1 ግብፀፈ ከይዳ ናምአንꬆ አጌናን፥ ታማነ እቻሻንꬆ ጋላስ እስራኤለ አሳ ኡባይ ኤልማፐ ደንድድ፥ ኤልማፐነ ሲናፐ ግዶን ደእያ ሲነ ጌተትያ መላ ቢታ ይዶሶና። 2 እስራኤለ አሳ ኡባይ መላ ቢታን ሙሰ ቦላነ አሮና ቦላ ዙዙምዶሶና። 3 እስራኤለት ኤንታኮ፥ “ኑኒ ግብፀ ቢታን ጎዳ ኩሸን ሀይቅዳ ግዶርኮሽን። ሀር አቶ ኑኒ ያን ዎꬍ ኡትድ አሹዋነ ሀራ ካꬅ ኡባ ኑ ኮይዳ መላ ሞስ። ሽን ህንተ ኑና ኡባ ከስድ ሀ መላ ቢታ ኮሻን ዎꬍሴታ” ያግዶሶና።

4 ጎዳይ ሙሰኮ፥ “ታኒ ህንተዉ ሳሎፐ ካꬅ ቡክሳና። አሳይ ጋላስ ጋላስ ከይድ፥ ሀችስ ግድያባ ማፃናዉ ኮሼስ። አሳይ ታው ኪተትያኮነ ኪተቶናኮ ታኒ ኤንታ ሄሳን ፓጫና። 5 ሳምንታን ሳምንታን ኡሱፑንꬆ ጋላስ ኤንቲ ካሰ ማፀይሳስ ናምኡ ኩሸ ማፅድ ካꬆ” ያግስ።

6 ሄሳ ግሾ ሙሰይነ አሮን እስራኤለ አሳኮ፥ “ህንተና ግብፀ ቢታፈ ከስዳይ ጎዳ ግደይሳ ኦማርስ ህንተ ኤራና። 7 ህንተ ጎዳ ቦላ ዙዙምዳይሳ እ ስእዳ ግሾ፥ ዎንታ ጎዳ ቦንቹዋ ህንተ በአና። ህንተ ኑ ቦላ ዙዙማናዉ ኑኒ ኦኔ?” ያግዶሶና። 8 ሄሳፈ ጉየ ሙሰይ፥ “ህንተ ጎዳ ቦላ ዙዙምዳይሳ እ ስእዳ ግሾ፥ እ ህንተዉ ኦማርስ ማናዉ አሾ እመይነ ዎንታ ማናዉ ህንተ ኮይያ መላ ኡይꬁ እመይ ጎዳ ግደይሳ ህንተ ኤራና። ህንተ ኑ ቦላ ግዶናሽን ጎዳ ቦላ ዙዙመታ” ያግስ።

9 ሙሰይ አሮናኮ፥ “ኔኒ እስራኤለ አሳ ኡባ፥ ‘ጎዳይ ህንተ ዙዙንꬃ ስእዳ ግሾ፥ ይድ ጎዳ ስንꬃን ኤቅተ’ ያጋ” ያግስ። 10 አሮን እስራኤለ አሳ ኡባስ ኦድዳ ዎደ ኤንቲ መላ ቢታ ስሚድ፥ ሻራ ግዶራ ቆንጭዳ ጎዳ ቦንቹዋ በእዶሶና። 11-12 ጎዳይ ሙሰኮ፥ “ታኒ እስራኤለታ ዙዙንꬃ ስአስ። ኔኒ ኤንታዉ ‘ኦማርስ አሾ ህንተ ማና፤ ዎንታ ህንተ ኮይዳ መላ ኡይꬁ ኤካና። ሄ ዎደ ህንተ ታኒ ጎዳ ህንተ ፆሳ ግደይሳ ኤራና’ ያጋዳ ኦዳ” ያግስ።

13 ሄ ጋላስ ኦማርስ ኩራቾት ይድ፥ እስራኤለ አሳይ ደእያ በሳ ማእዶሶና። ዎንታ ኤንታ ሄራን አክ ቢታ ማእስ። 14 አካይ፥ ፅዝእዳ ዎደ ሌኦነ ላፋባይ መላ ቢታ ቦላ በንትስ። እካ ሻቻዳ ቦꬅ። 15 እስራኤለት ሄሳ በእዳ ዎደ እያ ኤሮና ግሾ፥ እሶይ እሱዋኮ፥ “ሀይስ አይቤ?” ያግዶሶና።

ያትን ሙሰይ ኤንታኮ፥ “ህንተ ማና መላ ጎዳይ እምዳ ካꬃይ ሀይሳ። 16 ጎዳይ፥ ‘አሳይ እሶይ እሶይ ባዉ ኮሸይሳ መላ ሺሾ፤ ሶን ደእያ እስ እስ አስ ባ ሁጰን ናምኡ ልትሮ ኤኮ’ ያጋ” ያግድ ኪትስ።

17 እስራኤለት ኪተትዳይሳዳ ኦꬅዶሶና፤ ባጋይ ዳርስድ፥ ባጋይ ጉꬅድ ሺሽዶሶና። 18 ኤንቲ ሺሽድ ልትሮን ማክያ ዎደ ዳርስ ሺሽዳይሳስ ፓላህቤና፤ ጉꬁ ሺሽዳይሳስካ ፓጭቤና። እሶይ እሶይ ባዉ ኮሸይሳ መላ ሺሽስ። 19 ሙሰይ ኤንታኮ፥ “ኦንካ እያፐ ዎንታስ አሾፎ” ያግድ ኪትስ። 20 ሽን ኤንታፈ እሶት እሶት ሙሰይ ኦድዳይሳ ስኦና እፅድ ዎንታስ ምንጅዶሶና። ኤንቲ ምንጅዳይስ ጉፁንትድ ፅንቅስ። ሄሳ ግሾ ሙሰይ ኤንታ ቦላ ሀንቀትስ። 21 ዎንታ ዎንታ አሳ ኡባይ ባንታዉ ኮሸይሳ መላ ሺሼስ። አዋይ ምችያ ዎደ ሳአን አትዳይስ ትልኤስ።

22 ኡሱፑንꬆ ጋላስ ኤንቲ ካሰ ሺሽያ ናምኡ ልትሩዋ ቦላ እያ መላ ጉጅድ እስ እስ አሳስ ኦይዱ ልትሮ ሺሾ። ያትን እስራኤለ ሀላቃት ብድ ሄሳ ሙሰስ ኦድዶሶና። 23 ሙሰይ ዛሪድ፥ “ዎንቶይ ሸምፖ ጋላስ ግድድ ጎዳ ቦንችያ ጌሻ ሳምባታ። ሄሳ ግሾ፥ ህንተ ኡክያባ ኡክተ፤ ዶይስያባ ዶይስተ። ዎንቶስ ዎꬅተ” ያግስ። 24 ኤንቲ ሙሰይ ኪትዳይሳዳ ዎንቶስ ዎꬅን፥ ፅንቅቤና ዎይኮ ጉፁንትቤና። 25 ሙሰይ ኤንታኮ፥ “ሀይሳ ሀች ሚተ፤ ሀች ጎዳ ቦንችያ ሸምፖ ሳምባታ ግድያ ግሾ፥ ህንተ ሀች ደንባን ደመከታ። 26 ህንተ ካꬃ ኡሱፑን ጋላሳታን ሺሻናዉ ዳንዳኤታ፥ ሽን ላፑንꬃ ጋላሳይ ሸምፖ ጋላስ ግድያ ግሾ አይብ ካꬅካ ሄ ዎደ ዴና” ያግስ።

27 ላፑንꬃ ጋላሳን እስ እስ አሳይ ሺሻናዉ ከይዶሶና፥ ሽን አይኮካ ደምቦኮና። 28 ያትን፥ ጎዳይ ሙሰኮ፥ “ታ ኪታነ ታ ህግያ ህንተ ናጎና እፀይ አዉደ ጋካናሴ? 29 ታኒ ህንተዉ ሳምባታ እምዳይሳ አኬክተ። ኡሱፑንꬆ ጋላሳን እ ህንተዉ ናምኡ ጋላሳ ካꬅ እመይ ሄሳ ግሾሳ። ላፑንꬃ ጋላሳን ኦንካ ካረ ከዮና ባ ሶን ባ ሶን ጋምኦ” ያግስ። 30 ሄሳ ግሾ፥ አሳይ ላፑንꬃ ጋላሳን ሸምፕስ።

31 እስራኤለ አሳይ ሄ ካꬃ ማና *ማና: እብራወꬆ ዶናን ማና ጉሳይ “ሀይስ አይበ” ጉሱ። ግድ ፄግዶሶና። ማናይ ዴቦ አይፈ መላ ግድድ ቦꬅ። እ ኤሳራ ኡክዳ ኡይꬃዳ ማልኤስ።

32 “ታኒ ህንተና ግብፀ ቢታፈ ከስዳ ዎደ መላ ቢታን ሙዝዳይ ማና ግደይሳ ያና የለተꬃይ በአና መላ እያፐ ናምኡ ክሎ ግራመ ዎꬅተ” ያግድ ጎዳይ ኪትዳይሳ ሙሰይ እስራኤለ አሳስ ኦድስ።

33 ሙሰይ አሮናኮ፥ “ናምኡ ክሎ ግራመ ማና ኤካዳ ፃሮን ቆላዳ ያና የለተꬃስ ጎዳይ ጎይነትያ በሳን ዎꬃ” ያግስ።

34 ጎዳይ ሙሰ ኪትዳይሳዳ፥ አሮን ማና ጎዳ ስንꬃን ታቦትያ ግዶን ዎꬅስ። 35 እስራኤለት ባንታ ደእያ ካናነ ቢታ ዛዋ ይድ ጋካናዉ ኦይታሙ ላይꬅ ማና ምዶሶና። 36 ሄ ዎደ አሳይ ማክያ ሚሸይ ላታማነ ናምኡ ልትሮ ኦይኬስ።