1 ሄሳፈ ጉየ፥ ካዋ አርፀክስሳ ሀንቆይ ዶችን፥ ካውያ አስፂና ኦꬅዳባነ እ ቦላ ከይዳ አዋጁዋባ ቆፕስ። 2 ሄ ዎደ ካዋ ማታን ሀጋዝያ ናአተꬃታ አደት ሀይሳዳ ያግዶሶና፤ “ማላ ሎኦ ጌላኦታ ኮይድ፥ ካዋስ ኤሀና መላ፥ 3 ነ ካዎተꬃ ግዶን ደእያ ቢታ ኡባን ሀላቃታ ሹማ። ኤንቲ ማላ ሎኦ ጌላኦ ዶርድ፥ ሱሳ ካታማ ኤህድ፥ ማጫሳስ ጊግዳ ኬꬃን ዎꬆ። ያን ሄ ማጫሳ ኬꬃስ ካፖ ግድዳ ካዎ ሹፋ ሄጋያ ኩሸን ኤንቲ ደእሽን፥ ኤንታ ማላ ሎይꬅያባ ኡባይ ኤንታዉ እመቶ። 4 ሄሳፈ ጉየ፥ ኡባፈ አꬋዳ ካዋ ኡፋይስያ ጌላእያ አስፂን በሳን ካዎ ማቾ ግዶ” ያግዶሶና። ሀ ዞረይ ካዋ ኡፋይስዳ ግሾ፥ ካዎይ ሄሳዳ ኦꬅስ።

5 ያን ሱሳ ካታማን እስ ማርድክዮሳ ጌተትያ አይሁደ አስ ደኤስ። እ ያእራ ናአ፤ ያእር ሳመአ ናአ፤ ሳመእ ብንያመ ኮቸ ግድዳ ቂሳ ናአ። 6 ባብሎነ ካዎይ ናቡካዳናፆር ይሁዳ ካዋ ዮአክናነ ሀራ አይሁደ አሳ ኦላን ድእድ ኤፍዳ ዎደ ማርድክዮስ ኤንታራ ብስ። 7 እ ባ አዋ እሻ ናእዉ፥ እብራወꬆ ዶናን ሀዳሶ ጌተትያ አስትሮ ባራ ዎꬅድ ድቼስ። አስትራ መꬎንነ ጌሳን ዳሮ ማላ ሎኦ። እ አዋይነ አይያ ሀይቅዳፐ ጉየ፥ ማርድክዮስ እዮ ኤፍድ፥ ባ ናአ ኦꬅድ ድችስ።

8 ካዎይ ከስዳ አዋጁዋነ ኪታ ማራን፥ ሱሳ ካታማ ይዳ ዶረትዳ ዳሮ ጌላኦታፐ እስንያ አስትሮ። እያ ያዳ፥ ማጫሳስ ጊግዳ ኬꬃ ካፖ ግድዳ ሄጋ አዋተꬃ ጋርሳን ደአሱ። 9 ሄግ አስትሮ በእዳ ዎደ እን ዳሮ ኡፋይትስ፤ እዮ ዱማ ፄልስ። ኤለስድ ማናዉ ዱማ ካꬅነ ቦላ ትየትያባ እዉ እሚስ። ቃስ እዮ ማታን ሀጋዛና መላ ካዎ ጋꬎፐ ዶረትዳ ላፑን ናአተꬅ፥ ማጫሳታ ጊግዳ ኬꬃን፥ ክፍለ ኡባፈ አꬍድ ሎእያ ክፍለን እዮነ ኤንታና ዎꬅስ።

10 ማርድክዮስ እዉ ኮይሮትድ ኦድዳይሳዳ፥ አስትራ አይሁደ አስ ግደይሳ ኦደስካ ኦዳቡኩ። 11 ቃስ ማርድክዮስ አስትራ ዋና ደእያኮነ እዉ ሀንያባ በአናዉ፥ ማጫሳ ኬꬃ ስንꬃራ ጋላስ ጋላስ ገደነ ሃ ሄመቴስ።

12 ጌላኦት ካዋኮ ገላናፐ ኮይሮትድ፥ እስ ላይꬅ ኩመꬅ ባንታ ማላ ሎይꬅሸ ጋምኦሶና። ሄስካ፥ ኮይሮ ኡሱፑን አጌና ካርበ ዛይተን ጎርፐትሸ ጋምእድ፥ ናምአንꬆ ኡሱፑን አጌና ቃስ፥ ሎኦ ሳውያ ሽቶን ጎርፐቶሶና። 13 ሄሳፈ ጉየ፥ እስ ጌላእያ ካዋኮ ገልያ ዎደይ ጋክያ ዎደ፥ ባ ኮይዳ ማኡዋ ማአ ሎአዳ፥ ማጫሳ ኬꬃፈ ከያዳ፥ ካዎይ ደእያ በሳ ገላዉሱ። 14 ቃማ ገላዳ፥ ካዉዋራ አቅዳፐ ጉየ፥ ዎንታ ጉራ ከይኮ፥ ማጫሳት ደእያ ሀራ ኬꬅ እዮ ኤፎሶና። ሄ ኬꬃስ ካፖ ግድዳ ካዎ ሹፋይ ሻሻጋዝ እዮ ናጌስ። ካዎይ ዶስድ እ ሱንꬃ ፄግድ፥ “ኤበልቶ ኤህተ” ጎና እፅኮ፥ እያ ናምአንꬆ ካዋኮ ገላናዉ ዳንዳኡኩ።

15 ሄስ ሀንሽን፥ ካዋኮ ገልያ ታር አስትሮ ጋክስ። አስትራ ማርድክዮሳ አዋ እሻ አብካላ ናእዉ፤ ማርድክዮስ ባ ናአ ኦꬅድ ድችዳሮ። እያ ማጫሳስ ጊግዳ ኬꬃስ ካፖ ግድዳ ካዎ ሹፋ ሄጋይ ዞርዳይሳዳ ማኦ ማአሱ። እዮ በእዳ ኡባይ እ ማላ ናሽስ። 16 አርፀክስስ ካዎትዳ ላፑንꬃ ላይꬃን፥ ተቤታ ጌተትያ ታማንꬆ አጌናን አስትራ ካዎይ ደእያ በሳ ገላሱ።

17 እያ ገልዳ ዎደ፥ ካዎይ ሀራ ማጫሳ ኡባፈ አꬅድ፥ እዮ ዶስስ፤ ቃስ ሀራ ጌላኦታ ኡባፈ እን ኡፋይትስ። ሄሳ ግሾ፥ ካዎተꬃ ካላቻ እ ሁጰን ዎꬅድ፥ እዮ አስፂን በሳን ካዎ ማቾ ኦꬅስ። 18 ሄሳፈ ጉየ፥ ካዎይ አስትር ቦንቹዋስ ግታ ግብራ ጊግስድ፥ ሀላቃታነ ቢታ አይሰይሳታ ፄግስ። ቃስ ባ ካዎተꬃ ግዶን ኡፋይሳ ባለይ ቦንቸታና መላ አዋጅስ። ቢታ ኡባስ እስ ላይꬃ ጊራ ማርስ። እሞታካ ባ ኬሀተꬃ መላ ሁጰን ሁጰን እሚስ።

19 ጌላኦት ናምአንꬆ ሺቅድ ደእሽን፥ ማርድክዮስ ካዋ ዳባባን ኡትያ አሳፐ እሱዋ ግድስ። 20 ማርድክዮስ፥ “ኔኒ አይሁደ ግደይሳ ኦደስካ ኦዶፓ” ግዳ ግሾ፥ አስትራ ሀእ ጋካናዉ ኦደስካ ኦዳቡኩ። ካሰ ናአተꬃን ኪተተይሳዳ፥ ሀእካ እያዉ ኪተታዉሱ።

21 ማርድክዮስ ካዎ ኬꬃን ኦꬅሸ ደእያ ዎደ፥ ካዎይ ደእያ ክፍለታ ገልያ ፐንግያ ናግያ ካዎ ሹፋታፐ ናምአት፥ ጋባትነ ታር ካዋ አርፀክስሳ እፅድ፥ ዎꬋናዉ ማቀትዶሶና። 22 ኤንታ ማቁዋ ማርድክዮስ ስእድ፥ ካወ አስትርስ ኦድን፥ እያካ ማርድክዮሳ ሱንꬃን ካዋስ ኦዳሱ። 23 ካዎይ ሀንዳባ ፕልግድ ፄልያ ዎደ፥ ኦዳይ ቱማ ግድድ በንትን፥ ሄ ናምኡ አሳታ ካቅድ ዎꬍስ። ሀ ሀኖታይ ካዋ አርፀክስሳ ታርከ ፃፍያ ማፃፋን ፃፈትስ።