1 ጎዳይ ሙሰኮ፥ “ታኒ ግብፀ ካዉዋ ቦላነ እያ አሳ ቦላ እስ ሀራ ጋዶ የዳና። ሄሳፈ ጉየ፥ እ ህንተና ከስ የዳና። እ ህንተና ኡባ ጎድድ ከሳና። 2 እስራኤለ አሳይ፥ አደይነ ማጫስ ባንታ ሾሮታፐ ብራነ ዎርቃ አሌቆ ኦይቻና መላ ኤንታዉ ኦዳ” ያግስ። 3 ጎዳይ እስራኤለ አሳስ ግብፀታ ስንꬃን ቴሞ እሚስ። ግብፀ ካዉዋ ሞርናትነ አሳይ ሙሰ ዳሮ ቦንቸትዳ አሳዳ ፄልዶሶና።

4 ሙሰይ ካዋኮ፥ “ጎዳይ ሀይሳዳ ያጌስ፤ ‘ቃማ ብላሄ ታኒ ግብፀ ቢታ ግዶራ ካንꬃና። 5 ግብፀ ቢታን ደእያ ባይራ አደ ናእ ኡባይ፥ ካዋ አራታ ላታናዉ ደእያ ባይራ ናኣፐ ዶምድ፥ ዎፃን ጋጭያ ማጫ አይለ ባይራ ናአ ጋካናዉ፥ ባይራ የለትዳ መሄ ኡባይ ሀይቃና። 6 ግብፀ ቢታ ኡባን ሄሳፈ ካሰካ ስንꬃፈካ ሀኖና ግታ ዬሆይ ዬኬታና። 7 ሽን እስራኤለ አሳ ቦላ ዎይኮ ኤንታ መህያ ቦላ ካንካ ቦጨና።’ ሄ ዎደ ታኒ ጎዳይ ግብፀታ ግዶንነ እስራኤለ ግዶን ዱማተꬅ መይሳ ኔኒ ኤራና። 8 ነ ሞርናት ኡባይ ይድ ታ ስንꬃን ጉፋናና። ታ አሳ ኤካዳ ሀ ቢታፈ ከያና መላ ኤንቲ ታና ዎሳና። ሄሳፈ ጉየ፥ ታኒ ባና” ያግስ። ሙሰይ ሸነን ፁገትድ ካዋ ስንꬃፈ ከይድ ብስ።

9 ጎዳይ ሙሰስ ካሰ፥ “ግብፀ ቢታን ታኒ ማላልስያባ ዳርሳዳ ኦꬃና ጋሶ ካዎይ ህንተና ስኤና” ያግድ ኦድ ዎꬅስ። 10 ሙሰይነ አሮን ማላልስያባ ኡባ ካዋ ስንꬃን ኦꬅዶሶና። ሽን ጎዳይ ካዉዋ ዎዛና ሙምስዳ ግሾ፥ እስራኤለታ ባ ቢታፈ የዶና እፅስ።