1 ሄ ዎደ ሌወ ቆሞ ግድዳ እስ ኡራይ ሌወ ማጫስ እስዉ ኤክስ። 2 ሄ ማጫስያ አደ ናአ የላሱ። ናአይ ማላ ሎኦ ግደይሳ በአዳ ሄꬑ አጌና ቆሳሱ። 3 ሽን እያ ሄሳፈ ዳሮ ቆሳናዉ ዳንዳኦናይሳ ኤራዳ፥ ማቃፈ ዳቾ ዳዳዳ፥ ማደ መላባ ትያዳ ናኣ እያን ዎꬃሱ። ያታዳ ናይለ ሻፋ ጋፃን ማይጫ ግዶን ዎꬃሱ። 4 እያ ምችያ እያ ጋክያባ በአናዉ ሃሆን ኤቃሱ።

5 ግብፀ ካዉዋ ናእያ ቦላ ሜጨታናዉ ናይለ ሻፋ ዎꬋሱ። እ ማጫ አይለት ሃꬃ ዶናን ይያ ሃ ስመረቶሶና። እያ ዳቾ ማይጫ ግዶን ደማዳ፥ ባ አይልዉ ባዳ ኤሀና መላ ኪታሱ። 6 ዳቾ ዶያዳ ሄ ጉꬃ ናኣ በአሱ። እ ዬከይሳ በአዳ ቃታዳ፥ “ሀይስ እብራወታ ጉꬃ ናይታፐ እሱዋ” ያጋሱ።

7 ሄ ዎደ እያ ምችያ ካዉዋ ናኤኮ፥ “ሀ ናኣ ꬋንꬃና መላ እብራወ ማጫስ ነዉ ኤሆ?” ያጋዳ ኦይቻሱ።

8 እያ፥ “ኤ፥ ኤሀ” ያጋሱ። ናእያ ባዳ ናኣ አይዉ ኤሀሱ። 9 ካዉዋ ናእያ ማጫስዉ፥ “ሀ ናኣ ኤፋዳ፥ ታዉ ꬋንꬃ፤ ድቻ፤ ታኒ ነዉ ዳሞዘ ቃንፃና” ያጋሱ። ማጫስያ ናኣ ኤፋዳ ꬋንꬃሱ። 10 ናአይ ድጭን፥ ካዉዋ ናኤኮ ኤሀሱ፤ እ እዉ ናአ ግድስ። “ታኒ ሃꬃፈ እያ ከሳ ኤካስ” ጋዳ፥ እያ ሙሰ *ሙሰ: እብራወꬆ ዶናን ሙሰ ጉሳይ “ከሶ” ጉሱ ጋዳ ሱንꬃሱ።

11 ሙሰይ ድጭዳፐ ጉየ እስ ጋላስ ባ አሳ በአናዉ ብድ፥ ኤንቲ ዴፆ ኦሶ ኦꬅሽን ኤንታ በእስ። ግብፀ አስ እሶይ እብራወታፐ እሱዋ ባ ያራ ዋꬍሽን በእስ። 12 እ ይያ ሃ ፄልን፥ ኦንካ ባይናይሳ በእድ፥ ሄ ግብፀ ኡራ ዎꬍድ ሻፈን ቆስስ። 13 ዎንተꬃ ጋላስ ከይድ፥ ናምኡ እብራወት ዋትሽን በእስ። ቆሄይሳኮ፥ “ኔኒ ነ ዳቡዋ አይስ ሾጫይ?” ያግድ ኦይችስ።

14 ሄ ኡራይ፥ “ነና ኑ ቦላ ሃረይሳነ ዳይና ኦꬅዳይ ኦኔ? ኔኒ ዝነ ግብፀ ኡራ ዎꬍዳይሳዳ፥ ታናካ ዎꬋናዉ ኮያይ?” ያግስ። ሙሰይ ሄ ዎደ፥ “ታኒ ኦꬅዳባይ አሳን ኤረትስ” ያግ ቆፕድ ያይስ።

15 ካዎይ ሄሳ ስእዳ ዎደ፥ ሙሰ ዎꬍሳናዉ ኮይስ። ሽን ሙሰይ በትድ፥ ምድያመ ቢታን ደአናዉ ብስ።

እስ ጋላስ እ ሃꬃ ኦላ ዶናን ኡትስ።

16 ሄ ዎደ ምድያመ ካህነ እሱዋስ ላፑን ማጫ ናይት ደኦሶና። ኤንቲ ባንታ አዋ ዶርሳታ ጎንገን ሃ ዱቅ ኡሻናዉ ይዶሶና። 17 ሄንꬃንቾት ይድ ማጫ ናይታ ጎድዶሶና። ሽን ሙሰይ ኤንታ ማድድ ኤንታ ዶርሳታ ሃ ኡሽስ።

18 ኤንቲ ባንታ አዋ የቶራኮ ይዳ ዎደ፥ “ሀች ዋን ኤለስ ይደቲ?” ያግድ ኦይችስ።

19 ኤንቲ ዛሪድ፥ “ግብፀ አስ እሶይ ኑና ሄንꬃንቾታፐ አሽስ። ሃ ዱቅድ ዶርሳታ ኡሽስ” ያግዶሶና።

20 እ ባ ማጫ ናይታ፥ “ያትን እ አዉን ደኢ? ህንተ ሄ ኡራ አይስ አግድ ይደቲ? ኑራ ካꬅ ማና መላ አነ እያ ፄግተ” ያግስ።

21 ሙሰይ ሄ አድያራ ያን ደአናዉ ቆፋ ቃችስ። ዮቶር ባ ናእዉ ስፖሮ ሙሰስ ማቾ ኦꬅድ እሚስ። 22 ስፖራ አደ ናአ የልን፥ ሙሰይ እያ፥ “ታኒ ሀ ቢታን በተ አስ” ግድ ገርሳማ ግድ ሱንꬅስ።

23 ዳሮ ላይꬃፈ ጉየ ግብፀ ካዎይ ሀይቅስ። ሽን እስራኤለት ባንታ አይለተꬃን ኡንኤትድ ዋስዶሶና። ባንታ አይለተꬃን ኤንቲ ዋስዳ ዋሶይ ፆሳኮ ጋክስ። 24 ፆሳይ ኤንታ ዋሱዋ ስእድ፥ እ አብራሃመራ፥ ይሳቃራነ ያይቆባራ ጫቅዳ ጫቁዋ ሀሳይስ። 25 ፆሳይ እስራኤለታ አይለተꬃ ኡንኣ በእድ ኤንታና ቆፕስ።