1 ሙሰይ፥ “ኤንቲ ታና አማኖና እፅድ፥ ዎይኮ ታኒ ግያባ ስኦና እፅድ፥ ‘ጎዳይ ነዉ ቆንጭቤና’ ጊኮ ዎይጎ?” ያግድ ኦይችስ።

2 ጎዳይ ሙሰኮ፥ “ነ ኩሽያን ደኤይስ አይቤ?” ያግድ ኦይችስ።

“ፃምአ” ያግስ።

3 ጎዳይ እያኮ፥ “አነ ሳአን የጋ” ያግስ። ሙሰይ ሄ ፃምኣ ሳአን የግን፥ ሾሽ ግድን፥ ሙሰይ እያፐ ዎፅስ። 4 ሄሳፈ ጉየ ጎዳይ፥ “ነ ኩሽያ የዳዳ እያ ጎይና ኦይካ” ያግስ። ሙሰይ ባ ኩሽያ የድድ ሾሻ ኦይክ ደንꬅን ሾሻይ እያ ኩሸን ስሚድ፥ ፃምአ ግድስ። 5 ጎዳይ፥ “ነ አዋታ ፆሳይ፥ አብራሃመ፥ ይሳቃነ ያይቆባ ፆሳይ ነዉ ቆንጭዳይሳ ኤንቲ አማናና መላ ሀይሳ ኦꬃ” ያግስ።

6 ካልድ ጎዳይ ሙሰኮ፥ “ነ ኩሽያ ነ ሾጰን ናቃ” ያግስ። ሙሰይ ባ ኩሽያ ሾጰን ናቅስ። እ ከስያ ዎደ እያ ኩሸይ ባሮ ሀርገን ኦይከትዳዳ ቦፅስ። 7 ጎዳይ እያኮ፥ “ነ ኩሽያ ነ ሾጰን ዛራዳ ናቃ” ያግስ። ሙሰይ ባ ኩሽያ ባ ሾጰን ዛር ናቅድ ከስያ ዎደ እያ ኩሸይ ስሚድ ሀንኮ አሳተꬃ መላ ግድስ።

8 ጎዳይ፥ “ኤንቲ ነና ዎይኮ ኮይሮ ማላታ አማኖና እፅኮ፥ ናምአንꬆ ማላታ አማናና። 9 ሽን ኤንቲ ሀ ናምኡ ማላታታ አማኖና እፅኮ፥ ዎይኮ ኔኒ ግያባ ስኦና እፅኮ፥ ናይለ ሻፋፐ ሃ ኤካዳ፥ መላ ቢታ ቦላ ጉሳ። ሄ ሃꬃይ ቢታ ቦላ ሱꬃን ላመታና” ያግስ።

10 ሙሰይ ጎዳኮ፥ “አቤት ጎዳዉ፥ ካሰካ ዎይኮ ሀእ ነ ታና ኦድሶ ኦይክዳይሳፈ ዶምን ኦድድ አማንꬆይ ታዉ ሀነና። ታ ጌሻዳ ኦደታናዉ ዳንዳእከ፤ ታ እንፃርሳይ ሉፋ” ያግስ።

11 ጎዳይ እያኮ፥ “አሳስ ዶና እምዳይ ኦኔ? ሙመ ዎይኮ ቱለ ኦይ ኦኔ? ፄልሰይነ ቆቅሰይ ኦኔ? ታና ጎዳ ግድክናዬ? 12 ሀእ ኔኒ ባ፤ ኔኒ ኦደታና መላ ታ ነና ማዳና። ነ ጋናባ ታ ነዉ እማና” ያግስ።

13 ሽን ሙሰይ፥ “ጎዳዉ፥ ሀያና፥ ሀራ አስ ኪታ” ያግስ።

14 ሄሳፈ ጉየ ጎዳይ ሙሰ ቦላ ዳሮ ሀንቀትድ እያኮ፥ “ሌወ ግድዳ ነ እሻ አሮን ባዌ? እ ኦዳ ሎይꬅድ ኤረይሳ ታ ኤራይስ። ሀእ እ ኔራ ጋሄታናዉ ይሸ ኦገ ቦላ ደኤስ፤ እ ነና በእያ ዎደ ዎዛናፐ ኡፋይታና። 15 ኔኒ፥ ‘ያጋ’፥ ጋዳ እያዉ ኦዳና። ታኒ ህንተ ናምአይካ ዎይግ ኦዳነኮነ ዋትድ ኦꬃነኮ ህንተና ታማርሳና። 16 እ ነ ዶና ግድድ አሳስ ነ ግሾ ኦዳና። ኔኒ ፆሳ በሳን ግዳዳ እ ጋናባ እያዉ ኦዳና። 17 ሀ ፃምአ ኤካ ባዳ እያራ ማላታ ኦꬃዳ በሳ” ያግስ።

18 ሄሳፈ ጉየ ሙሰይ ባ ቦሉዋ ዮታራኮ ስም ብድ፥ “ሀኖ ጋካናዉ አሳይ ፓፃ ደእያኮ በአናዉ፥ ታኒ ጉየ ግብፀ ታ አሳኮ ቦ?” ያግስ። ዮቶር ሙሰኮ፥ “ኤ ባ፤ ሳሮ ጋካ” ያግስ።

19 ሙሰይ ምድያመ ቢታን ደእሽን ጎዳይ እያኮ፥ “ነና ዎꬋናዉ ኮይዳ አሳት ኡባይ ሀይቅዳ ግሾ ጉየ ግብፀ ስማዳ ባ” ያግስ። 20 ሙሰይ ባ ማችዉነ ባ አደ ናይታ ሀረ ቶግስድ ጉየ ግብፀ ስምስ። ሙሰይ ፆሳ ፃምአ ባ ኩሸን ኦይክድ ብስ።

21 ጎዳይ ሙሰ፥ “ኔኒ ግብፀ ስማዳ ብያ ዎደ፥ ታኒ ነዉ እምዳ ዎልቃን ግብፀ ካዉዋ ስንꬃን ማላታታ ኦꬃናይሳ ባሎፓ። ሽን ሄሳንካ እ አሳ የዶና መላ ታኒ እያ ዎዛና ሙምሳና። 22 ሄ ዎደ ታኒ ጎዳይ ግያባ ካዋስ ሀሳዳ ያጋዳ ኦዳ። ‘እስራኤል ታ ባይራ ናአ። 23 እ ታዉ ጎይናና መላ እያ የዳ ጋዳ ታኒ ነዉ ኦዳስ። ሽን ኔኒ የዶና እፃዳሳ። ሄሳ ግሾ፥ ታኒ ነ ባይራ አደ ናኣ ዎꬋና’ ያጌስ ጋዳ ኦዳ” ያግስ።

24 ኦገን ሸምፖ በሳን ጎዳይ ሙሰራ ጋሄትድ እያ ዎꬋናዉ ኮይስ። 25 እያ ማችያ ስፖራ ቃራ ሹቹ ኤካዳ፥ ባ ናኣ ቃፃራሱ። ቃፃራ ሾሁዋራ ሙሰ ቶሁዋ ቦቻሱ። እያ ሙሰኮ፥ “ኔኒ ታዉ ቱማ ሱꬃ መዳ” ያጋሱ። 26 ሄሳ ግሾ፥ ጎዳይ እያ ዎꬎና አግስ። ሄ ዎደ እያ ሙሰኮ፥ “ሀ ቃፃሩዋ ጋሶን ኔኒ አታዳሳ” ያጋሱ።

27 ሄ ዎደ ጎዳይ አሮናኮ፥ “ሙሰራ ጋሄታናዉ መላ ቢታ ባ” ያግስ። እ ብድ፥ ፆሳ ዙማ ቦላ ሙሰራ ጋሄትድ እያ ዬርስ። 28 ሙሰይ ግብፀ ብድ ጋናባነ ኦꬃና ማላታታ ኡባ ጎዳይ እያ ኪትዳይሳ አሮናስ ኦድስ። 29 ሙሰራነ አሮናራ ግብፀ ብድ፥ እስራኤለ ጭማታ ኡባ ሺሽዶሶና። 30 አሮን ጎዳይ ሙሰስ ኦድዳ ቃላ ኡባ ኤንታዉ ኦድስ። ቃስ ሙሰይ ማላታታ ሄ አሳ ስንꬃን ኦꬅስ። 31 ኤንትካ አማንዶሶና። ጎዳይ ኤንታዉ ቆፕዳይሳነ ኤንታ ዋይያ በእዳይሳ ስእዳ ዎደ ጉፋንድ ጎይንዶሶና።