1 እስራኤለ አሳ ኡባይ ጎዳይ ኪትዳይሳዳ እስ በሳፈ ሀራ በሲ ዩይሸ፥ ሲን መላ ቢታፈ ደንድድ ራፍድማ ጌተትያ በሳን ኡትዶሶና። ሽን ኤንቲ ኡያናዉ ሃꬅ ሄ በሳን ꬋይስ። 2 ኤንቲ፥ “ኑስ ኡያናዉ ሃ እማ” ያግድ ሙሰራ ካጨትዶሶና።

ሙሰይ ዛሪድ፥ “ህንተ ታራ አይስ ካጨቴቲ? ጎዳ አይስ ፓጨቲ?” ያግስ።

3 ሽን አሳይ ያን ሃꬃ ሳሞትድ፥ “ኔኒ ኑና፥ ኑ ናይታነ ኑ መህያ ሳሞን ዎꬋናዉ ግብፀፈ ከሳዳ ሀይሳ አይስ ኤሀዲ?” ያግድ ሙሰ ቦላ ዛር ዛር ዙዙምዶሶና።

4 ያትን ሙሰይ፥ “ታኒ ሀ አሳ ዋቶ? ኤንቲ ታና ሹቻን ጫዳና ሀኖሶና” ያግድ ጎዳ ዎስስ።

5 ጎዳይ ሙሰኮ፥ “ኔኒ እስራኤለ አሳፐ ጭማታ ኔራ ኤካዳ አሳፐ ስን አꬋዳ ሄመታ። ቃስ ናይለ ሻፋ ሾጭዳ ፃምኣ ነ ኩሸን ኦይካዳ ባ። 6 ታኒ ኮሬባ ዙማን ዛላ ቦላ ነ ስንꬃን ኤቃና። ሄ ዛላ ሾጫ፤ አሳይ ኡያና ሃꬃይ እያፐ ከያና” ያግስ። ሙሰይ እስራኤለ ጭማታ ስንꬃን ሄሳ ኦꬅስ።

7 እስራኤለት፥ “ቱማ ጎዳይ ኑራ ደኢ?” ያግድ ዙዙምዳ ግሾነ ጎዳ ፓጭዳ ግሾ ሄ በሳ ማሳሀነ ማርባ *ማሳሀነ ማርባ: እብራወꬆ ዶናን ማሳሀ ጉሳይ “ፓጮ” ጉሱ፥ ቃስ ማርባ ጉሳይ “ዙዙንꬅ” ጉሱ። ግድ ሱንꬅስ።

8 አማለቃት ይድ ራፍድማን እስራኤለታ ኦልዶሶና። 9 ሙሰ እያሱኮ፥ “ኔኒ ዎንቶ አማለቃታ ኦላናዉ ጉꬃ አስ ዶራ። ታኒ ፆሳ ፃምኣ ኦይካዳ ዙማ ሁጰን ኤቃና” ያግስ።

10 ሙሰይ ኪትዳይሳዳ እያሱይ አማለቃታ ኦልስ። ሙሰይ፥ አሮንነ ሆር ዙማ ሁጰ ከይዶሶና። 11 ሙሰይ ባ ኩሽያ ደንꬅድ ጋምእያ ዎደ እስራኤለት ፆኖሶና፥ ሽን እ ባ ኩሽያ ዎꬅያ ዎደ አማለቃት ፆኖሶና። 12 ሙሰ ኩሸይ አርጋጭዳ ዎደ አሮናራነ ሁራራ ሹች ኤህድ ሙሰ እያ ቦላ ኡትስዶሶና። አሮንነ ሁር ኡሻቻራነ ሀድርሳራ ኤቅድ አዋይ ዉላና ጋካናዉ እያ ኩሽያ ካትስ ኦይክዶሶና። 13 ሄሳዳ ኦꬅድ እያሱይ አማለቃታ ማሻን ኦልድ ꬋይስስ።

14 ሄሳፈ ጉየ ጎዳይ ሙሰኮ፥ “ሀይስ ኡባ ዎደ ሀሳየታና መላ ሀ ፆኑዋ ታርክያ ፃፋ። ታኒ አማለቃታ ቡርፆራ ꬋይሳናይሳነ ኤንቲ ዶገታናይሳ እያሱስ ኦዳ” ያግስ። 15 ሙሰይ ያርሾ በሲ ጊግስድ፥ “ጎዳይ ታ ፆኑዋ ባንድራ” ግድ ሱንꬅስ። 16 እ፥ “ጎዳ ፆኖ ባንድራ ꬎቁ ኦꬅድ ኦይክተ። ጎዳይ አማለቃታ መርናዉ ኦላና” ያግስ።