1 ሄሳፈ ጉየ ሙሰይነ አሮን ግብፀ ካዋኮ ብድ፥ “ጎዳይ፥ እስራኤለ ፆሳይ፥ ‘ታ አሳይ ታና ቦንቻናዉ መላ ቢታን፥ ባኣለ ኦꬃና መላ ኤንታ የዳ’ ያጌስ” ያግዶሶና።

2 ካዎይ፥ “ታኒ እያዉ ኪተታዳ እስራኤለ የዳናዉ እ፥ ጎዳይ ኦኔ? ታኒ ጎዳ ኤርከ፤ እስራኤላካ የድከ” ያግስ።

3 ኤንቲ ዛሪድ፥ “እብራወታ ፆሳይ ኑስ ቆንጭስ። ሀእ ኑኒ ጎዳስ፥ ኑ ፆሳስ፥ ያርሾ ያርሻናዉ ሄꬑ ጋላሳ ኦገ መላ ቢታ ባና መላ ኑና የዳርክ። ሄሳ ኑ ኦꬆና እፅኮ እ ኑና ሀርገን ዎይኮ ኦላን ꬋይሳና” ያግዶሶና።

4 ሽን ግብፀ ካዎይ፥ “ሙሰ፥ አሮና፥ አሳ አይስ ኦሶ ድገቲ? ጉየ ብድ ህንተ ኦሱዋ ኦꬅተ። 5 ሄኮ፥ ሀ ቢታን ህንተ ዳርደታ፤ ቃስ ህንተ አሳ ኦሶ ድገታ” ያግስ።

6 ካዎይ ሄ ጋላስ ግብፀ ካፖታነ እስራኤለታ ኦስሰይሳታ ሀይሳዳ ያግድ ኪትስ፤ 7 “ካሰይሳዳ ፁበ ኦꬃናው አሳስ ኡቱላ እሞፍተ። ኤንቲ ኡቱላ ባንታዉ ኮይድ ሺሾ። 8 ሽን ካሰይሳፈ ታይቡዋ ጉꬆና ኤንቲ ፁበ መꬍድ ሺሻና መላ ኪትተ፤ እስኖካ ፓጭሶፕተ። ኤንቲ፥ ‘ኑኒ ኑ ፆሳስ ያርሾ ያርሻና መላ ኑና የዳ’ ያግድ ታና ኦይቸይ ኤንታዉ ኦሶይ ጉፅዳ ግሾሳ። 9 ኤንቲ ኦሶን ጉንዳና መላነ ዎርዶ ኦዳ ስኦናዉ ኤንታዉ ዎደይ ዶና መላ ኦሶ ዴፅስተ” ያግድ ኪትስ።

10 ግብፀ ካፖትነ እስራኤለታ ኦስሰይሳት ከይድ፥ አሳኮ፥ “ካዎይ፥ ‘ታኒ ህንተዉ ኡቱላ እምከ። 11 ህንተ ብድ አዉፐካ ኮይድ ደምተ። ሽን ህንተ ኦꬅያ ፁበ ታይቡዋፐ እሶይካ ፓጨና’ ያግስ” ያግዶሶና። 12 ሄሳ ግሾ አሳይ ኡቱላ ኮያናዉ ግብፀ ቢታ ኡባን ላለትዶሶና። 13 ግብፀ ካፖት ኤንታዉ ኡቱል እመትን ኤንቲ ኦꬅያ ፁበ ታይቡዋ ኬና ኦꬅድ ሺሻና መላ ኤንታ ኡንኤꬅዶሶና። 14 ግብፀ ካፖት ባንታፈ ጋርሳራ ደእያ እስራኤለ ካፖታ፥ “ህንተ ካሰ ኦꬅያ ፁበ ኬና አይስ ኦꬅ ሺሽበከቲ?” ያግድ ዋꬍዶሶና።

15 ሄሳፈ ጉየ እስራኤለ ካፖት ካዋኮ ብድ፥ “አቤት ጎዳዉ፥ ኔኒ ነ አይለታ ሀይሳዳ አይስ ኦꬃይ? ያግድ ማጋንዶሶና። 16 ነ አይለታስ ኡቱል እመተና፥ ሽን ፁበ ኦꬃና መላ ኪተትዳ። ሄሳ ቦላ ኑና ዋꬎሶና፤ ሽን ባላይ ነ አሳ ቦላና” ያግዶሶና።

17 ሽን ካዎይ፥ “ህንተ ኦሶ ዶሶና አዛላታ፤ ህንተ ዎራ ዎꬍዳ አዛላታ። ህንተ፥ ‘ኑኒ ጎዳስ ያርሻናዉ ባና፤ ኑና የዳ’ ያግድ ዛር ዛር ታና ኦይቸይ ሄሳ ግሾሳ። 18 ሀእ ጉየ ብድ ኦꬅተ። ህንተዉ አይባ ኡቱልካ እመተና፥ ሽን ህንተ ካሰይሳ ኬና ፁበ ኦꬃናዉ በሴስ” ያግስ።

19 እስራኤለ ካፖት፥ ኤንቲ ካሰይሳ ኬና ፁበ ኦꬃና መላ ኪተትዳ ዎደ ኤንቲ መቶን ገልዳይሳ ኤርዶሶና።

20 ኤንቲ ካዉዋ ማታፐ ከይድ፥ ባንታና ካረን ናግያ ሙሰኮነ አሮናኮ ብዶሶና። 21 ኤንቲ ሙሰኮነ አሮናኮ፥ “ህንተ ኑና ካዎይነ እያ ሞርናት እፃና መላነ ዎꬋና መላ ህንተ ኦꬅዳይሳ ፆሳይ ፄሎ፤ እ ፕርዶ” ያግዶሶና።

22 ሙሰይ ጎዳኮ ስሚድ፥ “ጎዳዉ፥ ኔኒ ሀ አሳ ቦላ መቶ አይስ ኤሀዲ? ኔኒ ታና ኪትዳይ ሄሳሴ? 23 ታኒ ነ ሱንꬃን ካዋስ ኦዳናዉ ብዳ ዎደፐ ዶምን እ ሀ አሳ ቦላ መቶ ሀ ዳርስስ። ቃስ ነካ ነ አሳ አሻባካ” ያግስ።