1 ምድያመ ቢታ ካህነይ፥ ሙሰ ቦሎይ ዮቶር፥ ጎዳይ ሙሰስነ ባ አሳ እስራኤለታስ ኦꬅዳባነ ኤንታና ግብፀፈ ከስዳባ ስእስ።

2 ሄ ዎደ ሙሰ ቦሎይ ዮቶር፥ እያ ማታን ሙሰይ አግድ ብዳ እያ ማችዉ ስፖሮነ፥ 3 እ ናምኡ ናይታ ኤክድ ይስ። ሙሰይ፥ “ታኒ አላጋ ቢታን በተ አስ ግዳስ” ግድ ባይራ ናኣ ገርሳማ ግድ ሱንꬅስ። 4 ካሉዋ ቃስ፥ “ታ አዋ ፆሳይ፥ ታና ግብፀ ካዉዋ ማሻፈ አሽስ” ግድ አላዛራ ግድ ሱንꬅስ።

5 ሙሰ ቦሎይ ዮቶር፥ እያ ማችዉነ እ አደ ናይታ ባራ ኤክድ፥ መላ ቢታን፥ ፆሳ ዙማ ማታን ደእያ ሙሰኮ ይስ። 6 እ ባንታ ዩሳ ኤርሳናዉ ሙሰኮ ኪትስ።

7 ሄሳ ግሾ፥ ሙሰይ ባ ቦሉዋ ሞካናዉ ከይድ፥ እያ ዝግ ሳሮꬅድ እያ ዬርስ። ኤንቲ እሶይ እሱዋ ሳሮꬅ ስሚድ ሙሰ ዱንካንያ ግዶ ገልዶሶና። 8 ጎዳይ እስራኤለታ አሻናዉ ግብፀ አሳ ቦላነ ኤንታ ካዉዋ ቦላ ኦꬅዳባ ኡባነ ኦገን ኤንታ ጋክዳ መቱዋ ኡባን ጎዳይ ዋት ማድዳኮ ሙሰይ ባ ቦሉዋስ ኦድስ።

9 ዮቶር ጎዳይ እስራኤለ አሳ ግብፀታ ኩሸፐ አሻናዉ ኦꬅዳ ሎኦ ኦሶታባ ስእድ ኡፋይትስ። 10 እ፥ “ህንተና ግብፀታፐ ኤንታ ካዉዋ ኩሽያፐ አሽድ፥ ግብፀ አይለተꬃፈ ከስዳ ጎዳይ፥ እ ጋላተቶ። 11 ኦቶሮን ኤንታ ቦላ ኢታባ ኦꬅዳ ግብፀታፐ እስራኤለታ አሻናዉ ሄሳ ኦꬅዳ ግሾ፥ ጎዳይ ፆሳታ ኡባፈ ግታ ግደይሳ ታኒ ሀእ ኤራስ” ያግስ። 12 ሄሳፈ ጉየ ዮቶር፥ ሙሰ ቦሎይ፥ ፁሳ ያርሾነ ሀራ ያርሾ ፆሳስ ያርሽስ። አሮንነ እስራኤለ ጭማት ኡባይ ፆሳ ስንꬃን እያራ ጌሻ ካꬃ ማናዉ ይዶሶና።

13 ዎንተꬃ ጋላስ ሙሰይ አሳስ ፕርዳናዉ ኡትስ። አሳይ ሙሰ ዩሹዋን ዎንታፈ ኦማርስ ጋካናዉ ኤቅድ ደኤስ። 14 ሙሰ ቦሎይ ሙሰይ አሳስ ኦይሳ ኡባ በእድ፥ “ኔኒ ነ ፃላላ ሀይሳ አይስ ኦꬃይ? አሳይ ዎንታፈ ኦማርስ ጋካናዉ ነ ዩሹዋን ኤሳዳ አይስ ነርካ ኦꬃይ?” ያግስ።

15 ሙሰይ ባ ቦሉዋኮ፥ “አሳይ ፆሳ ሸንያ ኦይቻናዉ ኮይድ ታኮ ይያ ግሾሳ። 16 ኤንታ ግዶን ኦድ ደእኮ ታኮ ዮሶና። ታ ኤንታ ግዶን ባልነ ቱም ኦነኮ ሻካይስ፤ ፆሳ ኪታነ ህግያ ኤንታዉ ኦዳይስ” ያግስ።

17 ሙሰ ቦሎይ፥ “ሀይስ ነ ኦይስ ሎኦ ግደና። 18 ነካ ኔኮ ይያ አሳ ኡባይ ዳቡረታ። ሀ ኦሶይ እስ አሳፐ ዳሮ ግድያ ግሾ፥ ኔኒ ነርካ ኦꬃናዉ ዳንዳአካ። 19 ሀእ ታኒ ነና ዞረይሳ ስአ፤ ፆሳይ ኔራ ግዳና። ኔኒ ሀ አሳ በሳን ግዳዳ ኤንታባ ፆሳስ ኦዳ። 20 ፆሳ ኪታነ ህግያ ኤንታ ታማርሳ። ኤንቲ ዋን ዳነኮነ አይ ኦꬃነኮ ኤንታ በሳ። 21 ቃስ አሳ ግዶን ኦዳ ሻክድ ኤርያ አሳታ፥ ፆሳ ያየይሳታ፥ አማንይሳታነ ዎꬋፈ ኤኮናይሳት ዶራ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦꬃዳ ሹማ። 22 ኤንቲ ኡባ ዎደ ካዉሻ ኦዳታ ባንታዉ ፕርዶ፥ ሽን ዴፆ ኦዳታ ኔኮ ኤሆ። ሄሳዳ ነ ኦꬅኮ ቶሆይ ነዉ ካዉያና። 23 ነ ኦꬃና መላ ፆሲ ኮየይ ሄሳ። ቃስ ነ ዳቡራካ ሀ አሳ ኡባይ ባ አላለይ ፖለትን ባ ሶ ባ ሶ ስማና” ያግስ።

24 ሙሰይ ዮቶራ ዞርያ ስእስ፤ እ ግዳባ ኡባ ኦꬅስ። 25 ሙሰይ እስራኤለታ ግዶፈ ኦዳ ሻክ ኤርያ አሳታ ዶርስ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦꬅድ ሹምስ። 26 ሹማት ካዉሻ ኦዳታ ባንታዉ ፕርድዶሶና፥ ሽን ዴፆ ኦዳታ ሙሰኮ ኤሆሶና።

27 ሄሳፈ ጉየ ሙሰይ ባ ቦሉዋ ሞይዝን፥ እ ባ ቢታ ስምስ።