1 ካዎይነ ሃም አስትር ግብራ ማናዉ ብዶሶና። 2 ሄ ናምአንꬆ ጋላስ ግብራስ ብድ፥ ኤንቲ ዎይነ ኡሻ ኡይሽን፥ ካዎይ፥ “ካወ አስትረ፥ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ አይቤ? ሀር አቶሽን ታ ካዎተꬃፈ ባጋ ግድኮካ፥ ታኒ ነ ኦይሻ ፖላና” ያግድ ኦይችስ።

3 ካውያ አስትራ ዛራዳ፥ “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ዶስያባ ግድኮ፥ ታ ዎሳይነ ታ ኦይሻይ ታነ ታ አሳይ ሀይቆና አታና መላሳ። 4 ታነ ታ አሳይ እሶይካ አቶና ኡባይ ሀይቆስ ባይዘትዳ። ኑኒ ባይዘትዳይ ማጫ አይለነ አደ አይለ ግድድ ደአናሳ ግድያኮ፥ ታኒ ስእ ጋና። ሄሳ መላ መቶይ ካዋ ዋይሳናዉ በሲያባ ግደና” ያጋሱ።

5 ካዎይ አርፀክስስ ዛሪድ፥ “ሄሳ ኦꬃናዉ ፃልታምዳይ ኦኔ? እ ሄ አደይ አዉን ደኢ?” ያግድ ካውዉ አስትሮ ኦይችስ።

6 አስትራ፥ “ኑ ሞርከይ፥ ኑና ꬋይሳናዉ ኮየይ፥ ሀ ኢታ አድያ ሃማ” ያጋሱ።

ሄ ዎደ ሃም ካዋ ስንꬃንነ ካወ ስንꬃን ዳሮ ዳጋምስ። 7 ካዎይ ዳሮ ሀንቀትድ፥ ባ ኡትዳ በሳፈ ደንድ፥ ካዎ ጋꬎ አታክልተ በሳ ብስ። ሽን ሃም ካዎይ እያ ቦላ ኢታባ ኤሀናዉ ቆፕዳይሳ ኤርዳ ግሾ፥ አስትራ እያ ሀይቆፐ አሻና መላ ዎሳናዉ ጉየ አትስ።

8 ካዎይ አታክልተ በሳፈ ስሚድ ገልያ ዎደ፥ ሃም ካዊዉ አስትሮ ማሮታ ዎሳናዉ፥ እያ ኡትዳ አርሳ ቦላ ጉፋንዳይሳ በእስ። ካዎይ ይሎ ኤፅድ፥ ባ ቃላ ꬎቁ ኦꬅድ፥ “ላ ሀ አደይ ሀይሳን ካዎ ኬꬃን፥ ታ ስንꬃን፥ ካውዉ ካዉሻናዉ ኮይዬ?” ያግስ።

ካዎይ ቡሮ ሄሳ ሃሳይሽን፥ ካዎ ሹፋት ይድ፥ ሃማ ሶምኡዋ ጎዝዶሶና። 9 ኤንታፈ እሶይ፥ ሀርቦና ጌተትያ ሹፋይ፥ “ካዋዉ፥ ሃም ነና ሀይቆፐ አሽዳ ማርድክዮሳ ካቃናዉ ኤስዳ እሻታሙ ዋꬋ ምꬅ እያ ሶን ደኤስ” ያግስ።

ካዎይ ዛሪድ፥ “ሃማ ኤፍድ፥ ሄ ምꬃን ካቅተ” ያግድ ኪትስ።

10 ሄሳ ግሾ፥ ማርድክዮሳ ካቃና ግድ ጊግስዳ ምꬃን ሃም ካቀትስ። ሄሳፈ ጉየ፥ ካዋ ሀንቆይ ዶችስ።