1 ጎዳይ ሙሰኮ፥ “ሄኮ ታኒ ነና ግብፀ ካዋስ ፆሳ መላ ኦꬃስ። ነ እሻ አሮን ነ ናበ ግድድ እያዉ ኦዳና። 2 ታኒ ነና ኪትዳ ኪታ ኡባ አሮናስ ኦዳ። እ፥ እስራኤለታ ባ ቢታፈ ከስ የዳና መላ ካዋስ ኦዳና። 3 ሽን ታኒ ካዉዋ ዎዛና ሙምሳና። ታኒ ግብፀ ቢታን ማላታታነ ማላልስያባታ ኦꬅኮካ፥ 4 እ ህንተ ኦድያባ ስኤና። ሄ ዎደ ታኒ ግብፀታ ፕርዳና፤ ታ ደርያ እስራኤለ ግብፀፈ ከሳና። 5 ሄስ ሀንያ ዎደ ታኒ ጎዳ ግድዳይሳ ግብፀት ኤራና” ያግስ።

6 ሙሰይነ አሮን ጎዳይ ኪትዳይሳዳ ኦꬅዶሶና። 7 ኤንቲ ካዋስ ኦድያ ዎደ፥ ሙሰስ ሆስፑን ታሙ ላይꬅ፤ አሮናስ ቃስ ሆስፑን ታማነ ሄꬑ ላይꬅ።

8 ጎዳይ ሙሰነ አሮና፥ 9 “ካዎይ ህንተና፥ ማላታ ኦꬅድ ታና በስተ ጊኮ፥ አሮን ባ ፃምአ ኤክድ ካዉዋ ስንꬃን የጋና መላ እያዉ ኦዳ፤ ሄ ፃምአይ ሾሽ ግዳና” ያግስ። 10 ሙሰይነ አሮን ካዋኮ ብድ ጎዳይ ኤንታ ኪትዳይሳዳ ኦꬅዶሶና። አሮን ባ ፃምኣ ካዉዋ ስንꬃንነ እያ ሞርናታ ስንꬃን የግን ፃምአይ ሾሹ ግድስ። 11 ሄሳፈ ጉየ ካዎይ ማሮታነ ብታንቾታ ፄግስስ። ኤንትካ ባንታ ብታን ሄሳዳ ኦꬅዶሶና። 12 ኤንቲ ኡባይ ባንታ ፃምኣ ሳአን የግዳ ዎደ ፃምአት ሾሽ ግድዶሶና። ሽን አሮና ፃምአይ ኤንታ ፃምአታ ምትስ 13 ግዶሽን ጎዳይ ግዳይሳ መላ ካዋ ዎዛናይ ሙምስ። እ ኤንቲ ገይሳ ስኦና እፅስ።

14 ጎዳይ ሙሰ፥ “ካዋ ዎዛናይ ሙምስ፤ እ አሳ የዶና እፅስ። 15 ዎንቶ ዎንታ ጉራ ሾሽ ላመትዳ ፃምኣ ኤካዳ፥ ናይለ ሻፋ ማታን ኤቃዳ፥ ካዉዋራ ጋሄታናዉ ናጋ። 16 እያኮ፥ ‘ጎዳይ፥ እብራወታ ፆሳይ ታ አሳይ መላ ቢታን ታዉ ጎይናና መላ የዳ’ ያግድ ታና ኔኮ ኪትስ። ሽን ኔኒ ሀኖ ጋካናዉ እፃዳሳ። 17 ጎዳይ፥ እ፥ ጎዳ ግደይሳ እ ኦꬅያባን ኔኒ ኤራና። ታኒ ናይለ ሻፋ ሃꬃ ታ ኩሸን ደእያ ፃምአን ሾጭኮ ሃꬃይ ሱꬅ ላመታና። 18 ናይለ ሻፋን ደእያ ሞሎይ ሀይቃና፤ ሻፋይካ ፅንቃና። ግብፀት ሄ ሻፋ ሃꬃ ኡያናዉ ዳንዳኦኮና” ያጋዳ ኦዳ።

19 ጎዳይ ሙሰኮ፥ “አሮን ግብፀን ደእያ ሃꬃታ ቦላ፥ ሻፋታ ቦላ፥ ዛራ ሃꬃታ ቦላ፥ ተቀ ሃꬃ ቦላነ ዱቀትዳ ሃꬅ ኡባ ቦላ ባ ፃምኣ ደንꬃና መላ ኦዳ። ሄ ዎደ ሃꬃ ኡባይ ሱꬅ ላመታና። ሀር አቶሽን ግብፀ ቢታን ምꬃፈነ ሹቻፈ ኦሰትዳ ሃ ትክያ ሚሸታን ደእያ ሃꬃይ ኡባይ ሱꬅ ላመታና ያጋ” ያግስ።

20 ሙሰይነ አሮን ጎዳይ ኪትዳይሳዳ ኦꬅዶሶና። ካዉዋ ስንꬃንነ እያ ሞርናታ ስንꬃን ባ ፃምኣ ደንꬅድ፥ ናይለ ሻፋ ሃꬃ ሾጭስ። ሃꬃ ኡባይ ሱꬅ ላመትስ። 21 ሄ ሻፋ ሃꬃን ደእያ ሞሎት ሀይቅዶሶና። ሻፋ ሃꬃይ ኢታ ፅንቅዳ ግሾ፥ ግብፀ አሳይ ኡያናዉ ዳንዳእቦኮና። ግብፀ ቢታ ኡባን ሱꬅ ኩምስ። 22 ሽን ግብፀ ብታንቾት ባንታ ብታን ሄሳዳ ኦꬅዶሶና። ጎዳይ ግዳይሳዳ ካዉዋ ዎዛናይ ሙምን፥ ሙሰይነ አሮን ኦድዳይሳ ስኦና እፅስ። 23 ካዎይ ሄ ሀንዳባ አይብንካ ታይቦና የግ አግድ ባ ጋꬎ ስሚድ ብስ። 24 ግብፀ አሳይ ናይለ ሻፋ ሃꬃ ኡያናዉ ዳንዳእቦና ግሾ፥ ኡይያ ሃꬅ ደማናዉ ሻፋ ጋፃን ኦላ ቦክዶሶና።

25 ጎዳይ ሃꬃ ሾጭ ስምን ላፑን ጋላስ ግድስ።