1 ጎዳይ ሙሰኮ፥ 2 “ባይራ የለትዳ አደ ኡባ ታዉ ዱማያ። እስራኤለ አሳ ግዶን ባይራ የለትዳ ኡባይ፥ አሰ ዎይኮ መሄ ግድን ኡባይ ታባ” ያግስ።

3 ሄሳፈ ጉየ፥ ሙሰይ አሳኮ፥ “ሀ ጋላሳይ፥ ህንተ ግብፀ አይለተꬃፈ ከይዳ ጋላስ ግድያ ግሾ እያ ቆፕተ። ጎዳይ ባ ግታ ዎልቃን ህንተና ከስዳይ ሄ ጋላሳና ግድያ ግሾ፥ እርሾይ ገልዳባ አይኮካ ሞፕተ። 4 አቢባ አጌናን፥ ሀች ጋላሳን ህንተ ግብፀፈ ከይደታ። 5 ጎዳይ ካናነታ፥ ህተታ፥ አሞረታ፥ ህወታነ ያቡሰታ ቢታ ህንተና ላትሳናዉ ህንተ ማይዛታስ ጫቅስ። ጎዳይ ህንተና ማꬅነ ኤስ ኩምዳ ሄ ቢታ ጋꬅያ ዎደ ላይꬃን ላይꬃን ሀ ኮይሮ አጌናን ሀ ጋላሳ ቦንችተ። 6 ላፑን ጋላስ ኩመꬅ እርሾይ ገልቦና ኡይꬅ ሚተ። ላፑንꬃ ጋላሳይ ጎዳ ቦንችያ ባኣለ ግዳና። 7 ሄ ላፑን ጋላሳታን እርሾይ ገልቦና ኡይꬅ ሚተ። እርሾይ ዎይኮ እርሾይ ደእያባይ ህንተ ግዶንነ ህንተ ዛዋን በንቶፎ። 8 ሄ ጋላስ ኔኒ፥ ‘ታኒ ሀይሳ ኦይ ታኒ ግብፀፈ ከይያ ዎደ ጎዳይ ታዉ ኦꬅዳይሳ ቆፓናሳ’ ያጋዳ ነ ናይታስ ኦዳ። 9 ሀ ባለይ ህንተ ኩሸን ዎይኮ ህንተ ሶምኦን ቃሸትዳ ማላ ግድድ ህንተና ቆፍስያባ ግዳና። ጎዳይ ህንተና ባ ግታ ዎልቃን ግብፀፈ ከስዳ ግሾ፥ ጎዳ ዎጋይ ህንተ ዶናፐ ዎꬎና መላነ ሀራታስ ህንተ ኦዳና መላ ህንተና ቆፍሳና። 10 ሄሳ ግሾ፥ ህንተ ሀ ባልያ ላይꬃን ላይꬃን ባ ዎድያን ቦንችተ።

11 “ጎዳይ ህንተዉነ ህንተ ማይዛታስ እማና ግድ ጫቅዳ ካናነታ ቢታ ገልስድ፥ ሄ ቢታ ህንተዉ እምያ ዎደ፥ 12 ባይራ የለትዳ ኡባ ጎዳስ እማ። ነ መሄታን ባይራ የለትያ አደ ኡባይ ጎዳሳ። 13 ባይራ የለትያ ሀረ ማር ኡባ ዶርሳ ማራን ዎዛ። ዎዞና እፅኮ እያ ሞርግያ መንꬃ። ነ አደ ናይታ ግዶን ባይራ የለትዳ ኡባ ዎዛ። 14 ስንꬃራ ያና ላይꬃታን ነ ናይት ነና፥ ‘ሀይስ አይቤ?’ ግድ ኦይችኮ ኔኒ፥ ‘ጎዳይ ኑና ባ ግታ ዎልቃን ግብፀ አይለተꬃፈ ከስስ። 15 ግብፀ ካዎይ ባ ዎዛና ሙምስድ ኑና የዶና እፅን፥ ጎዳይ ግብፀ ቢታን ደእያ አሳፐ ዶምድ መሄ ጋካናዉ ባይራ ኡባ ዎꬍስ። ኑኒ ባይራ የለትዳ መሄ አደ ጎዳስ ያርሸይነ ባይራ አደ ናይታ ኑኒ ዎዘይ ሄሳሳ ያጋ። 16 ጎዳይ ኑና ባ ግታ ዎልቃን ግብፀፈ ከስዳ ግሾ፥ ሀ ባለይ ኑ ኩሸን ዎይኮ ኑ ሶምኦን ቃሸትዳ ማላ ግድድ ኑና ቆፍስያባ ግዳና’ ያጋ” ያግስ።

17 ካዎይ አሳ የድዳ ዎደ፥ ፆሳይ ኤንታ ማታ ግድዳ ፍልስፄመ ቢታራ ካንꬅስያ ኦግያራ ካለꬅቤና። ፆሳይ ሄሳ ኦꬅዳይ፥ “አሳ ኦል ጋክኮ፥ ባንታ ቆፋ ላምድ ጉየ ግብፀ ስማና” ያግድ ቆፕዳ ግሾሳ። 18 ሄሳ ግሾ፥ ፆሳይ አሳ መላ ቢታ ኦግያራ ዩሽድ፥ ዞኦ አባኮ *ዞኦ አባ እብራወꬆ ዶናን ሀ ቃላይ ማይረ አባ ጌተቴስ። ካለꬅስ። እስራኤለት ኦላስ ጊግድ ግብፀ ቢታፈ ከይዶሶና።

19 ዮሰፍ፥ “ፆሳይ ቱማ ህንተና አሻናዉ ያና። ሄ ዎደ ህንተ ታ መቀꬃ ሀ ቢታፈ ኤክድ ቢተ” ያግድ እስራኤለታ ጫቅስድ ዎꬅዳ ግሾ ሙሰይ እያ መቀꬃ ባራ ኤክድ ብስ።

20 ኤንቲ ሱኮታፐ ደንድድ መላ ቢታ ጋፃን ደእያ ኤታማን ኡትዶሶና። 21 ኤንቲ ጋላስነ ቃማ ሄመታና መላ ጋላስ ኤንታና ካለꬃናዉ ሻራ ቱሳን፥ ቃማ ፖእስድ ኤንታ ካለꬃናዉ ታማ ቱሳን ኤንታ ስንꬃን ብስ። 22 ጋላስ ሻራ ቱሳይ፥ ቃማ ታማ ቱሳይ አሳ ስንꬃፈ ክችቤና።