ጳዉሎስ ፍልጵስዩሳ አሳስ
ፃፍዳ ኪታ
ጋꬃ ቆፋ
ጳዉሎስ ፍልጵስዩሳ አሳስ ፃፍዳ ኪታይ ፃፈትዳይ፥ ሮመ ካዎተꬃን፥ ማቀዶነ ቢታን፥ ፍልጵስዩሳ ካታማን ደእያ ዎሳ ኬꬃሳ። ሀ ኪታይ ፃፈትዳይ፥ ጳዉሎስ ቃሾ ኬꬃን ደእያ ዎደ ሀራ አማንያ ኦሳንቾት እያ እፅዳ ዎደነ ፍልጵስዩሳ ዎሳ ኬꬃን ደንድዳ ዎርዶ ትምርትያ ጋሶን እያ ዎዛናይ ዳሮ አዛንዳ ዎደ (1:21፤ 2:17፤ 3:10)። ግዶሽን፥ ጳዉሎስ የሱስ ክርስቶሳ ምንꬅድ አማንያ ግሾ ሀ ኪታን ቆንጭድ በንተይ፥ ኡፋይስነ ኩመꬃ አማነተꬅ። ፍልጵስዩሳን ደእያ ዳሮ አሳይ ሮመፐ ድኤትድ ይዳ አስ። ኤንቲ ሮመ ቢታስ ምሸቶሶናነ ቢታ ሎይꬅድ ናጎሶና። ኤንታፈ እሶት እሶት የሱሳ አማንዳ ግሾ፥ ባንታ ቢታ አሳን ጎደትዶሶና። ሄ ጎዳይ ኤንታ ቦላ መቶነ ማንቆተꬅ ኤህስ (ሀዋ 16:20-21)።
ጳዉሎስ ሀ ኪታ ፃፍዳ ጋሶይ እያ መቱዋ ዎደ እያ ማዳናዉ አማንያ አሳይ እሞታ እያዉ የድዳ ግሾነ እያዉ ዎስዳ ግሾ፥ ኤንታ ጋላታናሳ። እያ ቦላነ ኤንታ ቦላ ዱማ ዱማ መቶይ ጋክዳባ ግድኮካ ኤንቲ ምነታና መላነ ኩመꬅ አማነትድ ዳና መላ ኤንታ ምንꬄስ። ጬቆነ ኦቶሮ አግድ፥ የሱስ ክርስቶሳ አሽከተꬃን ኩማና መላ ምንꬅድ ኤንታ አኬክሴስ።
ኤንቲ የሱስ ክርስቶሳን ግድድ ደምዳ ደኦይ ፆሳ አꬎ ኬሀተꬃፈ ፑልትዳባነ አማኖን ኤክዳባፐ አትሽን አይሁደታ ዎጋ ናግድ ኤክዳባ ግዶናይሳ ኤንታ አኬክሴስ። የሱስ ክርስቶሳን ደእያ ኡባስ ፆሳይ እምያ ሳሩዋነ ኡፋይሳ ኤንታዉ ፃፌስ።
ሀ ኪታይ ኡፋይስ፥ አማነተꬅ፥ እስፈተꬅነ አማኖን ምንድ ዱሱ ቆንጭስድ በሴስ። ዉርሰꬃን ጳዉሎስ ፆሳ አማንያ አሳይ ሲቆን ዳና መላነ ክርስቶሳ ቆፋꬆ ዳና መላ ኤንታ ዞሬስ (2:2፤ 4:2-3)።
ማፃፋ አይፈ ቆፋታ
ገሎ ቆፋ (1:1-11)
ጳዉሎስ ሀንድ ደእያ ደኡዋ (1:12-30)
አሽከተꬃ ዱሳ ሌምሶ (2:1-18)
ፅሞትዮሳስነ ኤጳፍራድቱሳ (2:19-30)
ሞርከታፐነ ኢታታፐ ናገተꬅ (3:1—4:9)
ጳዉሎስ ፍልጵስዩሳ አሳ ጋላቴስ (4:10-20)
ሳሮꬆነ አንጆ (4:21-23)
1
1 ክርስቶስ የሱሳራ እስፍዳ ግሾ፥ ፆሳባ ግድዳ፥ ፍልጵስዩሳ ካታማን ደእያ ዎሳ ኬꬃ ጭማታስነ ዳቆነታ ኡባስ። የሱስ ክርስቶሳ አይለ ግድዳ፥ ጳዉሎሳፐነ ፅሞትዮሳፐ ኪተትዳ ኪታ። ሀዋ 16:12.
2 ኑ አዋ ፆሳፈነ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።
ጳዉሎሳ ጋላታ ዎሳ
3 ታኒ ህንተና ቆፕያ ዎደ ኡባን፥ ታ ፆሳ ጋላታይስ። 4 ታኒ ህንተ ኡባስ ፆሳ ዎስያ ዎደ ኡፋይሳን ዎሳይስ። 5 ህንተ ኮይሮ ጋላሳፐ ሀእ ጋካናዉ፥ ዎንገላ ማርካተይሳን ታራ እስፈ ግድድ፥ ታና ማድዳ ግሾ፥ ፆሳ ጋላታይስ። 6 ህንተ ግዶን ሎኦ ኦሶ ዶምዳ ፆሳይ፥ ክርስቶስ የሱሲ ስምያ ጋላሳይ ጋካናዉ፥ ፖላናይሳ ኤራይስ።
7 ህንተ ኡባ ዎደ ታ ዎዛናን ደኤታ። ታኒ ኡባ ዎደካ ሄሳዳ ቆፓናዉ በሴስ። ሀእ ታኒ ቃሾን ደአሸነ ቃሸታናፐ ስን ዎንገላ ናጎንነ ዎንገላ ምንꬃ ኤሶን ፆሳይ ታዉ ቃድዳ ቃዳ ህንተካ ታራ ሻከትደታ። 8 ታኒ ህንተና ኡባ ክርስቶስ የሱሳ ሲቁዋን አይ መላ ላሞትያኮ ፆሳይ ታዉ ማርካ።
9 ህንተ ሲቆይ ቱማ ኤራተꬃራነ አኬካራ እስፈ ጉጅ ጉጅ ድጫና መላ ፆሳ ዎሳይስ። 10 ሄሳን ህንተ ሎኦባ ሻክድ፥ ዶረይሳታ፥ ክርስቶስ ስምያ ጋላሳን ጌሻታነ ቦረቶናይሳታ ግዳና። 11 ህንተ ደኦይ ፆሳ ቦንቹዋስነ ጋላታስ የሱስ ክርስቶሳ ባጋራ በንትያ ፅሎተꬃ አይፍያን ኩምድ አይፋና።
ጳዉሎሳ ቃሾይ ዎንገላ ዳልግስስ
12 ታ እሻቶ፥ ታና ጋክዳ ኡባይ ዎንገላይ ዳልጋና መላ ቱማ ማድዳይሳ ህንተ ኤራና መላ ኮያይስ። 13 ታኒ ክርስቶሳ ግሾ ቃሸትዳይሳ፥ ካዎ ጋꬎ ናገይሳትነ ሀይሳን ደእያ ሀራት ኡባይ ኤሮሶና። ሀዋ 28:30. 14 ታ ቃሹዋ ጋሶን ኑ እሻታፐ ዳሮት ጎዳን ኬህ አማነትዶሶና። ሄሳ ግሾ፥ ፆሳ ቃላ ያሽ ባይና ካሰፐ ምንድ ኦዳና መላ ምኖተꬅ ደምዶሶና።
15 ግዶሽን፥ እሶት እሶት ቃናተንነ ፓላማን ክርስቶሳባ ኦዶሶና፥ ሽን ሀራት ሱረ ዎዛናፐ ኦዶሶና። 16 ሱረ ዎዛናፐ ኦደይሳት፥ ፆሳይ ታዉ ዎንገላ ናጋና መላ ሀዳራ እምዳይሳ ኤርያ ግሾ፥ ሲቆን ኦዶሶና። 17 ሽን ታና ቃናተይሳት ታ ቃሹዋ ቦላ ሀራ መቶ ኤሀናባ ኤንታዉ ዳንን ባንታና ዶስድ ክርስቶሳባ ኦዶሶናፐ አትሽን፥ ቱማ ዎዛናፐ ኦዶኮና።
18 ሄስ አይኮካ መተና። ቱማ ኦገን ግድን ዎይኮ ዎርዶ ኦገን ግድን ሄ ኡባን ክርስቶስ ሳባከቴስ። ታና ሄስ ኡፋይሴስ። ቃስ ሀራባይ ታና ኡፋይስያባይ፥ 19 ታኒ ህንተ ዎሳንነ የሱስ ክርስቶሳ አያና ማዱዋን አታናይሳ ኤርያ ግሾ ታና ኡፋይሴስ። 20 ታ ግታ አሞይነ ኡፋይሳን ናግያ ናጎይ ታ ዬላቶና አታናይሳ። ሽን ኡባ ዎደ ኦይሳዳ፥ ሀእካ ታኒ ፓፃ ደእን ዎይኮ ሀይቅን ያዮና ታ ኩመꬃ አሳተꬃን ክርስቶስ ቦንቸታና ጋዳ ምኖተꬃን ኦዳይስ። 21 ታ ደእኮካ ክርስቶሳ ፃላላስ ደአይስ፤ ቃስ ታ ሀይቅኮካ ታዉ አꬍዳ ዎ። 22 ሽን ታ ፓፃ ደእኮ አይፈይ ደእያ ኦሶ ኦꬃና። ሽን ፓፃ ደኤይሳፈነ ሀይቆፐ አዉሳ ዶራነኮ ታዉ ኤረተና። 23 ታኒ ሀ ናምአታፐ አዉሳ ዶራነኮ ኡንኤታስ። ሀ ደኡዋፐ ሻከታዳ ክርስቶሳራ እስፈ ዳናዉ አሞታይስ፤ ክርስቶሳራ እስፈ ደኤይስ ኡባፈ አꬍዳ ሎኦ። 24 ሽን ታኒ ህንተ ግሾ ፓፃ ደኤይስ ህንተዉ ዳሮ ኮሽያባ።
25 ሄሳ ታኒ ጌሻዳ ኤራይስ፤ ታኒ፥ ህንተ አማኖን ድጫናዳነ ኡፋይታናዳ ህንተራ ፓፃ ዳና። 26 ሄሳ ግሾ፥ ታኒ ህንተኮ ስማዳ ያ ዎደ፥ ክርስቶስ የሱሳራ ህንተ ደእያ ደኡዋን ታናን ደእያ ጬቀተꬃይ ህንተዉ ዳራና።
27 ኡባፈ አꬅድ፥ ህንተ ክርስቶሳ ዎንገላስ ቦንቾ ኤህያ ደኦ ደእተ። ታ ህንተና በእን ዎይኮ በኦና እፅን፥ ህንተ እስ ቆፋን ምን ኤቅድ፥ ሀራት ዎንገላን አማናና መላ እስ ዎዛናን ግድድ እስፈ ባፀተይሳ ታ ስአና። 28 ህንተ ሞርከታስ ያዮፍተ። ኤንቲ ህንተራ ኤቀትያባ ግድኮ ሄስ ህንተዉ አቶተꬃስ፥ ኤንታዉ ꬋዮስ ፆሳፈ ግድዳ ማላ። 29 ክርስቶሳስ ኦꬅያ ቃዳይ ህንተዉ እመትዳይ፥ ህንተ እያ አማናና መላ ፃላላ ግዶናሽን ህንተ እያ ግሾ መቶ ኤካና መላሳ። 30 ሄሳ ግሾ፥ ህንተ ታ ዋይያ ካሰ በእደታ፤ ሀእካ ታ ዋየተይሳ ስኤታ። ህንተካ ታ ዋይያ መላ ዋየተታ። ሀዋ 16:19-40.