49
ያይቆብ ባ ናይታ አንጁዋ
1 ሄሳፈ ጉየ፥ ያይቆብ ባ አደ ናይታ ፄግድ፥ “ስንꬃፈ ሀናናባ ታኒ ህንተዉ ኦዳና መላ ሀ ሺቅተ” ያግስ።
2 “ህንተኖ ያይቆባ ናይቶ፥
እስፈ ሺቅድ ስእተ፤
ህንተ አዋይ እስራኤለይ ኦደይሳ ሀይዝተ።
3 “ሮቤላ፥ ታ ባይራ ናአዉ፥
ኔኒ ታ ዎልቃ፤ ታ ምኖተꬃስ ኮይሩዋ፤
ኔኒ ቦንቾንካ ዎልቃንካ ኡባፈ አꬋሳ።
4 ኔኒ ሃꬃ መላ፥ ኤቅዳሶን ደአካ፤
ነ እሻታ ቦላ ባይራተꬅ ነዉ በሰና።
ኔኒ ነ አዋ ሂፃን ከያዳሳ፤
ነ አዋ አርሳ ቱንሳዳሳ።
5 “ስሞንነ ሌወይ እሻታ፤
ኤንቲ ባንታ ማሻ ማካላተꬃስ ደንꬆሶና።
6 ኤንቲ ባንታ ሀንቁዋን አደ ዎꬍዶሶና፥
ባንታ አሙዋ ኩንꬃናዉ ቦራታ ጋድያ ቃንፅዶሶና።
ያንያ ግሾ፥ ታኒ ኤንታ ዞረታን ገልከ፤
ኤንታ ሺቁዋንካ ኡትከ።
7 ኤንታ ዎልቃማ ሀንቆይ
ኤንታ ዎዛና ኢታተꬃይ ባደትዳባ ግዶ።
ታኒ፥ ኤንታ ያይቆባ አሳ ግዶን ላላና።
እስራኤለ ቢታን ꬋርጫና።
8 “ይሁዳ፥*ይሁዳ፦ ይሁዳ ጉሳይ እብራወꬆ ዶናን ጋላታ ጉሱ። ነ እሻት ነና ጋላታና፤
ነ ኩሸይ ነ ሞርከታ ቆ ኦይካና፤
ነ አዋ ናይት ነዉ ሆክድ ዝጋና።
9 ይሁዳ፥ ኔኒ ዎዳላ ጋሞ፤
ታ ናአዉ፥ ኔኒ ሻንካፈ ዎꬍ ስሚድ፥
ጮጎትድ ዝንእዳ ጋሞ መላ።
ነና ቦቻናዉ ዳንዳኤይ ባዋ።
10 መርናዉ ሃረይስ ያና ጋካናዉ
ካዎተꬃ ፃምአይ፥
ይሁዳ ኩሸፐ ከየና፤
ካዎተꬃት እያዉ ኪተታና።
11 እ ባ ሀርያ ዎይነ ቦላ፥
ባ ሀረ ማራ ዶረትዳ ዎይነ ቦላ ቃቻና፤
እ ባ ማኡዋ ሱꬅ ዳንያ ዎይነ ኡሻን ሜጫና።
12 እያ አይፈይ ዎይነ ኡሻፈ አꬍድ ዱልካና፤
እያ አቻይ ፃማታፐ አꬍድ ቦፃና።
13 “ዛብሎን አባ ዶናን ዳና፤
እ አባ ዶናን ማርካበት ኤቅያ በሲ ግዳና፤
እያ ዛዋይ ስዶና ጋካና።
14 “ይሳኮር ምኖ ሀረ መላ፥
ጫናታ ግዶን ዝንኤስ።
15 ሽን እ ባ ሸምፕያ በሳይ ሎኦ ግደይሳነ
ባ ቢታይ ኡፋይሰይሳ ግደይሳ በእያ ዎደ፥
ጫና ቶካናዉ ባ ሀሽያ ዝቅ ኦꬅድ፥
አይለተꬃ ኦሶ ኦꬃና።
16 “ዳነይ†ዳነ፦ ዳነ ጉሳይ እብራወꬆ ዶናን ፕርዳ ጉሱ። እስራኤለ ዘረꬃፈ እሱዋ ግድያ ባ አሳ ቦላ ፕርዳና።
17 ዳነይ ኦገ ጋፃን ደእያ ሾሻ መላ፥
ፓራ ሹቁልያ ዱክድ፥
ፓራ ቶግዳይሳ ጉየ የግያ ጎፐ መላ።
18 “አቤት ጎዳዉ፥ ታኒ ነ አሹዋ ናጋይስ።
19 “ጋደ፥ ቦንቀይሳት ቆሀና፤
ሽን እ ኤንታ ጌዶ ካልድ ኦይካና።
20 “አሴራ ቢታይ ኦርደ፤
እ ካዎታስ ሎኦ ካꬅ እማና።
21 “ንፍታለመይ ቃሸቶና የዳ ደእያ፥
ሎኦ ማራታ የልያ ገንኤ መላ።
22 “ዮሰፍ ሃꬃ ማታን ቶከትድ፥
ደረ ቦላ ዛእዳ፥ አይፈይ ኩምዳ ዎይነ መላ።
23 ዶንገን ዱከይሳት እያ ቦላ ደንዳና፤
ባንታ ዶንግያን ዱክሸ እያ ጎዳና።
24 ሽን ያይቆባ ፆሳ ዎልቃን፥
እስራኤለ ሄንꬃንቹዋ ናጉዋን፥
እያ ዶንገይ ምኖ፥ እያ ቀሰይ ፃላ ግዳና።
25 ነ አዋ ፆሳይ ነና ማዳና።
ኡባ ዳንዳእያ ፆሳይ፥
ቦላ ሳሎ አንጁዋን፥
ጋርሳ ጪሙዋ አንጁዋን፥
መሄንካ የሎንካ ነና አንጃና።
26 ነ አዋ አንጆይ በንፐ ምንድ ደእያ ዙማታ አንጁዋፈካ፥
መርናዉ ደእያ ደረታፐ በንትያ ኡፋይስያ አንጁዋፈካ አꬌስ።
ሀይስ ኡባይ ዮሰፋ ሁጰን፥
ባ እሻታ ግዶን ካፖ ግደይሳ ሊጰን ሸምፖ።
27 “ብንያመይ ቦንቅያ ሱꬉመ፤
ባ ኦልዳባ ዎንታ ሜስ፤
ባ ድእዳባ ኦማርስ ሻኬስ” ያግስ።
28 ሀይሳቲ ታማነ ናምኡ እስራኤለ ሼሻታ። ኤንታ አዋይ ኤንታ ሁጰን ሁጰን ኤንታዉ በሲያ አንጁዋ አንጅሸ ኤንታኮ ግዳባይ ሀይሳ።
ያይቆባ ሀይቁዋ
29 ሄሳፈ ጉየ፥ እ ኤንታ ሀይሳዳ ያግድ ኪትስ፤ “ታኒ ታ ማይዛታን ጋሄታና ሀናይስ። ታና ህተ አድያ ኤፍሮና ጋደን ደእያ ጎንጎሉዋን ታ አዋታ ማታን ሞግተ። 30 ሄስካ፥ ካናነ ቢታን፥ ማምረ ማታን ደእያ፥ ማክፌላን ደእያ ጎንጎሉዋ። ሄ ጎንጎሎይ አብራሃመይ ሞጎስ ህተ አድያ ኤፍሮናፐ እያ ጋድያራ ሻምዳ ዱፉዋ። 31 አብራሃመይነ እያ ማችያ ሳራ፥ ይሳቅነ እያ ማችያ እርብቃ ያን ሞገትዶሶና። ታኒ ቃስ ልያካ ያን ሞጋስ። 32 ሄ ጋደይነ እያን ደእያ ጎንጎሎይ ህተታፐ ሻመትዳይሳ። ታና ያን ሞግተ” ያግስ።
33 ያይቆብ፥ ባ ናይታ ኪታ ኦንግዳፐ ጉየ ባ ቶሁዋ ባ ሂፃን ሺሽ ኤክድ፥ ባ ማይዛታን ጋሄትስ።