬꬃባ ሌምሶ ኦꬃዳ ኦዳይስ። 33 ግዶሽን፥ ህንተ እሶይ እሶይ ህንተ ማቸታ ህንተ፥ ህንተና ዶሰይሳዳ ዶስተ። እስ እስ ማቻ ባ አዝና ቦንቻናዉ በሴስ።