1 አይሁደታ ሞርከይ ሃም ካቀትዳ ጋላስ ካዎይ አርፀክስስ ሃማ ሻሉዋ ኡባ ካወ አስትርስ እሚስ። ቃስ ማርድክዮስ እዉ ማታ ዳቦ ግደይሳ አስትራ ካዋስ ኦዳሱ። ሄሳ ግሾ፥ ሄ ዎደፐ ዶምድ፥ ማርድክዮስ ካዋኮ ገላናዉ ዳንዳእስ። 2 ካዎይ ሃማፐ ጉየ ኤክዳ ባ ምግዶ ማታምያ ከስድ፥ ማርድክዮሳስ እሚስ። አስትራ ማርድክዮሳ ሃማ ሻሉዋ ቦላ አዋያዳ ሹማሱ።

3 ሄሳፈ ጉየ፥ አስትራ ዬካሸ፥ ካዋ ቶሆ ቦላ ኩንዳዳ፥ አጋጋ ኮቸ ግድዳ ሃም አይሁደታ ቦላ ቱክዳ ኢታ ማቆይ ኦሶን ፔኦና መላ ካዋ ዎሳሱ። 4 ያትን፥ ካዎይ ባ ዎርቃ ፃምኣ እዉ ምጭን፥ እያ ደንዳ ኤቃዳ፥ 5 “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ኔኒ ዶስዳባ ግድኮ፥ ነ ካዎተꬃ ግዶን ደእያ አይሁደ ኡባ ኩመꬅ ዎꬋና መላ፥ አጋጋ ኮቸ ግድዳ ሀማዳታ ናአይ ሃም ከስዳ አዋጁዋ ሻርያ ሀራ አዋጆ ከሳናዳ ዎሳይስ። 6 ሀ ኡባ ꬋዮይ ታ አሳ ቦላነ ታ ዳቦታ ቦላ ጋክያ ዎደ ታኒ ስእ ጋዳ ዋና ፄሎ?” ያጋሱ።

7 ሄሳፈ ጉየ፥ ካዎይ አርፀክስስ፥ ካውዉ አስትሮነ አይሁደ ግድዳ ማርድክዮሳ ሀይሳዳ ያግስ፤ “ሃም አይሁደታ ዎꬋናዉ አዋጆ ከስዳ ግሾ፥ ታኒ ምꬃን እያ ካቅስዳይሳነ እያ ሻሉዋ ኡባ ካወ አስትርስ እምዳይሳ ህንተ ኤሬታ። 8 ግዶሽን፥ ካዎ ጋꬎ ማታመ ዎꬅን፥ ካዋ ሱንꬃን ከይዳ አዋጆይ ላመታናዉ ዳንዳኤና። ሄሳ ግሾ፥ ህንተ ህንተ ባጋራ አይሁደታ ማዳናዉ ኮይዳባ ፃፍተ። ሄሳ ታ ሱንꬃን ፃፍድ፥ ካዎ ማታምያ እያ ቦላ ዎꬅተ” ያግስ።

9 ንሳነ ጌተትያ ሄꬓንꬆ አጌናን፥ ላታማነ ሄꬓንꬆ ጋላሳን፥ ማርድክዮስ ካዋ ፃፈታ ኡባ ፄግድ፥ ህንደፈ ብድ ቶጰ ጋካናዉ ደእያ ፄታነ ላታማነ ላፑን ቢታታን ካዎፐ ጋርሳራ ሃረይሳታስ፥ አዉራጃ አይሰይሳታስነ ቢታ ሀላቃታስ የድያ አዋጆ ፃፍስስ። አዋጆይ ዱማ ዱማ ዶናንነ ዱማ ዱማ ፕዳለን ፃፈትስ፤ ቃስ አይሁደታስካ ኤንታ ዶናንነ ኤንታ ፕዳለን ፃፈትስ። 10 ማርድክዮስ ሄ አዋጁዋ ኡባ ካዋ አርፀክስሳ ሱንꬃን ፃፍስድ፥ ካዎ ማታመ ዎꬅድ፥ ካዎ ጋፃታን ꬊከትዳ፥ ኤሶትያ ፓራታ ቶግያ አሳታ ቦላ ቢታ ኡባ የድስ።

11 ካዎይ ከስዳ አዋጆይ፥ ካታማታን ደእያ አይሁደት እስፈ ሺቃናዉነ ባንታ ቦላ ያባ ኦለትድ ዛራናዉ ዳንዳአና መላ ማታ እሜስ። ቃስ ኦላ ሚሽያ ኦይክድ፥ አይ ቢታፈካ፥ ኤንታ ኦላናዉ የይሳታ፥ ኤንታ ናይታራነ ኤንታ ማቸታራ ኡባ እሱዋካ አሾና ዎꬋናዉነ ኤንታ ሻሉዋ ቦንቅድ ኤካናዉ ማታ እሜስ። 12 አይሁደት ካዋ አርፀክስሳ ካዎተꬃን ሄሳ ኦꬃናዉ ቃችዳ ጋላሳይ፥ አዳረ ጌተትያ ታማነ ናምአንꬆ አጌናን፥ ታማነ ሄꬓንꬆ ጋላሳና። 13 ካዋ አዋጁዋ ቢታታ ኡባን ደእያ አሳይ ኤራናዳ፥ ህገ ግድድ አዋጀትስ። ሄስካ አይሁደት ባንታ ሞርከታ ቦላ ሀሎ ከያናዉ ባንታና ጊግሳናዉ ዳንዳእሴስ። 14 ኪተተይሳት ካዎ ኬꬃ ፓራታ ቶግድ፥ ካዋ ኪታ ጋꬃናዉ ኤለስድ ብዶሶና። ቃስ ሱሳ ካታማን ሀ አዋጆይ አሳ ኡባስ ኦደትስ።

15 ማርድክዮስ ካሎሰነ ቦꬃ ካዎተꬃ ማኦ ማእድ፥ ኦቻ ቴራ ዳንያነ ሊኖፐ ኦሰትዳ ካባ ቦላራ ማእስ፤ ቃስ ግታ ዎርቃ ካላቻ ዎꬅድ፥ ካዋ ስንꬃፈ ከይስ። ሱሳ ካታማይ እልልሳንነ ኡፋይሳን ኖጩ ግስ። 16 ሄስ አይሁደታስ ግታ ኡፋይስ፥ እልልስነ ቦንቾ ዎደ ግድስ። 17 ሄሳ ግሾ፥ ካዋ አዋጆይ ናባበትዳ ቢታንነ ካታማ ኡባን ደእያ አይሁደት ግታ ባኣለ ከስድ፥ ኡፋይትሸነ ግብራ ምሸ ፔእዶሶና። ሄሳ ጋሶን አይሁደታስ ያይድ፥ ያን ደእያ ሀራ ዛረ አሳፐ ዳሮት አይሁደ ግድዶሶና።