1 ሄ ዎደ ቃማ ካዋ ꬍስኮይ ኤኮና እፅስ። ሄሳ ግሾ፥ ካዎይ ካዎ ታርከ ፃፍያ ማፃፋ ኤህድ፥ ካሰ ሀንዳ ታርከታ እያዉ ናባባና መላ ኪትስ። 2 ናባበትዳ ታርከታፐ እሶይ ማርድክዮስ ኦꬅዳባ። ሄስካ፥ ካዎይ ደእያ ክፍልያ ናግያ፥ ጋባታነ ታራ ጌተትያ ናምኡ ሹፋት ካዋ ዎꬋናዉ ማቅዳ ማቁዋ ማርድክዮስ ቆንጭስስ። 3 ካዎይ፥ “ያትን፥ እ ሄሳ ኦꬅዳ ግሾ እያዉ እመትዳ ሹማተꬃይ ዎይኮ ዎይቶይ አይቤ?” ያግስ።

ካዋ አይለት ዛሪድ፥ “እያዉ አይኮይ ኦሰትቤና” ያግዶሶና።

4 ካዎይ ዛሪድ፥ “ካረ ዳባባን ደኤይ ኦኔ?” ያግስ። ሄ ዎደ ባ ጊግስዳ ምꬃን ማርድክዮሳ ካቃናዉ፥ ካዋ ኦይቻናዉ፥ ሃም ካረ ዳባባ ገልሸ ደኤስ።

5 ካዋ አይለት፥ “ሃም ካረ ዳባባን ኤቅስ” ያግዶሶና።

ካዎይ ዛሪድ፥ “ሃ ገላ ጊተ” ያግስ።

6 ሃም ገልዳፐ ጉየ ካዎይ፥ “ካዎይ ቦንቻናዉ ዶስያ አሳስ አይ ኦꬃናዉ ኮሺ?” ያግድ ኦይችስ።

ሃም፥ “ካዎይ ታፐ ሀራ ኦና ቦንቻናዉ ዶሲ?” ያግድ ባ ዎዛናን ቆፕስ። 7 ሄሳ ግሾ፥ ሃም ካዋስ ያግድ ዛርስ፤ “ካዎይ ቦንቻናዉ ዶስያ አሳስ፥ 8 ካዎይ ባ ካዎተꬃ ማኡዋ ኤህሶ፤ ባ ቶግያ ፓራ ሁጰን ጉቸ ዎꬆ። 9 ሄሳፈ ጉየ፥ ካዎይ ባ ሞርናታፐ እስ ዳሮ ቦንቸትዳይሳ ፄግስድ፥ ካዎተꬃ ማኦ እያ ማይዛናዳነ ካዋ ፓራ ቦላ እያ ኡትስድ፥ ካታማ ዳባባ ከሳናዳ ኪቶ። ያትኮ ሄ ዳሮ ቦንቸትዳ ሞርናይ እያ ስንꬃን ሄመትሸ፥ ‘ካዎይ ቦንቻናዉ ዶስያ ኡራስ ሀይሳዳ ኦꬄስ’ ያግድ አዋጆ” ያግስ።

10 ካዎይ ዛሪድ፥ ሃማ ሀይሳዳ ያግድ ኪትስ፤ “ህዛ ኤለሳ ደንዳዳ ካዎተꬃ ማኡዋነ ታ ፓራ ኤካዳ፥ ነ ግዳይሳዳ አይሁደ ግድዳ ማርድክዮሳስ ኦꬃ። እ ካዎ ኬꬅ ገልያ ፐንገን ደኤስ። ነ ግዳይሳፈ እስባካ አሾፋ” ያግስ።

11 ሄሳ ግሾ፥ ሃም ማርድክዮሳ ካዎተꬃ ማኦ ማይዝድ፥ ካዋ ፓራ ቦላ ኡትስስ። ቃስ ካታማ ዳባባን እያፐ ስንꬃራ ሄመትሸ፥ “ካዎይ ቦንቻናዉ ዶስያ ኡራስ ሀይሳዳ ኦꬄስ” ያግድ አዋጅስ።

12 ሄሳፈ ጉየ፥ ማርድክዮስ ካዎ ኬꬅ ፐንገ ጉየ ስሚድ ብስ። ሽን ሃም ዳሮ አዛንዳ ግሾ፥ ጉሉንትድ፥ ኤለስሸ ባ ሶ ብስ። 13 ባና ጋክዳባ ኡባ ባ ማቸ ዞሳርስነ ባ ላገታስ ኦድስ። ኤንቲ እያኮ፥ “እያ ስንꬃን ኔኒ ካዉያናዉ ዶምዳ ሀ አደይ፥ ማርድክዮስ፥ አይሁደ አስ ግድኮ፥ ነ እያራ ኤቀታዳ፥ እያ ፆናናዉ ዳንዳአካ፤ ቱማ እ ነና ꬋይሳና” ያግዶሶና።

14 ኤንቲ ቡሮ ሄሳ ኦደትሽን፥ ካዋ ሹፋት ጋክድ፥ ሃማ አስትራ ጊግስዳ ግብራስ ኤለስድ ኤፍዶሶና።