1 ባንታ ሶ አሳ ኡባ ኤክድ፥ ያይቆባራ ግብፀ ብዳ እስራኤለ አደ ናይታ ሱንꬃይ ሀይሳፈ ካልድ ፃፈትዳይሳ፤ 2 ኤንትካ ሮቤላ፥ ስሞና፥ ሌወ፥ ይሁዳ፥ 3 ይሳኮራ፥ ዛብሎና፥ ብንያመ፥ 4 ዳነ፥ ንፍታለመ፥ ጋደነ አሴራ። 5 ያይቆባ ሼሻት ኡባይ ላፑን ታማ። ዮሰፍ ካሰካ ግብፀን ደኤስ። 6 ዎደፐ ጉየን ዮሰፍ፥ እያ እሻትነ ሄ የለተꬃ ኡባይ ሀይቅዶሶና። 7 ሽን እስራኤለ ሼሻይ የለትድ ግብፀ ቢታ ኩማና ጋካናዉ ታይቦን ዳርዶሶናነ ምንዶሶና።

8 ሄሳፈ ጉየ፥ ዮሰፋ ኤሮና ሀራ ካዎይ ግብፀ ቢታን ካዎትስ። 9 ሄ ካዎይ ባ አሳ፥ “ሄኮ፥ ሀ እስራኤለት ኑፐ አꬍድ የለተꬃንነ ዎልቃን ዳርዶሶና። 10 ኑኒ ሂላቶና እፅኮ ኤንቲ ታይቦን ካሰይሳፈ ሃ ዳራና። ቆፖና ኦል ደንድኮ ኤንቲ ኑ ሞርከታራ እስፍድ ኑና ኦልድ፥ ቢታ የግድ ባናዉ ዳንዳኦሶና” ያግስ። 11 ሄሳ ግሾ ዴፆ ኦሶን ኤንታ ኡንኤꬃና መላ ኤንታ ቦላ ኢታ ካፖታ ዎꬅዶሶና። ኤንቲ ፕቶማነ ራምሰ ጌተትያ ሻሎ ዎꬅያ ካታማታ ካዋስ ኬፅዶሶና። 12 ሽን ግብፀት ኤንታ ዳርስ ኡንኤꬅንካ ኤንቲ ሃ ዳርድ የለትዶሶናነ ቢታ ጋክዶሶና። ግብፀት እስራኤለታ እፅዳ ግሾ ያይዶሶና። 13 ኤንታና ኢታ ኦሶ ኦስስዶሶና። 14 ኡርቃ የꬍሶን፥ ስምንቶን ፁበ መꬎን ቃስ ጋደ ኦስሶን ኤንታ ደኡዋ ጫምስዶሶና። ቃይ ባይና ዴፆ ኦሶ ኡባ ኤንታ ኦስስዶሶና።

15 ግብፀ ካዎይ ቃንꬃ እብራወ ማጫሳታ ኡሎ ፕትያ ስፖሮነ ፑሆ ጌተትያ ናምኡ ማጫሳታኮ ሀይሳዳ ያግስ፤ 16 “እብራወ ማጫሳት የልያ ዎደ የለትዳ ናአይ አደ ግድኮ ዎꬍተ፥ ሽን ማጫ ግድኮ ፓፃ አግተ” ያግስ። 17 ሽን ኡሎ ፕተይሳት ፆሰ ባቢድ፥ ግብፀ ካዎይ ኪትዳይሳዳ ኦꬅቦኮና። ኤንቲ አደ ናይታ ፓፃ አግዶሶና። 18 ሄሳፈ ጉየ፥ ግብፀ ካዎይ ሄ ኡሎ ፕተይሳታ ፄግድ፥ “ህንተ አይስ ሀይሳ ኦꬅደቲ? አደ ናይታ አይስ ፓፃ አገቲ?” ያግድ ኤንታ ኦይችስ።

19 ኡሎ ፕተይሳት ዛሪድ፥ “እብራወ ማጫሳት ግብፀ ማጫሳታ መላ ግዶኮና። ኤንቲ ምኖ ግድያ ግሾ ኡሎ ፕተይሳት ጋካናፐ ስንꬃትድ የሎሶና” ያግዶሶና።

20 ሄሳ ግሾ ፆሳይ ኡሎ ፕተይሳታስ ኬህስ። እስራኤለ አሳይ ካሰይሳፈ ሃ ዳርሸነ ምንሸ ብዶሶና። 21 ቃስ ኡሎ ፕተይሳት ፆሳስ ያይዳ ግሾ ፆሳይ ኤንታዉ ኤንታ ሶ አስ እሚስ። 22 ሄሳፈ ጉየ ካዎይ ባ አሳ ኡባኮ፥ “እብራወታፐ የለትያ አደ ኡባ ናይለ ሻፋን የግተ፤ ሽን ማጫ ናእ የለትኮ ፓፃ አግተ” ያግድ ኪትስ።