1 ሄሳፈ ጉየ፥ ካዎይ አርፀክስስ ሃማ ጌተትያ ባራ ኦይሳ ሹማተꬃ ꬎቅስድ፥ ባ ሀላቃታ ሀላቃ ኦꬅድ ሹምስ። ሃማ አዋይ ሀማዳት አጋጋ ኮቸ። 2 ካዎይ ኪትድ ዎꬅዳ ግሾ፥ ካዎ ጋꬎ ፐንገን ኦꬅያ ሀላቃት ኡባይ ሃም አꬍያ ዎደ ጉልባትድ እያ ቦንቾሶና። ግዶሽን፥ ማርድክዮስ ሃማስ ጉልባቶናነ እያ ቦንቾና እፅስ። 3 ሄ ዎደ ካዎ ጋꬎ ፐንገን ኦꬅያ ሀላቃት ማርድክዮሳ፥ “አይስ ካዋ ኪታ ፖሎና እፃይ?” ያግድ፥ 4 ጋላስ ጋላስ እያዉ ኦዶሶና። ሽን እ ኤንቲ ኦደይሳ ስአናዉ ኮይቤና። ኡባ ቃስ፥ “ታኒ አይሁደ አስ ግድያ ግሾ፥ ሃማስ ጉልባታናዉነ እያ ቦንቻናዉ ዳንዳእከ” ያግስ።

ሄሳፈ ጉየ፥ “ማርድክዮስ ኦድያ ጋሱዋ ስእድ፥ ሃም ዋናንዴሻ!” ያግድ እያዉ ኦድዶሶና። 5 ማርድክዮስ ባዉ ጉልባቶናይሳነ ባና ቦንቾናይሳ ሃም ኤርዳ ዎደ ሀንቆ ኤፅስ። 6 ሄሳ ቦላ ቃስ፥ ማርድክዮስ አይሁደ አስ ግደይሳ ኤርድ፥ እያ ፃላላ ዎꬎይ ላፋባ ግድ ቆፕዳ ግሾ፥ አርፀክስሳ ካዎተꬃን ደእያ አይሁደ ኮቻ ኡባ ꬋይሳናዉ ቆፕስ።

7 አርፀክስስ ካዎትዳ ታማነ ናምአንꬆ ላይꬃን፥ ንሳነ ጌተትያ ኮይሮ አጌናን፥ አይሁደታ ዎꬍያ አጌናነ ጋላሳ ኤራናዉ፥ ፑርማ ጌተትያ ሳማ እያ ስንꬃን የጋና መላ ሃም ኪትስ። ሄ ሳማይ ዎꬍዳ ማራን፥ አዳረ ጌተትያ ታማነ ናምአንꬆ አጌናን፥ ታማነ ሄꬓንꬆ ጋላስ አይሁደት ዉርያ ጋላስ ግደይስ ቃሸትስ።

8 ሄሳፈ ጉየ፥ ሃም ካዋ አርፀክስሳኮ ሀይሳዳ ያግስ፤ “ነ ካዎተꬃ ግዶን ኡባ በሳን ላለትድ ደእያ እስ ኮቻይ ደኤስ። ኤንታ ደኦ ማራይ ሀራ አሳይሳፈ ዱማ፤ ሄሳ ፃላላ ግዶናሽን፥ ኤንቲ ካዎ ህግያስ ሃረቶኮና። ሄሳ ግሾ፥ ኔኒ ኤንታ ደኦ ጋዳ ስእ ጊኮ፥ ሄስ ሎኦ ግደና። 9 ሄሳ ግሾ ካዋዉ፥ ሀ ቆፋይ ነና ኡፋይስኮ፥ ሀ አሳታ ዎꬍድ ꬋይሳና መላ አዋጆ ከሳ። ሄሳ ነ ኦꬅኮ፥ ታኒ ሄꬑ ፄታነ ኦይታሙ ሙኩሉ ክሎ ግራመ ብራ ካዎ ቡቁራ ምንጅያ ኬꬃ ገልሳናዳ፥ ነ ካዎተꬃ አይሰይሳታስ እማና” ያግስ።

10 ካዎይ ባ ማታ ኤርሳናዉ አዋጁዋ ቦላ ዎꬅያ ምግዶ ማታመ ባ ብራꬍያፈ ከስድ፥ አይሁደታ ሞርከ ግድዳ፥ አጋጋ ኮቻስ፥ ሀማዳታ ናኣ ሃማስ እሚስ። 11 ካዎይ ሃማ፥ “ኔኒ እማና ግዳ ብራይ ነ ማታን ደኦ፤ ሽን ሀ አሳታ ቦላ ነ ዶስዳባ ኦꬃ” ያግስ።

12 ሄሳ ግሾ፥ ኮይሮ አጌናን፥ ታማነ ሄꬓንꬆ ጋላሳን፥ ሃም ካዋ ፃፈታ ኡባ ፄግድ፥ ሄ አዋጆይ ቢታ ኡባን ደእያ አሳስ ዱማ ዱማ ዶናንነ ዱማ ዱማ ፕዳለን ፃፈትድ፥ ካዎፐ ጋርሳራ ቢታ ሃረይሳታስ፥ አዉራጃ ሃረይሳታስነ ደረ ሀላቃታ ኡባስ ኪተታናዳ ኪትስ። አዋጆይ ካዋ አርፀክስሳ ሱንꬃን ፃፈትድ፥ ምግዶ ማታመይ እያ ቦላ ዎሰትን፥ 13 ኪተትዳይሳት እያ ካዎተꬃ ኡባ ጋꬃናዳ ኪተትዶሶና። ሄ አዋጆይ፥ “አዳረ ጌተትያ ታማነ ናምአንꬆ አጌናን ታማነ ሄꬓንꬆ ጋላሳን፥ አይሁደ ኡባ፥ ያላጋ፥ ጭማ፥ ማጫ፥ አድያነ፥ ናይታ አሾና እስ ጋላስ ዉርስድ ዎꬍድ፤ ኤንታ ሻሉዋካ ቦንቅተ” ያጌስ። 14 ሄሳ ግሾ፥ ሄ ቃሸትዳ ጋላሳይ ጋክያ ዎደ አስ ኡባይ ጊገታናዳ፥ ሄ አዋጆይ ቢታ ኡባ ኪተትስነ አሳ ኡባስ አዋጀትስ።

15 ካዎይ ኪትዳይሳት ቢታ ኡባ ኪታ ጋꬅዶሶና። ቃስ ሱሳ ካታማንካ ኦደትስ። ያትን፥ ሱሳ ካታማ አሳ ኡባይ ዳጋምስ። ሽን ካዉዋራነ ሃማራ እስፈ ኡትድ፥ ዎይነ ኡሻ ኡዮሶና።