1 ናይቶ፥ ህንተ ጎዳባ ግድያ ግሾ ህንተና የልዳይሳታስ ኪተትተ። ሄስ ህንተዉ በሲያባ። ቆላ 3:20. 2 “ነ አይዉነ ነ አዋ ቦንቻ።” ሄስ ኡፋይሳ ቃል ደእያ ኮይሮ ኪታ። ከሳ 20:12፤ ዛረ 5:16. 3 “ነ ሄሳ ፖልያባ ግድኮ ኡባይ ነዉ እንጀታና፤ ነ ላይꬃይ ሳአ ቦላ አዱቃና።”

4 አዋቶ፥ ህንተ ናይታ ጎዳ ቃላ ታማርሶንነ ኤንታ ካለሶን ድችተፐ አትሽን፥ ኤንታና ጫምሶፕተ። ቆላ 3:21.

5 አይለቶ፥ ክርስቶሳስ ኪተተይሳዳ ህንተ ሳአ ጎዳታስ ያሻን፥ ቦንቾንነ ሱረ ዎዛናን ኪተትተ። ቆላ 3:22-25. 6 ኤንታ ስንꬃን ሳባ ደማናዉ ኤንቲ በእያ ዎደ ፃላላ ኦꬆፍተ። ሽን ክርስቶሳ አይለታዳ ፆሳ ሸንያ ዎዛናፐ ፖልተ። 7 አሳስ ግዶናሽን፥ ጎዳስ ግድ ህንተ ኩመꬃ ዎዛናፐ ኦꬅተ። 8 አይለ ግድን ዎይኮ ጎዳ ግድን እሶይ እሶይ ባ ኦꬅዳ ሎኦ ኦሱዋስ ጎዳፐ ዎይቶ ኤካናይሳ ኤሬታ።

9 ጎዳቶ፥ አሳ ሶምኦ በእድ ማዶና ጎዳይ፥ ሳሉዋን ደኤይሳ ኤሬታ። ሄሳ ግሾ፥ ህንተ አይለታ ማንደይሳ አግድ ኤንቲ ህንተዉ ቦንቾን ኪተተይሳ መላ ህንተ ኤንታዉ ሎኦባ ኦꬅተ።ቆላ 4:1፤ ዛረ 10:17፤ ቆላ 3:25.

10 ዉርሰꬃን፥ ጎዳንነ እያ ግታ ዎልቃን ምንተ። 11 ፃላሄ ጭሙዋ ኤቀታናዉ ዳንዳአና መላ ፆሳይ ህንተዉ እምዳ ኦላ ሚሽያ ኡባ ማእተ። 12 ኑ ኦላይ አሳራ ግዶናሽን፥ ሳሎን ደእያ ቱና አያና ኦላንቾታራ፥ ማታ አዋታራ፥ ሃረይሳታራነ ሀ ꬉማ አላምያ ዎልቃታራ።

13 ሄሳ ግሾ፥ ኢታ ጋላሳ ተቃናዉነ ኡባ ፖልድ፥ ምንድ ኤቃናዉ ህንተ ዳንዳአና መላ ፆሳ ኦላ ሚሸታ ኡባ ማእተ። 14-15 ቱማ ፄሳን ዳንጮዳ ዳንጭድ፥ ፅሎተꬃ ፁሩረዳ ትራን ዎꬅድ፥ ሳሮተꬃ ዎንገላ ህንተ ቶሁዋን ጫማዳ አꬅድ ምንድ ኤቅተ። እሳ 11:5፤ እሳ 59:17፤ 52:7. 16 ሄ ኡባፈ አꬅድ፥ ፃላሄይ የድያ ላፅያ ታማ ዶንገ ኡባ ቶይሳናዉ ዳንዳእያ አማኑዋ ኡባ ዎደ ጎንዳለዳ ኦይክተ። 17 ፆሳ አቶተꬃ ብራታ ባርኔፃዳ ህንተ ሁጰን ዎꬅተ፤ ቃስ ጌሻ አያና ማሻ እካ፥ ፆሳ ቃላ ኦይክተ። እሳ 59:17. 18 ዎሳ አጎፍተ፤ ሀራታስካ ጋናትተ፤ ኡባ ዎደ አያናን ዎስተ። ሄሳን፥ ጌሻታስ ሳለቶና ምንድ ኡባ ዎደ ዎስተ።

19 ታኒ ዎንገላ ፁራ ያሽ ባይና ቆንጭሳዳ ኦዳና መላ ፆሳይ ታዉ ቃላ እማና መላ ዎስተ። 20 ታኒ ሄሳ ኦꬃናዉ ኪተታስ ሀእካ ቃሾን ደኤይ ሄ ዎንገላ ግሾሳ። ያንያ ግሾ፥ ታኒ ያሽ ባይና በሰይሳዳ ኦዳና መላ ታዉ ዎስተ።

21 ታኒ ዋና ደእያኮነ አይ ኦꬅያኮ ህንተ ኤራና መላ ኑ ሲቆ እሻይ፥ ጎዳ ኦሱዋን አማነትዳ ኦሳንቾይ፥ ትክቆስ፥ ታባ ኡባ ህንተዉ ኦዳና። ሀዋ 20:4፤ 2 ፅሞ 4:12፤ ቆላ 4:7-8. 22 ኑኒ ኡባይ ዋንድ ደእያኮ ህንተዉ ኦዳና መላነ ህንተና ምንꬃና መላ ታኒ እያ ህንተኮ ኪታስ። መ 21:10.

23 ፆሳ አዋፐ፥ ጎዳ የሱስ ክርስቶሳፐ ሳሮተꬃይነ ሲቆይ አማኖራ እስፈ አማንያ ኡባስ ግዶ። 24 እርፆና ሲቆን ኑ ጎዳ የሱስ ክርስቶሳ ሲቅያ ኡባራ ፆሳ አꬎ ኬሀተꬃይ ግዶ።