1 ሄሳፈ ጉየ ጎዳይ ሙሰኮ፥ “ታኒ ግብፀ ካዉዋ ቦላ ኦꬃናባ ሀእ ኔኒ በአና። እ ታ ደርያ የዳና መላ ታኒ ታ ዎልቃ እያ በሳና። እ ኤንታ ባ ቢታፈ ጎድድ ከሳና” ያግስ።

2 ፆሳይ ሙሰ፥ “ታኒ ጎዳ። 3 ታኒ አብራሃመስ፥ ይሳቃስነ ያይቆባስ ኡባ ዳንዳእያ ፆሳ ግዳዳ ቆንጫስ። ሽን ታኒ፥ ‘ጎዳ’ ጌተትያ ታ ሱንꬃን ታናተꬃ ኤንታ ኤርሳብከ። 4 ቃስ ታኒ ኤንቲ በተተꬃን ደእዳ ካናነ ቢታ እማና ጋዳ ኤንታራ ጫቃስ። 5 ቃስካ ግብፀ አሳት አይለይያ እስራኤለታ ዋሱዋ ታኒ ስአስ፤ ታ ጫቁዋካ ቆፓስ።

6 “ሄሳ ግሾ ኔኒ እስራኤለታኮ፥ ‘ታኒ ጎዳ። ታኒ ህንተና ግብፀ አይለተꬃፈ አሻዳ ከሳና። ታኒ ኤንታ ታ ምኖ አፃን ኢታ ፕርዳ ፕርዳዳ ህንተና ዎዛና። 7 ታኒ ህንተና ታ ደረ ኦꬃና፤ ታኒ ህንተ ፆሳ ግዳና። ግብፀ አይለተꬃፈ ታኒ ህንተና ከስዳ ዎደ፥ ታኒ ጎዳ ህንተ ፆሳ ግደይሳ ህንተ ኤራና። 8 ታኒ አብራሃመስ፥ ይሳቃስነ ያይቆባስ እማና ጋዳ ጫቅዳ ቢታ ህንተና ኤሀና። ሄ ቢታ ታኒ ህንተዉ ላታ ቢታ ኦꬃዳ እማና። ታኒ ጎዳ’ ያጋ” ያግስ።

9 ሙሰይ ሄሳ እስራኤለታስ ኦድስ፥ ሽን ኤንቲ አይለተꬃ ኡንአፈ ደንዶይሳን ኡፋይስ ቃንፅዳ ግሾ እ ግያባ ስእቦኮና።

10 ሄሳፈ ጉየ ጎዳይ ሙሰ፥ 11 “ባዳ ግብፀ ካዋስ፥ ‘እስራኤለታ ነ ቢታፈ የዳ’ ያጋዳ ኦዳ” ያግስ።

12 ሽን ሙሰይ፥ “ታ እንፃርሳይ ሉፋ። እስራኤለት ታና ስእቦኮና፥ ሽን ግብፀ ካዎይ ታና ዋንድ ስአኔ?” ያግስ።

13 ጎዳይ ሙሰነ አሮና፥ “ብድ፥ እስራኤላ አሳ ግብፀፈ ከሳና መላ፥ ታኒ ህንተና ኪትዳይሳ እስራኤለታስነ ግብፀ ካዋስ ኦድተ” ያግስ።

14 ሀይሳፈ ካልድ ፃፈትዳይሳት ኤንታ ማይዛታ፤ ያይቆባ ባይራ ናኣ ሮቤላ አደ ናይት፥ ሄኖከ፥ ፋሉ፥ ኤስሮመነ ካርማ። ሀይሳቲ ሮቤላ ሶ አሳስ ማይዛታ።

15 ስሞና አደ ናይት፥ ያሙኤላ፥ ያምና፥ ኦሀዳ፥ ያክና፥ ዞሃራነ ካናነ ቢታ ማጫሴፐ የለትዳ ሳኡላ። ሀይሳቲ ስሞና ሶ አሳስ ማይዛታ።

16 ሌወ አደ ናይት ገድሶና፥ ቃሃታነ ማራራ። ሌወይ ፄታነ ሀስታማነ ላፑን ላይꬅ ደእስ።

17 ገድሶና አደ ናይት ልብናነ ሳመአ ጌተቶሶና። ሀይሳቲ ባንታ ሶ አሳስ ማይዛታ።

18 ቃሃታ አደ ናይት አምራማ፥ እዛራ፥ ከብሮናነ ኡዝኤላ። ቃሃት ፄታነ ሀስታማነ ሄꬑ ላይꬅ ደእስ።

19 ማራራ አደ ናይት ማህላነ ሙሰ።

ባንታ የለተꬃ ማራን ሀይሳፈ ቆሞን ፃፈትዳይሳት ሌወ ሼሻታ።

20 አምራም ባ አዋ ምችዉ ዮከቤዶ ማችስ። እያ አሮናነ ሙሰ እያዉ የላሱ። አምራም ፄታነ ሀስታማነ ላፑን ላይꬅ ደእስ።

21 እዛራዳ ናይት፥ ቆረ፥ ነፈጋነ ዝክራ።

22 ኡዝኤላ አደ ናይት፥ ምሳኤላ፥ ኤልዛፋናነ ስትራ።

23 አሮን አምናዳበ ናእዉ፥ ናአሶና ምችዉ ኤልሰቦ ማችስ። እያ እያዉ ናዳበ፥ አብዮዳ፥ አላዛራነ እታማራ የላሱ።

24 ቆረ አደ ናይት፥ አስራ፥ ኤልቃናነ አብያሳፋ።

25 አሮና ናአይ አላዛር ፑትኤላ ናይታፐ እስንዉ ማችስ። እያ እያዉ ፕንሃሳ የላሱ።

ሀይሳቲ ሌወ ሼሻታነ ኤንታ ማይዛታ።

26 ጎዳይ፥ ሙሰነ አሮና እስራኤለ አሳ ያራን ያራን ኤንታ ሶ አሳራ ግብፀፈ ካለꬅድ ከሳና መላ ኪትስ። 27 እስራኤለታ ግብፀፈ ከስ የዳና መላ ግብፀ ካዋስ ኦድዳይ ኤንታ። 28 ጎዳይ ግብፀን ሙሰስ ኦድዳ ዎደ፥ 29 “ታኒ ጎዳ፤ ታኒ ነዉ ኦድያባ ኡባ ግብፀ ካዋስ ኦዳ” ያግስ።

30 ሽን ሙሰይ፥ “ታ ዶናይ ሉፋ ግደይሳ ነ ኤራሳ፥ ያትን ካዎይ ታኒ ኦድያባ ዋን ስአኔ?” ያግስ።