1 አዳረ ጌተትያ ታማነ ናምአንꬆ አጌናን ታማነ ሄꬓንꬆ ጋላሳይ ጋክስ። ሄ ጋላስ፥ ካዎይ ኮይሮ ከስዳ አዋጁዋ ማራን ሞርከት አይሁደታ ፆናና ግዳ ቆፕዳ ጋላሳ። ሽን ኦዳይ ሽረት ዎꬍን፥ አይሁደት ባንታ ሞርከታ ፆንዶሶና። 2 ካዋ አርፀክስሳ ካዎተꬃን ደእያ አይሁደት ኡባይ ባንታና ቆሀናዉ ኮይያ ኡባ ꬋይሳናዉ ባንታ ካታማን ካታማን እስፈ ሺቅዶሶና። ሀራ ዛረ ግድዳ አሳይ ኤንታዉ ያይዳ ግሾ፥ ኤንታራ አይ አስካ ኤቀታናዉ ዳንዳእቤና። 3 ኤንቲ ማርድክዮሳስ ያይዳ ግሾ፥ ካዎፐ ጋርሳራ ቢታ ሃረይሳት፥ አዉራጃ አይሰይሳትነ ቢታ ሀላቃት ኡባይ አይሁደታ ማድዶሶና። 4 ማርድክዮስ ካዎ ጋꬎን ግታ ማት እመትዳነ ዎልቃን ጉጅ ጉጅ ብያ አስ ግደይስ ሄ ካዎተꬃን ደእያ ቢታ ኡባን ኤረትስ።

5 ሄ ጋላስ አይሁደት ባንታ ሞርከታ ኡባ ማሻን ጎይርድ ዉርስዶሶና፤ ባንታና እፅያ ኡባ ቦላ ኮይዳባ ኦꬅዶሶና። 6 ዋና ካታማ ግድዳ ሱሳ ፃላላን እቻሹ ፄቱ አሳ ዎꬍዶሶና። 7 ኤንቲ ፓርሻንዳታ፥ ዳልፎና፥ አስፓታ፥ 8 ፖራታ፥ አዳላ፥ አርዳታ፥ 9 ፓርማሽታ፥ አርሳያ፥ አርዳያነ ዋይዛታ ዎꬍዶሶና። 10 ኤንቲ አይሁደታ ሞርከ ግድዳ ሃማ ናይታ። ሽን ኤንቲ ኤንታ ሻሉዋ ቦንቅቦኮና።

11 አይሁደት ሱሳ ካታማን ዎꬍዳ አሳ ታይቦይ አፑነኮ ሄ ጋላስ ካዋስ ኦደትስ። 12 ያትን፥ ካዎይ ካውዉ አስትሮ፥ “አይሁደት ዋና ካታማ ግድዳ ሱሳ ፃላላን እቻሹ ፄቱ አሳነ ታሙ ሃማ ናይታ ዎꬍዶሶና። ሄስ ሄሳ ግድኮ፥ ካዋ ቢታታን ኤንቲ ዎꬍዳይ አፑና ግዳንደሻ! ቃስ ሀእ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ ሀራባይ አይቤ? ታኒ ነዉ ፖላና” ያግስ።

13 አስትራ ዛራዳ፥ “ካዋ ሀ ቆፋይ ኡፋይስኮ፥ ሱሳ ካታማን ደእያ አይሁደት ሀች ኦꬅዳይሳዳ ዎንቶካ ኦꬆ። ቃስ ታሙ ሃማ ናይታ አሃ ምꬃ ቦላ ካቃናዳ ኪታ” ያጋሱ።

14 ካዎይ ሄሳ ኦꬃና መላ ኪትስ። አዋጆይ ሱሳ ካታማን ናምአንꬆ አዋጀትን፥ ታሙ ሃማ ናይታ አሀይ ኮጫ ቦላ ካቀትስ። 15 አዳረ ጌተትያ አጌናን ታማነ ኦይዳንꬆ ጋላሳን፥ ሱሳ ካታማን ደእያ አይሁደት እስፈ ሺቅድ፥ ሀራ ሄꬑ ፄቱ አሳ ዎꬍዶሶና፤ ሽን ሀእካ ኤንታ ሻሉዋ ቦንቅቦኮና።

16 ሄ ዎደ ሱሳ ካታማፐ ጋፃራ ደእያ ካዋ ቢታታን ደእያ አይሁደት እስፈ ሺቅድ፥ ባንታ ሞርከታ ኡባ ኦልዶሶና። ኤንቲ ላፑን ታማነ እቻሹ ሙኩሉ አሳ ዎꬍዳፐ ጉየ ባንታ ሞርከታፐ ሸምፕዶሶና። ሽን ኤንታ ሻሉዋ ቦንቅቦኮና። 17 ሀይስ ኡባይ ሀንዳይ አዳረ ጌተትያ አጌናን ታማነ ሄꬓንꬆ ጋላሳና። ታማነ ኦይዳንꬆ ጋላሳን ኤንቲ ሸምፕዶሶና፤ ግብራ ምሸ፥ ኡይሸነ ኡፋይትሸ ፔእያ ጋላስ ኦꬅዶሶና።

18 ሽን ሱሳ ካታማን ደእያ አይሁደት ታማነ ሄꬓንꬆነ ታማነ ኦይዳንꬆ ጋላሳን ዎꬍሸ ፔእድ፥ ታማነ እቻሻንꬆ ጋላሳን ሸምፕዶሶና። ኤንቲ ሄ ጋላሳ ምሸ፥ ኡይሸነ ኡፋይትሸ ፔእያ ጋላስ ኦꬅዶሶና።

19 ሄሳ ግሾ፥ ጉꬃ ካታማታን ደእያ አይሁደት ሀች ጋካናዉ አዳረ ጌተትያ አጌናን ታማነ ኦይዳንꬆ ጋላሳ ባኣለ ጋላስ ኦꬅድ ቦንቾሶና። ሄ ጋላሳን ሞሶናነ ኡዮሶና፤ ቃስ እሶይ እሱዋስ እሞታ እሞሶና። 20 ማርድክዮስ ሀ ሀንዳ ታርከ ኡባ ፃፍድ፥ ካዋ አርፀክስሳ ቢታ ኡባን፥ ሃሆንነ ማታን ደእያ አይሁደ ኡባስ የድስ። 21 ሄ ዳብዳብያን ማርድክዮስ አዳረ አጌናን ታማነ ኦይዳንꬆነ ታማነ እቻሻንꬆ ጋላሳታ፥ አይሁደት ላይꬃን ላይꬃን ባኣለ ጋላስ ኦꬅድ ቦንቻና መላ ኤንታዉ ኦድስ። 22 ሄ ጋላሳት አይሁደት ባንታ ሞርከታፐ ሸምፖ ደምዳ ጋላሳታ። ቃስ ሄ አጌናይ ኤንታ አዛኖይነ ዬሆይ ኡፋይሳንነ ግብራ ሙሳን ላመትዳ አጌና። ሄሳ ግሾ፥ ኤንቲ ሙሳንነ ኡሻን ኡፋይትሸ፥ እሶይ እሱዋስነ ማንቆታስ ካꬃ እሞታ እምሸ ቦንቻና መላ ኤንታዉ ኦድስ።

23 አይሁደት ማርድክዮስ እምዳ ኪታ ኤክድ፥ ኤንቲ ቦንቻናዉ ዶምዳ ባልያ፥ ላይꬃን ላይꬃን አጎና ቦንቻናዉ ማእዶሶና። 24 አጋጋ ኮቻይ፥ ሀማዳታ ናአይ ሃም፥ አይሁደታ ኡባ ሞርከይ፥ ኤንታ ꬋይሳናዉ ካሰ ማቀትድ ኤንታ ዎꬍያ አጌናነ ጋላሳ ኤራናዉ ፑርማ ጌተትያ ሳማ የግስስ። 25 ሽን አስትራ ካዋኮ ገልዳፐ ጉየ፥ ሃም አይሁደታ ቦላ ማቅዳ ኢታ ማቆይ ኡባይ ጉየ ስሚድ፥ እያ ቦላ ፖለታናዳ ካዎይ ፁፈን ኪትስ። ያትን፥ ሃምነ እያ ታሙ ናይት አሀይ ምꬃን ካቀትስ 26 ሄሳ ግሾ፥ ሀ ናምኡ ጋላሳት ፑርማ ባኣለ ጌተቶሶና። ሀ ዳብዳብያን ኤንታዉ ፃፈትዳባ ኡባ ጋሶን፥ ኤንቲ ባንታ አይፈን በእዳባ ጋሶንነ ኤንታ ቦላ ጋክዳባ ጋሶን 27 አይሁደት ባንታዉ፥ ባንታ ኮቻታስነ አይሁደ ግዳናዉ ኮይያ ኡባስ፥ ሀ ባልያ ዎጋ ኦꬅድ ቦንችዶሶና። ሄስካ ላይꬃን ላይꬃን አጎና ሀ ናምኡ ጋላሳታ ቦንቻና መላሳ። 28 ሄ ጋላሳት የለታ ኡባን፥ ካታማታ ኡባን፥ አይሁደታ ኬꬃ ኡባንነ ቢታ ኡባን ቦንቸታና መላ ቃሸትስ። ሄስካ፥ አይሁደት አዉደ ግድኮካ፥ ሀ ፑርማ ጋላሳታ ቦንቻናዉነ ሄ ጋላሳታን ሀንዳባይ ኤንታ ኮቻን ዶገቶና መላ ቆፓናዉ በሴስ።

29 ሄሳፈ ጉየ፥ አብካላ ናእያ፥ ካውያ አስትራነ አይሁደ አደይ ማርድክዮስ፥ ፑርማ ባልያባ ካሰ ፃፍዳ ዳብዳብያ ምንꬃናዉ ሀይሳ ናምአንꬆ ዳብዳብያ ኩመꬃ ማታን ፃፍዶሶና። 30 ሄ ዳብዳበት አርፀክስሳ ካዎተꬃን፥ ፄታነ ላታማነ ላፑን ቢታን ደእያ አይሁደታ ኡባስ ሳሮይነ ዎፓተꬅ ግዶ ግያ ሳሮታራ ፃፈትድ ኪተትዶሶና። 31 ቃስ ኤንቲ ካሰ ፆማናዉነ ካዮታናዉ ዎጋ ከስዳይሳዳ፥ ሀእ ኤንታ ግድን፥ ስንꬃፈ ያና ኤንታ ኮቻታ ግድን፥ ሀ ፑርማ ጋላሳታ ላይꬃን ላይꬃን ዎጋ ኦꬅድ ቦንቻና መላ ሄ ዳብዳበት ቆንጭሶሶና። ሄስ አይሁደ አደይ ማርድክዮስነ ካውያ አስትራ እስፈ ዞረትድ ከስዳ ኪታ። 32 ካወ አስትር ኪታይ ፑርማ ባኣለ ዎጋ ምንꬅስ፤ እካ ማፃፋን ፃፈትስ።