15
ሙሰነ ማይራም ማዝሙረ
1 ሄ ዎደ ሙሰይነ እስራኤለ አሳይ ሀ ማዝሙርያ ጎዳስ የፅዶሶና።
እ ባ ግታ ፆኑዋን ቦንቸትዳ ግሾ፥
ታኒ ታ ጎዳስ ጋላታ ማዝሙርያ የፃና።
ፓራነ ፓራ ቶገይሳ አባን የግስ።
2 ጎዳይ ታ ምኖተꬃነ ታ ማዝሙርያ ጋሱዋ፥
እ ታና አሸይሳ።
እ ታ ፆሳ፤ ታኒ እያ ሳባና።
እ ታ አዋታ ፆሳ፤ ታኒ እያ ቦንቻና፤ ጋላታና።
3 ጎዳይ ኦላንቾ፤
እያ ሱንꬃይካ ጎዳ።
4 ግብፀ ካዉዋ ፓራ ጋረታነ እያ ኦላንቾታ አባን የግስ።
ግብፀ ካዉዋ፥ ኡባፈ አꬎ ግድዳ ቶራ ሞጮናታ፥ ዞኦ አባን ምትስስ።
5 ኤንታና ጪሞ ሃꬃይ ምትስ፤
ኤንቲ ሹቻዳ ጪሞን ምተትዶሶና።
6 “አቤት ጎዳዉ፥ ነ ኡሻቻ ኩሸይ ዎልቃን ጎባ፤
ነ ኩሸይ ሞርክያ መንረꬅስ።
7 ነ ግታ ፆኑዋን፥
ኔራ ኤቀተይሳታ ኦላዳሳ።
ነ ሸነይ ታማዳ ኤፅድ፥
ኤንታ ካፍለዳ ምስ።
8 ነ ሀንቁዋን ነ አባ ፑንን፥
ሃꬃይ ጎዳዳ ኤቅስ።
አባ ጪሞት ጋርሳን ሹቻዳ ምንዶሶና።
9 “ሞርከይ፥ ‘ታኒ ኤንታ የደꬃዳ ኦይካና፤
ታኒ ኤንታ ሻሉዋ ሻካዳ፥
ታ ኮይዳባ ኡባ ኤካና።
ታኒ ታ ማሻ ሾዳዳ ኤንታ ꬋይሳና’ ያግድ ጬቀትስ።
10 ሽን ኔኒ ኤንታ ፑንን፥ አባይ ኤንታ ምትስ።
ኤንቲ አባ ጪሙዋን ብራታዳ ምተትዶሶና።
11 አቤት ጎዳዉ፥ ፆሳታ ግዶን ነ ማል ኦኔ?
ጌሻተꬃን ያሸይ ነ ማል ኦኔ?
ቦንቾይ ዳጋንይነ ማላልስያባ ኦይ ነ ማል ኦኔ?
12 ኔኒ ነ ኡሻቻ ኩሽያ ምጭዳ ዎደ፥
ቢታይ ኤንታ ምትስ።
13 “ኔኒ ዎዝዳ አሳ ነ መርና ሲቁዋን ካለꬃዳሳ።
ኔኒ ነ ዎልቃን ኤንታ ነ ጌሻ ቢታ ገልሳዳሳ።
14 ካዎተꬃት ሄሳ ስእድ ያሻን ኮኮርዶሶና።
ፍልስፄመ ቢታ አሳትካ ኡንኤትዶሶና።
15 ሄ ዎደ ኤዶመ ቢታ ሀላቃት ዳጋምዶሶና፤
ሞአበ ቢታ ሃረይሳት ያሻን ኮኮርዶሶና፤
ካናነ አሳት ዳጋማን ዳቡርዶሶና።
16 ዳጋምነ ያሽ ኤንታ ኦይክስ።
አቤት ጎዳዉ፥ ኤንቲ ነ ዎልቃ ግታተꬃ በእድ፥
ነ አሳይ አꬋና ጋካናዉ፥
ኔኒ ዎዝዳ አሳይ አꬋና ጋካናዉ፥
ሹቻዳ ቶለትድ ኤቅዶሶና።
17 ኔኒ ኤንታ ኤሀዳ፥ ነ ዙማ ሁጰን ቶካና።
አቤት ጎዳዉ፥ ሄ በሳይ ኔኒ ነዉ ዳናዉ ዶርዳ በሲ፥
ኔኒ ነ ኩሽያን ምንꬃዳ ኬፅዳ ነ ኬ።
18 ጎዳይ መርና ጋካናዉ ካዎታና”
ያግድ የፅዶሶና።
19 እስራኤለት አባ ግዶራ መላ ቢታራ ፕንን፥ ግብፀ ካዉዋ ፓራት፥ እያ ፓራ ጋረትነ እያ ፓራ ቶገይሳት አባን ገልዳ ዎደ ጎዳይ ኤንታ ቦላ አባ ሃꬃ ዛርን ሃꬃይ ኤንታ ምትስ። 20 አሮና ምችያ፥ ናብያ ማይራማ ካራቦ ኤካሱ። ሀራ ማጫሳት ኡባይ ባንታ ካራቦ ኤክድ ባቅሸነ የፅሸ እዮ ካልዶሶና። 21 ማይራማ፥
“እ ባ ግታ ፆኑዋን ቦንቸትዳ ግሾ፥
ፓራነ ፓራ ቶገይሳታ እ አባን የግዳ ግሾ፥
እያዉ ማዝሙርያ የፅተ” ያጋዳ ኤንታዉ የፃሱ።
ጫሞ ሃꬅ
22 ሄሳፈ ጉየ፥ ሙሰይ ዞኦ አባ ማታፐ እስራኤለታ ደንꬅድ ሹራ መላ ቢታ ጋካናዉ ካለꬅስ። ሄ መላ ቢታን ኤንቲ ሄꬑ ጋላስ ሄመትዶሶና ሽን ሃ ደምቦኮና። 23 ኤንቲ ማራ ጌተትያ በሲ ጋክድ ሃ ደምዶሶና፥ ሽን ሃꬃይ ጫሞ ግድያ ግሾ ኡያናዉ ዳንዳእቦኮና። ሄሳ ግሾ ሄ በሳይ ማራ *ማራ: ማራ ጉሳይ “ጫሞ” ጉሱ። ጌተትስ። 24 አሳይ፥ “ኑኒ አይ ኡያኔ?” ግድ ሙሰ ቦላ ዙዙምዶሶና።
25 ያንን፥ ሙሰይ ጎዳኮ ዋስስ፤ ጎዳይ እያ እስ ምꬅ በስስ። ሙሰይ ሄ ምꬃ ሃꬃን የግን ሃꬃይ ማልእስ።
ያን ጎዳይ ኤንታዉ ህገ እሚስ፤ ያን ጎዳይ ኤንታ ፓጭስ። 26 ሙሰይ ኤንታኮ፥ “ህንተ ህንተ ጎዳ ፆሳስ ኪተትተ፤ እ ኮያባ ኦꬅተ። ህንተ ታዉ ፖሎ ኪተትኮነ ታ ግያባ ስእኮ ግብፀታ ቦላ ታ የድዳ ሀርግያን ህንተና ፕርድከ። ታኒ ህንተና ፓꬅያ ጎዳ” ያግስ።
27 ሄሳፈ ጉየ ኤንቲ ኤልማ ብዶሶና። ያን ታማነ ናምኡ ሃꬃ ፑልቶትነ ላፑን ታሙ ዛምባ ምꬃት ደኦሶና። ኤንቲ ያን ሃꬃ ዶናን ኡትዶሶና።