1 ሄሳፈ ጉየ፥ ጎዳይ ሙሰኮ፥ 2 “ኤንቲ ጉየ ስሚድ ምግዶላፐነ ዞኦ አባፈ ግዶን፥ ፕሀህሮታ ስንꬃን፥ ባኣል-ዛፎና ማታን ኡታና መላ ኦዳ። 3 ካዎይ፥ ‘እስራኤለት መላ ቢታ ከያናዉ ኦገ ꬋይድ ጮ ቶይላቶሶና’ ያግድ ቆፓና። 4 ታኒ ካዉዋ ዎዛና ሙምሳና፤ እ ኤንታ ጎዳና። ታኒ ካዋነ እያ ኦላንቾታ ኡባ ፆናዳ ቦንቸታና። ሄ ዎደ ግብፀት ታኒ ጎዳ ግደይሳ ኤራና” ያግስ። ሄሳ ግሾ እስራኤለት እ ኦድዳይሳዳ ኦꬅዶሶና።

5 አሳይ ከስ ኤክዳይሳ ግብፀ ካዎይ ስእድ፥ እያራነ እያ ሞርናታራ ባንታ ቆፋ ላምድ፥ “ኑኒ አይስ ሄሳ ኦꬅዶ? ኑኒ እስራኤለታ የድድ፥ ኑና ሀጋዝያ አስ አይስ ꬋያነ” ያግዶሶና። 6 ሄሳ ግሾ እ ባ ፓራ ጋርያ ኮርድ፥ ባ ኦላንቾታ ኤክድ ደንድስ። 7 እ ኡሱፑን ፄቱ ዶረትዳ ፓራ ጋረታነ ግብፀ ቢታን ደእያ ሀራ ጋረታ ኡባ ኤንታ ሀላቃታራ ኤክድ ብስ። 8 ጎዳይ ግብፀ ቢታ ካዉዋ ዎዛና ሙምስዳ ግሾ ያሽ ባይና ከሳ ቦላ ደእያ እስራኤለ አሳ የደꬅስ። 9 ግብፀ ካዉዋ ፓራት፥ ፓራ ጋረትነ ኦላንቾት እስራኤለታ ካልድ ብድ፥ አባ ዶናን ባኣል-ዛፎናነ ፕሀህሮታ ማታን ኤንቲ ኡትዳሽን ደምዶሶና።

10 ካዎይ ባ ኦላንቾታራ ይሽን እስራኤለት ደምድ ያይዶሶና፤ ባንታና ማዳና መላ ጎዳኮ ዋስዶሶና። 11 ኤንቲ ሙሰኮ፥ “ግብፀ ቢታን ኑስ ዱፎይ ꬋይዴ? ኑኒ መላ ቢታ ሀይቃና መላ ኑና ከስዳይ ሄሳሴ? ኑና ግብፀፈ አይስ ኤሀዲ? 12 ግብፀን ደእሸ ሀይስ ሀናናይሳ ኤርድ፥ ‘ኑና አጋ ኑኒ ግብፀታስ ሃረታና’ ያግድ ነዉ ኦድቦኮ? መላ ቢታን ሀይቃናፐ ኤንታዉ ሃረተይስ ኑስ ሎኦሽን” ያግዶሶና።

13 ሽን ሙሰይ ዛሪድ፥ “ያዮፍተ፤ ምንድ ኤቅተ። ጎዳይ ሀች ህንተና አሽያ አሹዋ ህንተ በአና። ሀች ህንተ በእያ ግብፀታ ዛር በኤከታ። 14 ህንተ ስእ ጊተ፤ ጎዳይ ህንተ ግሾ ኦለታና” ያግስ።

15 ጎዳይ ሙሰኮ፥ “ኔኒ አይስ ታኮ ዋሳይ? እስራኤለት ስን ሄመታና መላ ኦዳ። 16 ነ ፃምአ አባ ቦላ ደንꬃ፤ ሃꬃይ ሻከታና። እስራኤለት መላ ቢታራ አባ ፕንድ ባና። 17 ታኒ ግብፀታ ዎዛና ሙምሳና፤ ኤንቲ ህንተ ጌዶ ካልድ አባን ገላና። ታኒ ካዉዋ፥ እያ ኦላንቾታ፥ እያ ፓራ ጋርያነ እያ ፓራ ጋርያ ላገይሳታ ፆናዳ ቦንቸታና። 18 ታ ኤንታ ፆንዳ ዎደ፥ ታኒ ጎዳ ግደይሳ ግብፀት ኤራና” ያግስ።

19 ፆሳ ኪታንቾይ፥ እስራኤለ ኦላንቾታፐ ስንꬃራ ሄመተይስ ኤንታፈ ጉየ አꬍድ ሄመትስ። ሻራ ቱሳይ ኤንታ ስንꬃፈ ጉየ ባጋ አꬍድ፥ 20 ግብፀታስነ እስራኤለታስ ግዶን ኤቅስ። ሄ ሻራይ ግብፀታስ ꬉምስድ፥ እስራኤለታስ ፖእስስ። ያትን ቃማ ኩመꬅ ግብፀት እስራኤለታኮ ሺቅቦኮና።

21 ሙሰይ አባ ቦላ ባ ኩሽያ ምጭስ። ጎዳይ ሄ ቃማ ዎልቃማ ዶሎሀ ጫርኮ የድድ መላ ቢት በንታና ጋሶ አባ ሾጭስ። ሃꬃይ ሻከትስ። 22 ሃꬃይ ሻከትድ ናምኡ ባጋን ጎዳዳ ኤቅን፥ እስራኤለት መላ ቢታራ ሄመትድ ፕንዶሶና። 23 ግብፀ ካዉዋ ፓራት፥ እያ ፓራ ጋረትነ እያ ፓራ ጋርያ ላገይሳት ኤንታና ካልድ፥ አባን ገልዶሶና። 24 ሳእ ዎንታና ሀንሽን ጎዳይ ታማነ ሻራ ቱሳን ግድድ ግብፀ ኦላንቾታ ዱገ ፄልድ፥ ኤንታዉ ሀናናባ ꬋይስስ። 25 ፓራ ጋረታ ገርቶይ ገንደረቶና መላ ጎዳይ ኤንታ ፓራ ጋረታ ገርቱዋ ሳአራ ኦይꬅስ። ግብፀት፥ “ጎዳይ እስራኤለታ ማድድ ኑና ኦልያ ግሾ፥ ኑኒ ኤንታ አግድ ባቃቶስ” ያግዶሶና።

26 ጎዳይ ሙሰኮ፥ “ሃꬃይ ግብፀታ ቦላ፥ ኤንታ ፓራ ጋረታ ቦላነ ኤንታ ፓራ ጋርያ ላገይሳታ ቦላ ጉየ ስማና መላ ነ ኩሽያ አባ ቦላ ምጫ” ያግስ። 27 ሙሰይ ባ ኩሽያ አባ ቦላ ምጭን፥ ሳእ ዎንትያ ዎደ አባይ ባ ካሰ በሳ ጉየ ስምስ። ግብፀት ባቃታናዉ ኮይዶሶና፥ ሽን ጎዳይ ኤንታ አባን የግስ። 28 ሃꬃይ ጉየ ስሚድ፥ እስራኤለታ ካልድ አባን ገልዳ ፓራ ጋረታ፥ ፓራ ጋረታ ላገይሳታነ ግብፀ ኦላንቾታ ምትስ። ኤንታፈ እሶይካ አትቤና። 29 ሽን እስራኤለት አባ ግዶራ መላ ቢታራ ሄመትድ፥ ሃꬃይ ሻከትድ ጎዳዳ ኤቅዳሽን ፕንዶሶና። 30 ጎዳይ ሄ ጋላስ እስራኤለ አሳ ግብፀታ ኩሸፐ አሽስ። እስራኤለት ሀይቅድ ዝንእዳ ግብፀታ አባ ዶናን በእዶሶና። 31 እስራኤለት ጎዳይ ግብፀታ ቦላ በስዳ ግታ ዎልቃ በእዳ ዎደ ጎዳ ያይዶሶና። ጎዳነ እያ አይልያ ሙሰ አማንዶሶና።