1 ዮሰፍ ባ አዋ አሀ ቦላ ኩንድድ፥ ዬርሸ እያዉ ዬክስ። 2 ሄሳፈ ጉየ፥ ዮሰፍ ꬋለ ሺሽያ ባ ኦሳንቾታ፥ ባ አዋ እስራኤለ አሀ ሽቶ ትይድ መልሳና መላ ኪትስ። ኤንቲ ትይድ መልስዶሶና። 3 ሽቶ ትሻ ዎጋይ ኦይታሙ ጋላስ ኩመꬅ ኤኬስ። ግብፀ አሳት እያዉ ላፑን ታሙ ጋላስ ዬክዶሶና።

4 ዬሆ ጋላሳት አꬍዳ ዎደ፥ ዮሰፍ ግብፀ ካዋ ኦሳንቾታ፥ “ታኒ ህንተ ስንꬃን ሳባ ደምዳባ ግድኮ፥ ታዉ ካዋስ ሀይሳዳ ያግድ ኦድተ። 5 ‘ታ አዋይ ታና እስ ጫቆ ጫቅስስ። ታኒ ሀይቃናዉ ማታስ። ታኒ ታ ሁጰን ካናነ ቢታን ቦክዳ ጎንጎሎ ዱፉዋን ታና ሞጋ’ ያግስ። ሄሳ ግሾ፥ ‘ሀእ ታኒ ያ ባዳ ታ አዋ ሞጋዳ ስማና መላ ታና የዳርክ’ ያግተ” ያግስ።

6 ያትን ካዎይ፥ “እ ነና ጫቅስዳይሳዳ ባዳ ነ አዋ ሞጋ” ያግስ።

7 ያትን ዮሰፍ ባ አዋ ሞጋናዉ ብስ። ካዋ ሞርናት ኡባይ፥ ካዋ ኬꬃንነ ግብፀን ደእያ ግታ አሳት ኡባይ ዮሰፋ ካልድ ብዶሶና። 8 ዮሰፋ ሶ አሳ ኡባይ፥ እያ እሻትነ እያ አዋ ሶ አሳት ዮሰፋራ ብዶሶና። ኤንታ ዮጋ ናይት፥ ኤንታ ዶርሳት፥ ኤንታ ዴሻትነ ኤንታ ሚዛ ዉድያ ፃላል ጌሳመን አትስ። 9 ፓራ ጋረትነ ቶጋት እያራ ብዶሶና። እያ ካልድ ብዳ አሳይ ዳሮ።

10 ኤንቲ ዮርዳኖሰ ሻፋ ማታን ደእያ አፃደ ጌተትያ ዉዱማ ጋክድ፥ ባንታ ቃላ ꬎቁ ኦꬅድ፥ ዘሌልድ ዬክዶሶና። ያን ዮሰፍ ባ አዋ ዬሁዋን ላፑን ጋላስ ኡትስ። 11 ሄ ቢታን ደእያ ካናነ አሳት አፃደ ዉዱማን ሄ ዬሁዋ በእዳ ዎደ፥ “ግብፀት አይብ ይባታ ዬሆ ዬኮና?” ያግዶሶና። ሄሳ ግሾ፥ ዮርዳኖሰ ማታን ደእያ ሄ በሳይ አቤል-ምፅራማ (ግብፀታ ዬሆ) ጌተትስ።

12 ያይቆባ ናይት ኤንታ አዋይ ኤንታ ኪትዳይሳዳ ኦꬅዶሶና። 13 ኤንቲ እያ አሀ ካናነ ቢታ ኤፍድ፥ ማምረፐ ኡሻቻ ባጋን ደእያ ማክፌላ ጎንጎሉዋን ሞግዶሶና። ሄስካ፥ አብራሃመይ ህተ አድያ ኤፍሮናፐ ሞጎስ ሻምዳ ጋድያ። 14 ዮሰፍ ባ አዋ ሞግዳፐ ጉየ፥ ባ እሻታራነ እያ አዋ ሞጋናዉ እያራ ብዳ ሀራ አሳታ ኡባታራ ግብፀ ስምስ።

15 ባንታ አዋይ ሀይቅዳፐ ጉየ፥ ዮሰፋ እሻት ባንታ ግዶን፥ “ኑኒ እያዉ ኦꬅዳ ኢታባ ኡባስ ዮሰፍ ኑና ባ ኡሎን ሞርክድ ሀሎ ከያናዉ ኮይኮ ኑኒ ዋናኔ?” ያግዶሶና። 16 ሄሳ ግሾ፥ ዮሰፋኮ ያግድ ኪታ ኪትዶሶና፤ “ነ አዋይ ሀይቃናፐ ስን ኑኮ፥ 17 ‘ኔኒ፥ ነ እሻታ ናጋራነ ኤንታ ኢታ ናቁዋ ሀያና አቶ ያጋ ያግስ ግድ ኦድተ’ ያግስ። ሄሳ ግሾ፥ ሀእ ሀያና፥ ኑ ናጋራ፥ ነ አዋ ፆሳ አይለታ ናቁዋ አቶ ያጋ” ያግዶሶና። ዮሰፍ ሄሳ ስእድ ዬክስ።

18 ሄሳፈ ጉየ፥ እያ እሻት ባንታ ሁጰን እያኮ ይድ፥ እያ ስንꬃን ጉፋንድ፥ “ኑኒ፥ ነ አይለታ” ያግዶሶና።

19 ሽን ዮሰፍ ኤንታኮ፥ “ባቦፍተ፥ ታና ህንተዉ ፆሳ ግደትዬ? 20 ህንተ ታዉ ኢታ ኦꬅደታ፥ ሽን ሀእ ዳሮ አሳይ ሀይቆና አታና መላ ፆሳይ ሀይሳ ሎኦተꬃስ ኦꬅስ። 21 ሄሳ ግሾ፥ ህዛ ባቦፍተ። ታኒ ህንተናነ ህንተ ናይታ ሙዛና” ያግድ፥ ኤንታ ምንꬅድ ሎኦ ቃላ ሀሳይስ።

22 ዮሰፍ፥ እያዉ ላይꬅ ፄታነ ታማ ግዳና ጋካናስ ባ አዋ ሶ አሳራ ግብፀን ደእስ። 23 ኤፍሬማ ናይታነ፥ ኤንታ ናይታ ናይታ በእስ። ቃስ ምናሰ ናኣ ማክራ ናይታ፥ ባ ናይታ ኦꬅስ።

24 ሄሳፈ ጉየ፥ ዮሰፍ ባ እሻታ፥ “ታኒ ሀይቃናዉ ማታስ፥ ሽን ፆሳይ ህንተና ማዳናዉ ፆሞሳና። እ ህንተና ሀ ቢታፈ ከስድ፥ አብራሃመስ፥ ይሳቃስነ ያይቆባስ እማና ግድ ጫቅዳ ቢታ ኤፋና” ያግስ። 25 ዮሰፍ እስራኤለ ናይታ፥ “ፆሳይ ህንተና ማዳናዉ ፆሞስያ ዎደ፥ ህንተ ታ መቀꬃ ሀ ቢታፈ ኤክድ ቢተ” ያግድ ጫቅስስ።

26 ዮሰፍ ፄታነ ታሙ ላይꬅ ደእድ ሀይቅን፥ ሽቱዋን እያ አሀ ትይድ መልስዳፐ ጉየ፥ ግብፀ ቢታን ሳፅነን ዎꬅዶሶና።