1 ጎዳይ ግብፀ ቢታን ሙሰነ አሮና ሀይሳዳ ያግስ፤ 2 “ሀ አጌናይ ህንተዉ ላይꬃስ ኮይሮ አጌና ግዶ። 3 እስራኤለ አሳ ኡባስ ሀ ዎጋ ኦድተ። ሀ አጌናይ ገልዳ ታማንꬆ ጋላሳን፥ እስ አስ ባ ሶ አሳስ እስ ማራዘ ዎይኮ እስ ኮለ ኤኮ። 4 ሄ ኬꬃ አሳ ታይቦይ ሄ መህያ ዉርስድ ማናዉ ዳንዳኦና እፅኮ፥ እያራነ እያ ማታ ሾሩዋራ ባንታ ሶ አሳ ታይቡዋ መላነ እስ እስ አስ ምድ ዉርሳናዉ ዳንዳእያ ኬና ኤክድ ሄ መህያ ሹክድ እስፈ ሞና። 5 ህንተ ዶርያ መሄይ ዶርሰ ዎይኮ ዴሸ ግዳናዉ ዳንዳኤስ፥ ሽን እስ ላይꬅ ኩምዳይሳነ እያ ቦላ ቦረይ ባይና አደ ግዶ። 6 ሀ አጌናስ ታማነ ኦይዳንꬆ ጋላስ ጋካናዉ ኤንታ ሄምተ። ሄ ጋላስ ኦማርስ ላድያ ዎደ እስራኤለ አሳ ማባራ ኡባይ ኤንታ ሹካናዉ በሴስ። 7 አሳይ ሄ ሱꬃፈ ኤክድ ኤንቲ ምያ ኬꬃ ዉላ ጋርሳ፥ ቆሙዋነ ቦኮሉዋ ትዮ። 8 አሹዋ ሄ ጋላስ ቃማ ታማን ጫጭድ ጫምያ ቦንጮራነ ኡይꬃራ ሚተ። 9 አሹዋ ቃየ ዎይኮ ካꬅድ ሞፕተ። ሁጵያ፥ ገዳታነ ኡሎ አሾታ ኡባ ጫጭድ ሚተ። 10 ሄ አሹዋፐ ዎንታና ጋካናዉ አይኮካ አሾፍተ። ዎንታና ጋካናዉ አትኮ ሄሳ ፁግተ። 11 ኦገስ ጊግያ ማኦ ማእድ፥ ህንተ ጫማ አꬅድ፥ ህንተ ፃምኣ ኦይክድ ኤሶን ሚተ። ሄስ ታና ጎዳ ቦንችያ ፓስካ ባኣለ ህንተዉ ግዶ።

12 “ታኒ ሄ ቃማ ግብፀራ ካንꬃዳ ባይራ የለትዳ ኡባ፥ አሳነ መህያ ዎꬋና። ግብፀ ኤቃታ ኡባ ፕርዳና፤ ታኒ ጎዳ። 13 ሄ ሱꬃይ ህንተ ደእያ ኬꬃ ኤርስያ ማላ ግዳና። ታኒ ግብፀታ ፕርድያ ዎደ ሄ ሱꬃ በአዳ ህንተና ቆሆና አጋ አꬋና።

14 “ሀ ጋላሳይ ታኒ ጎዳይ ህንተዉ ኦꬅዳይሳ ላይꬃን ላይꬃን ቆፍስያ ጎዳ ቦንችያ ባኣለ ግዶ” ያግስ።

15 “ላፑን ጋላስ ጋካናዉ እርሾይ ገሎና ኡይꬅ ሚተ። ኮይሮ ጋላስ እርሾ ህንተ ሶፐ ድግተ። ሄ ላፑን ጋላሳታን እርሾይ ደእያ ኡይꬅ ምያ አስ እስራኤለ አሳ ግዶፈ ዱፅድ ኩረቶ። 16 ኮይሮ ጋላሳንነ ላፑንꬃ ጋላሳን ጎይናናዉ ሺቅተ። ሄ ጋላሳታን አይብ ኦሶካ ኦꬆፍተ፥ ሽን ካꬅ ካꬃናዉ ዳንዳኤታ።

17 “ታኒ እስራኤለ ደርያ ግብፀፈ ከስዳይ ሄ ጋላስ ግድያ ግሾ ሀ ኡይꬃ ባልያ ላይꬃን ላይꬃን ቦንችተ። ሄስ ህንተዉ መርና ዎጋ ግዶ። 18 ኮይሮ አጌናን፥ ታማነ ኦይዳንꬆ ጋላስ ኦማርሳፈ ዶምድ፥ ላታማነ እስንꬆ ጋላስ ኦማርስ ጋካናዉ እርሾይ ገልቦና ኡይꬃ ሚተ። 19 ላፑን ጋላስ ጋካናዉ እርሾይ ህንተ ሶን በንቶፎ። እርሾይ ገልዳባ ምያ ቢታ አዉ ናአ ግድን ዎይኮ አሳ ጋደ አስ ግድን፥ ሄ ኬꬃ አዋይ እስራኤለ ማባራ ግዶፈ ኩረቶ። 20 እርሾይ ገልዳባ አይኮካ ሞፕተ። ህንተ ደእያሶን አዉንካ እርሾይ ገልቦና ኡይꬁ ሚተፐ አትሽን፥ እርሾይ ገልዳ ኡይꬁ ሞፕተ” ያግስ።

21 ሙሰይ እስራኤለ ጭማታ ኡባ ፄግስድ ሀይሳዳ ያግስ፤ “ህንተ እሶይ እሶይ ሶ ብድ ፓስካ ባኣለ ቦንቻናዉ ማራዘ ዎይኮ ኮለ ሹክተ። 22 ህሶጰ ምꬃ ሀይꬃፈ ዳንክ ኤክድ፥ ከረን ደእያ ሱꬃን የድ ኤክድ ዉላ ጋርሳ፥ ቆሙዋነ ቦኮሉዋ ትይተ። ዎንታና ጋካናዉ ህንተፈ እሶይካ ባ ኬꬃፈ ካረ ከዮፖ። 23 ጎዳይ ግብፀ ባይራታ ዎꬋናዉ ሄ ቢታራ ካንꬅያ ዎደ፥ ሄ ሱꬃ ዉላ ጋርሳ፥ ቆሙዋንነ ቦኮሉዋ ቦላ በእድ አግድ አꬋና። ሀይቆ ኤህያ ኪታንቾይ ህንተ ሶ ገልድ ህንተና ዎꬎና መላ ድጋና።

24 “ህንተነ ህንተ ናይት ሀ ኪታ መርናዉ ናግተ። 25 ጎዳይ ካሰ እማና ግድ ቃላ ገልዳ ቢታ ህንተ ገልያ ዎደ ሀ ዎጋ ኦꬅተ። 26 ህንተ ናይት ህንተና፥ ‘ሀ ባልያ ኑ አይስ ቦንችዉ?’ ግድ ኦይችያ ዎደ፥ 27 ህንተ ኤንታኮ፥ ‘ሀይስ ጎዳ ቦንችያ ፓስካ ያርሾ። ሄስካ ጎዳይ ግብፀ ቢታን እስራኤለ አሳ ኬꬃ አግድ፥ አꬍድ፥ ግብፀ ባይራታ ዎꬍድ፥ ኑና አሽዳ ግሾሳ’ ያግተ” ያግስ።

ሄሳፈ ጉየ፥ እስራኤለት ጉልባትድ ጎይንዶሶና። 28 እስራኤለት፥ ጎዳይ ሙሰነ አሮና ኪትዳይሳዳ ኦꬅዶሶና።

29 ግድ ብላሄ ጎዳይ ግብፀን ባይራ የለትዳ ኡባ፥ ካዉዋ አራታ ላታናዉ ደእያ ባይራ ናኣፐ ዶምድ፥ ቃሾ ኬꬃን ደእያ አሳታ ባይራ ናይታ ጋካናዉነ ባይራ የለትዳ መሄ ኡባይ ሀይቅዶሶና። 30 ካዎይ፥ እያ ሞርናትነ ግብፀ ቢታ አሳ ኡባይ ቃማ ደንድዶሶና። ግብፀ ቢታን አስ ሀይቅቦና እስ ኬꬅካ ባይና ግሾ፥ አሳይ ባንታ ቃላ ꬎቁ ኦꬅድ ግታ ዬሆ ዬክዶሶና። 31 ሄ ቃማ ካዎይ ሙሰነ አሮና ፄግስድ፥ “ህንተነ ህንተ እስራኤለት ታ ቢታፈ ከይድ ቢተ። ህንተ ታና ኦይችዳይሳዳ ብድ ህንተ ጎዳ ጎይንተ። 32 ህንተ ግዳይሳ መላ ህንተ ዶርሳነ መህያ ዉድያ ኤክድ ቢተ። ቃስ ህንተ ፆሳይ ታና አንጃና መላ ዎስተ” ያግስ።

33 ግብፀ አሳይ፥ “እስራኤለት ባንታ ቢታፈ ኤለስድ ከያና መላ ድርግስዶሶና። ህንተ ከዮና እፅኮ ኑ ኡባይ ዉሮስ” ያግዶሶና። 34 ሄሳ ግሾ፥ እስራኤለ አሳይ እርሾይ ገልቦና ሙናቃ ከረን ኩንꬅድ፥ ባንታ ማኡዋን ካምድ፥ ባንታ ሀሸን ቶክዶሶና። 35 እስራኤለት ሙሰይ ኤንታ ኪትዳይሳዳ ግብፀታ፥ ብራ አሌቆ፥ ዎርቃ አሌቆነ ማኦ እማና መላ ኦይችዶሶና። 36 ጎዳይ፥ እስራኤለት ግብፀታ ስንꬃን ሳበታናዳ ኦꬅን፥ ግብፀት ኤንቲ ኦይችዳባ ኡባ እምዶሶና። ሄሳዳ ያትድ ኤንቲ ግብፀታ ሻሉዋ ቦንቅ ኤክድ ብዶሶና።

37 እስራኤለት ራምሰ ካታማፐ ደንድድ ሱኮታ ጌተትያ በሲ ቶሆን ብዶሶና። አሳ ታይቦይ ናይታነ ማጫሳ ጉጆና ኡሱፑን ፄቱ ሙኩላ። 38 ቃስ ኤንታራ ሀራ ዳሮ ዋላካ አሳይ፥ መሄይነ ዶርሳ ዴሻ ዉደይ ላገትድ ብስ። 39 ግብፀፈ ኤንቲ ድርጎን ከይዳ ግሾ ካꬅ ካꬃናዉ ዎደ ꬋይዶሶና። ኤንቲ ከይሸ ኤክ ከይዳ እርሾይ ገልቦና ሙኑቃፐ ኤክድ ኡይꬅ ኡክዶሶና።

40 እስራኤለት ግብፀ ቢታን ደእዳ ላይꬃይ ኦይዱ ፄታነ ሀስታማ። 41 ኦይዱ ፄታነ ሀስታሙ ላይꬃይ ዉርያ ሄ ዉርሰꬃ ጋላስ ጎዳ አሳ ኡባይ ግብፀ ቢታፈ ከይዶሶና። 42 ጎዳይ ባ አሳ ናግድ፥ ግብፀፈ ከስዳ ዎደ ሳእ ቃማ። ሄ ቃማይ የለተꬃፈ የለተꬃ ጋካናዉ እስራኤለ አሳይ ባርክድ ናግሸ አቅያ፥ ጎዳስ ዱማትዳ ቃማ።

43 ጎዳይ ሙሰነ አሮና፥ “ፓስካ ጋላሳ ቦንችያ ዎጋይ ሀይሳ ያግስ፤ አሳ ጋደ አስ ፓስካ ካꬃፈ ሞፖ። 44 ህንተ ህንተ ሚሸን ሻምዳ አይለይ ቃፃረትዳፐ ጉየ ሞ። 45 ሽን ህንተራ ጋምእያ እማꬅነ ኡነ ኦꬅያ አስ እያፐ ሞፖ።

46 “ሄ ፓስካ ካꬃይ ካፅዳ ኬꬃን ያን ሚተ። ሄ አሹዋፐ አይኮካ ካረ ከሶፍተ። መቀꬃታፐ እሱዋካ መንꬆፍተ። 47 እስራኤለ ማባራ ኡባይ ፓስካ ባኣለ ቦንቻናዉ ኮሼስ።

48 “አሳ ጋደ አስ ግድድ ህንተ ግዶን ደእያ አስ ጎዳ ፓስካ ባኣለ ቦንቻናዉ ኮይኮ፥ እያራነ እያ ሶን ደእያ አደ ኡባይ ቃፃረቶ። ሄሳፈ ጉየ፥ እ ቢታ አዉ ናአዳ ታይበትድ ፓስካ ባኣለ ቦንቻናዉ ዳንዳኤስ። ሽን ቃፃረትቦና አስ እያፐ ሞፖ። 49 ሀ ዎጋይ ቢታ አዉ ናይታስነ ሀራ ቢታ አስ ግድድ ህንተ ግዶን ደእያ አሳስ እስኖ” ያግስ።

50 እስራኤለ ኡባይ፥ ጎዳይ ሙሰነ አሮና ኪትዳይሳዳ ኦꬅዶሶና። 51 ሄ ጋላስ ጎዳይ እስራኤለታ ጩጋን ጩጋን ግብፀ ቢታፈ ከስስ።